محتويات المقال
الأطفال الأيام دي بقوا بيقضوا فترات طويلة على الإنترنت وطبعًا يوتيوب من أكتر المواقع اللي كل الأطفال بيحبوها بما إنه مليان بفيديوهات من حول العالم سهلة وسريعة الوصول ليها ومعظمنا مش عاجبه الوضع وبنحس إنهم بيضيعوا وقتهم. بس لحسن الحظ ممكن نستغل اليوتيوب بطريقة مفيدة بسبب وجود قنوات تعليمية مفيدة ومسلية في نفس الوقت تسهّل على طفلك إنه يتعلم بطريقة ممتعة وتشد انتباهه. في المقال ده هنقول لك على 10 قنوات يوتيوب للأطفال هتساعد ابنك علي تنوير مخه واستغلال وقته في حاجة مفيدة وتبسطه.
أفضل 10 قنوات يوتيوب للأطفال
- ناشيونال جيوجرافيك كيدز National Geographic Kids
- قناة تيد التعليمية Ted-Ed
- سيمبل كيدز كرافتس Simple kids crafts
- سيسامي ستريت Sesame Street
- هوبلاكيدز لاب HooplaKidzLap
- قناة كراش كورس للأطفال Crash Course Kids
- ميزو كيدز Mizo Kids
- ثري دي كمبيوتر سنتر 3D Computer Center
- It’s Okay to Be Smart مفيش مشكلة إنك تكون ذكي
- قناة روضة
هنكلمكم عن كل قناة بالتفصيل:
من أشهر القنوات الترفيهية والمفيدة على اليوتيوب. بتقدم مجموعة من أروع البرامج المسلية والمفيدة كعالم الحيوان والطبيعة بطريقة مميزة وبرامج تعليمية وفي نفس الوقت مضحكة وممتعة للأطفال.
باستخدام الرسوم المتحركة، بتقدم قناة تيد-إيد محتوى متنوع ومبسط يناسب كل الأعمار. وكمان في بعض المدرسين بيستخدموها عشان يوضحوا فكرة الدروس بطريقة بسيطة.
منين بتيجي رائحة الجسم؟ ليه الإنسان بيبكي؟ إيه اللي هيحصل لو ما نمناش؟ لمحة من حياة طبيب فرعوني أو جندي روماني، أساطير من حول العالم، كل ده وحاجات تانية كتير مفيدة بتقدمها القناة عن طريق مجموعة متنوعة من الفيديوهات، بتناسب جميع الأعمار تقريبًا، وموجود فيها ترجمة بالعربي.
قناة يوتيوب لتعليم الأطفال مهارات يدوية زي طريقة صناعة الدمى والهدايا الجميلة وبتقدم كمان مجموعة من الدروس المفيدة المسلية والأنشطة في طرق صنع حاجات كتير من اللي بيهتم بيها الأطفال.
سيسامي ستريت من أشهر قنوات يوتيوب للأطفال وبتقدم فيديوهات هايلة باللغة الانجليزية والأولاد بيحبوا شخصياتها الكرتونية جدًا.
القناة دي بتقدم تجارب كتير وخدع علمية بسيطة ومبهرة فممكن تجربيها بنفسك مع طفلك في البيت، وباستخدام أدوات بسيطة
قناة «كراش كورس» كيدز بتقدم سلسة متابعة من الدروس لعلوم مرحلة التعليم الأساسي زي علوم الأرض والبيولوجيا والجغرافيا والهندسة وعلم الفلك، كلها بطريقة مبسطة ومسلية جدًا. بينزل عليها فيديوهات جديدة كل ثلاثاء وخميس، ومتاح فيها كمان الترجمة العربية.
مناسبة للأطفال في سن قبل المدرسة. بتقدم الفيديوهات اللي بتساعدهم على تعلم نطق الحروف بالعربي والإنجليزي وبتعلمهم كتابتها وأصوات الحيوانات والطيور، ده غير الفيديوهات الموجهة للأطفال اللي بيعانوا من مشكلة تأخر النطق والتوحد.
القناة الرسمية لشركة ثري دي كمبيوتر سنتر (شركة للتعليم عن بعد). القناة مناسبة للأطفال من سن سنتين لتمان سنين. بتقدم مجموعة من الفيديوهات لتعليم الأطفال 3 لغات (العربية، الإنجليزية، الفرنسية). ده غير فيديوهات الألعاب التعليمية وتعليم الفوتوشوب والبرمجة.
اسم القناة بيشرح هي إيه، لو ابنك بيحب يعرف ويكتشف عن الكون والعلوم الحياتية وعن سبب وجود الأشياء وأهمية وجودها فالقناة ده هتعجبه جدًا وهيتعلم منها كتير.
قناة عربية موجهة للأطفال من سن سنتين لخمس سنين بتعلمهم الحروف والأرقام العربية وأسماء الخضراوات والفاكهة، عن طريق أغاني تلفت انتباه الطفل وتسهل عليه الحفظ.
لو عندك مشكلة في ردود اولادك عليكي .. شوفي الحلول هنا تربية الأطفال: بنتي بترد عليا وحش .. ايه الحل؟
ممكن تقولي لنا في comment لو تعرفي قنوات يوتيوب للأطفال تكون مفيدة.
1 comment
فناة روضة قناة تجارية بحتة والمحتوى مبتذل ومقدم بطريقة سيئة وغير مهمتمين حتى بطريقة الغناء فتكون مزعجة ومملة