من أكتر الحاجات اللي بتتعبني في الشتاء، كثرة التبول وإني لازم كل شوية أسيب اللي في إيدي وأدخل الحمام. حتى وأنا نايمة، باصحى من أحلى نومة ولازم أسيب الدفا ده كله وأدخل الحمام. الموضوع ساعات بيبقى مؤلم بصراحة! عشان كده، قلت أتكلم معاكي النهارده عن أسباب كثرة التبول والضغط على المثانة وازاي تقلليه عشان ما تحتاسيش زيي.
هنا ممكن تشوفي نصائح للتبول بعد الولادة مباشرة
أسباب كثرة التبول / الضغط على المثانة
مش شرط يكون سبب كثرة التبول هو مشكلة صحية، ممكن تكون بس شرب كمية سوائل كبيرة. لكن عشان تكوني على علم وتقدري تتفادي المشكلات، هنقول لك الأسباب الصحية ورا كثرة التبول المتكرر.
- مرض السكري
- الحمل
- التهاب المثانة
- التهاب مجرى البول
- أثر جانبي لدوا الضغط
- المثانة النشطة
طبعًا أسهل حاجة تعرفيها في الأسباب دي هي الحمل والأثر الجانبي لإنك هتكوني عرفتي السبب خلاص. لكن هنكلمك عن الحالات التانية عشان تعرفيها.
اما هنا أشهر المشاكل أثناء الحمل
-
مرض السكري
مرض السكري / السكر خصوصًا النوع التاني (اللي بيصاب به الكبار) بيسبب زيادة وكثرة التبول. لو شاكة إن السكر هو السبب، روحي لدكتور الباطنة واسأليه على التحاليل اللازمة.
-
المثانة النشطة
المثانة النشطة بتخلي عندك إحساس دائم بالحاجة للتبول حتى وهي مش مليانة. أعراضها بتبقى تقلصات في المثانة، تبول لا إرادي أو سلس في البول. أسباب المرض ده كتير منها خطير ومنها أخطر عشان كده لازم تروحي لدكتور مسالك بولية في أقرب وقت لو عندك العرضين دول.
-
التهاب المثانة
التهاب المثانة هو حالة مزمنة بتسبب الضغط على المثانة وبتسبب كمان ألم في المثانة وأحيانًا في الحوض. المثانة في الحالة السليمة لما بتتملي بتبعت إشارة للمخ إنك لازم تدخلي الحمام. لكن مع الالتهاب ده، الإشارات دي بتتبعت أكتر من اللازم من غير ما تكون المثانة اتملت.
أعراض التهاب المثانة
- التبول المتكرر بكميات قليلة.
- ألم في الحوض أو بين المهبل والشرج.
- إحساس الحاجة للتبول أكتر من الطبيعي.
- ألم أثناء الجماع. (ولكن ده عرض لحاجات تانية كمان، ممكن تشوفيها هنا.)
في حالة وجود الأعراض دي، لازم تزوري الدكتور في أقرب وقت عشان العلاج يكون بدري والحالة ما تسوءش.
-
التهاب مجرى البول
التهاب مجري البول من أسخف التجارب اللي ممكن تمر بيها أي ست. وبيكون عادةً مؤلم جدًا في المنطقة الحساسة. خلينا نعرف أكتر عنه:
أعراض التهاب مجري البول
- التبول المتكرر.
- ألم أو حرقان في البول.
- دم في البول أحيانًا.
- ضغط أو تقلصات في الحوض والبطن السفلية.
- إحساس بالحاجة للتبول حتى لو المثانة فاضية.
خدي بالك إن الالتهاب ده بالذات لازم له علاج ومضاد حيوي، فلازم تروحي لدكتور مسالك أو نسا. ينصح دايمًا إنك لما تنشفي نفسك بعد الحمام أو الدش، تمسحي من قدام لورا مش العكس.
في النهاية بنتمنى لك الصحة والسلامة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك