محتويات المقال
علاقات قليلة جدا اللي بتكمل في الوسط الفني، خاصة لو الاتنين بيشتغلوا في نفس المجال، دايما أول لما نسمع عن جواز اتنين فنانين بنتوقع إنهم هايتطلقوا في وقت قريب، لكن علاقة أحمد حلمي ومنى زكي علاقة من نوع خاص جدا ومكملة مش عشان بس هم الاتنين بيحبوا بعض لكن عشان أسباب تانية مهمة جدا لو التزم بيها الناس هايفضلوا يحبوا بعض بطريقة راقية وجميلة زي أحمد ومنى.
تعالوا نشوف الأسباب دي مع بعض..
الاحتواء
في مهرجان القاهرة السينمائي منى أخدت جايزة فاتن حمامة واللي بياخدها فنانين تميزوا في سن صغير وعملوا إنجاز سينمائي ملموس.، منى ذكي عيطت وهي بتستلم جايزتها، أحمد مكانش متأثر ولا على وشه تعبيرات تجاري عياطها، في الحقيقة هو كان قاعد من بعيد بيبتسم بثقة وحب، في اللحظات الصعبة أو لما دموعنا بتنزل بنحتاج نشوف تعبير مختلف على وش شريكنا، تعبير فيه ثقة فينا وفي أحلامنا واحتواء للحظة اللي بنعيشها مهما كانت غريبة واستثنائية، تعبير بيحسسنا بالاحتواء وإن حد عنده حاجة مختلفة ومشبعة مهما نلف هانرجع نلاقيها معاه.
التقدير
أحمد حلمي مرة كان بيتكرم في دبي ومنى ذكي ماراحتش معاه التكريم، قعدت في القاهرة، وفي لقاء ليها على الراديو اتصل مخصوص عشان يقولها “إزيك يا حبيبتي” ويعتذر إنه مش عارف يسمع اللقاء بتاعهم على الراديو لأنه مش عارف يجيب التردد في دبي، اتصل على الهوا وقالها “أنا آسف يا حبيبتي كان نفسي أسمع اللقاء لكن حبيت أتصل أسلم عليكي” متخيلين درجة تقديره ليها، مقالش ماهي مجاتش معايا التكريم فانا مش هاتصل بيها، هو بيقدرها في المطلق وحابب يعبر عن التقدير ده طول الوقت.
كلمة “بحبك”
في ناس بتنسي كلمة بحبك أول لما يبصموا على عقد الجواز، رغم مرور 17 سنة على جوازهم، مفيش مرة بيتكلم على الهوا إلا وكلمة “حبيبتي” بتطلع منه بصورة تلقائية، سواء بيقولها يا حبيبتي أو منى حبيبتي أو بحبك، ولما في مرة المذيعة سألته في لقاء على الهوا عن علاقتهم قالها بالنص “مفيش حبيبة زيها”.
تعظيم الأمومة
رجالة كتير بتعتبر أمومة الست حاجة بتنقص من أنوثتها ومن جمالها وإن الست كل لما كانت أم كل لما كانت وحشة ومهملة في نفسها، كأن الولاد دول أعداءه مش ولاده، أحمد حلمي دايما بيتكلم عن منى ذكي باعتبارها أم عظيمة وست حريصة على راحة أولادها، يمكن ده اللي خلالها أخدت قرار إنها تخلف طفلين في فترات قريبة جدا من بعض بعد لما قعدت سنين طويلة جدا بعد ولادة بنتها الأولى لي لي ماتخلفش، وفجأة جابت سليم ومن بعده يونس في وقت قليل جدا.. لأنها حست بتقدير للدور والتعب اللي بتعيشه معاهم، في مرة اتسأل عنها قال بالنص”دورها مع الولاد لا يمكن تتصوره أم .. مش راجل، لا أم”.
المشاركة
أحمد ومنى بيتشاركوا كل حاجة، التربية والتخطيط للعمل، منى قالت في لقاء ليها “بفرح لما بيعمل فيلم يبين فيه قدراته، مايحبسش نفسه في مسار واحد، عنده وعي ، أحمد رسام ومهندس ديكور وبيعرف يكتب، عنده حاجات كتير جدا حقيقي فنان” أحمد كمان بيشارك منى في تربيتة الأولاد، وبيحكي إزاي لما مرة شخط في بنته اتأثرت جدا فتعبت للدرجة اللي خليته سنة كاملة بيعالج في أثر المرة دي وإزاي هو حريص جدا على نفسية البنت”
الدعم
الشغل في حياة معظم الستات شوكة في علاقاتهم بأزواجهم، أحمد حلمي لما حب يتكلم عن شغل مراته قال “أنا معجب من 2002 ورأيي زي ما هو ماتغيرش، الحقيقة هي دايما مش مبسوطة وحاسة إن فيه أحسن، في الناس في الصحاب في التربية في الشغل رغم إنها بتجيب آخر الحاجة وأنا مش شايف أحلى من كده” وهي أكدت “حلمي دايما بيحب يشكر في شغلي مابيعرفش ينتقد شغلي، أنا بنتقده لكن هو مش بينتقدني” حالة الاحترام الشديد من حلمي لمنى ماعطلتهاش عن مسيرتها ولا حطها في صراع بين علاقتهم وبين شغلها، عشان كدا نقدر نقول بجد إنها علاقة بناءة، بتغيرهم وتنقلهم هم الاتنين طول الوقت للأحسن.
الاهتمام والمسئولية
أحمد ومنى مهتمين جدا بالتفاصيل كل واحد عارف عن التاني ما يكفي عشان يكون فيه تفاهم، وأهم نقطة إنه مش معتمد عليها بأي شكل من الناحية المادية، منى قالت في أكتر من مناسبة إن فلوس شغلها بالكامل بتروح على شغلها، عشان تخدم على نفسها، وإن الفلوس الوحيدة اللي بتدخل جيبها بتكون من الإعلانات ودي بتوجهها لشغل خاص بيها برضه زي شركة الإنتاج اللي عملتها مع مجموعة صديقات، أحمد حلمي مش بس مهتم باهتماماتها لكن كمان بيصرف عليها ومش بيخليها تحط قرش في البيت ولا بيقولها مانتي بتشتغلي يبقى تعوضي غيابك.. أحمد حلمي راجل مسئول معاها.
الالتزام
عمرك ما تشوف صور نص كم لأحمد حلمي أو منى ذكي، الاتنين محترمين بعض جدا، وظهورهم دايما مع بعض، هو بيحترمها ودا واضح تماما، وهي بتقدره وده برضو واضح، ورغم ان الموضوع مابيخلاش من الغيرة لكنها مش غيرة قاتلة، منى بتقول: “لما بغير بقرصه جامد، قرصته كتير جدا مش قادرة أعدهم، هو كمان بيغير عليا، بنغير على بعض زي بعض، أنا بشوف نفسي متفتحة في الموضوع ده، احنا متساويين، بس هو عشان راجل معجباته أكتر بكتير، احنا في مجتمع شرقي تفاعل الرجالة مع الفنانة خاصة لو متجوزة، مش زي تفاعل البنات مع راجل.. البنات بقوا أجرأ”.
الكتمان والتفاهم
تقدر تعرف درجة الكتمان اللي في حياتهم من جمال صورتهم قدام الكاميرا، مفيش علاقة كاملة مفيهاش مشاكل ولا أزمات بس في علاقة أطرافها بيحترموا السرية وبيكتموا على نفسهم وفي ناس أول لما تزعل تخرج تنشر غسيلها قدام كل الناس، عرفت إن وجهة نظري صح لما لاقيته مرة في لقاء بيقول ” صبرت عليا كتير جدا وبقول ده قدام كل الناس”.
عرفت إنهم متفاهمين جدا مع بعض لما تأملت تاريخهم ولاقيت مالهمش مع بعض ولا فيلم واحد أو عمل غير إعلان عربيات والسبب إنه في كل مرة يتعرض عليهم عمل إما ما يعجبهوش أو مايعجبهاش، لا غصبوا على بعض ولا عملوها خناقة وهي دي كلمة السر.. التفاهم.
التعليق باستخدام حساب فيس بوك