“وأنا قدك كنت شاطرة جدًا، عاوزاك تبقى زيي. وأنا قدك كنت بقرأ الجرنان، ازاي مش عارف تقرأ كلمتين ورا بعض؟” الجمل دي أمهات كتير جدًا بتقولها بصوت عالي أو حتى بتقولها بينها وبين نفسها، طول الوقت حاسين إن أولادنا مش شاطرين زينا لما كنا صغيرين، في الوقت اللي احنا عاوزينهم يكونوا أحسن مننا بكتير. الموضوع ده بيعمل لنا إحباط شديد مع الوقت. وللأسف بمزاجي أو غصب عني أنا واحدة من الأمهات دي!
المفاجأة
من كام يوم، كنت بدوّر في درج قديم يخصني ولاقيت كتاب الإنجليزي الخاص بيا في سنة تالتة ابتدائي! في السن ده، مفروض إني كنت شاطرة جدًا ومن الأوائل على المدرسة ولحد لما اتخرجت من ثانوية عامة بمجموع 97% في الثانوية العامة، صورتي الذهنية عن نفسي إني شاطرة جدًا ومفيش زيي ولازم ابني يكون أحسن مني بمراحل، وده مش حاصل، فأنا على طول مخنوقة.
فتحت الكتاب وبدأت أركز واكتشفت حاجات ما كانتش تخطر في بالي عن نفسي وعن ابني في كتاب “Let’s learn English 3”. كنت بحاول أترجم ورا المدرسة بالعربي في الكتاب عشان أفهم الكلمات لما أروّح وأنا بعمل الواجب، فاكتشفت إني كاتبة الترجمة العربي كالتالي وأنا في تالتة ابتدائي، يعني المفروض خلاص أتقنت الكتابة: “كوب من العاصير- تلجة بدل ثلاجة-غس ألة بدل غسالة” وهكذا. مش بس كده، اكتشفت اكتشاف مذهل وهو إني كنت بكتب الحروف مقلوبة زي ابني بالظبط والموضوع كان مكمل معايا لحد تالتة ابتدائي لدرجة إني في كتاب المدرسة كنت كاتبة حرف الـ yمقلوب!
انهيار التوقعات
في لحظة واحدة، اتقلبت صورتي الذهنية عن نفسي من البنت اللي كانت عبقرينو من وهي صغيرة لطفلة ممكن تغلط عادي وبرضو تطلع من الاوائل بعد كده وتكون شغلتها الكتابة وتاخد عليها جوايز جوا وبرا مصر، الغلط مش شيء سيء ولا حاجة نخجل منها، الغلط حاجة عظيمة لو اتقومت صح، واتفهمت في سياقها.
طفل لسة بيتعلم في السنين الأول طبيعي يغلط ويكتب حاجات مش مظبوطة ونصقف له عشان حاول مش نكسره عشان غلط.
بعد لما شوفت كتابي اكتشفت إني بحاسب ابني على غلطات شبه دي وهو في عمر أقل من عمري، واكتشفت إني معنديش تسامح ولو شوفت حاجة زي دي في كتابه ممكن أهد الدنيا في حين إن محدش علق عليا أصلا واتسابت أتعلم لوحدي مع التقويم والتوجيه المستمر وهو ده الفرق تحديدا.
التسامح مع الأخطاء
ظهور الكتاب في التوقيت ده رسالة من القدر إني لازم أكون أهدى ومتسامحة أكتر. محدش مثالي وابني مش مفروض يوافق توقعاتي، مادام بيحاول وبيقضي وقت كل حاجة هتكون كويسة لو مكانش دلوقتي هيكون بعدين، الكتاب ده ظهرلي عشان يقولي “خليكي أهدى خليكي متفائلة الغلط وارد واللخبطة متاحة .. مش مهم يكتب صح المهم يكون عنده ثقة إنه هيكتب صح”.
التعليق باستخدام حساب فيس بوك