“أنا باكرهك!” جملة زي دي لو أي أم سمعتها ممكن تنزل زي جردل المياه الساقعة وما بيبقاش قدامنا غير حل من اتنين: يا نبدأ على طول بعدها بوصلة من اللوم والعتاب للولاد ونعاقبهم أو نخاصمهم.
أو السيناريو التاني اللي هو دور الضحية: بعد كل اللي عملته عشانك تقولي لي إنك بتكرهيني؟ شكرً!
بس في الحقيقة، وعلى الرغم من قساوة الجملة اللي باين من بره، إلا إن ولادنا ساعات بيكونوا بيبعتوا لنا بيها رسالة خفية أو hidden message بيقول لك “ساعديني/ أنا محتاجك/ أنا غضبان لدرجة إني مش قادر أعبر عن اللي حاسّه”
حقيقة كره الأبناء للآباء
جملة بتوجع من ٣ حروف، بس ترجمتها مش بتكون الكره بالمعني الحرفي لكن بتكون “أنا غضبان ومش عارف أعبر”. وبما إننا أكبر مصدر أمان في حياة ولادنا، فيوم ما هيجربوا يخبطوا، هيخبطوا فينا عشان ضامنين وجودنا وحبنا غير المشروط لهم.
كيفية معالجة كره الأبناء
طيب نعمل إيه برده؟ ما هو مش هينفع نسيبهم يقولوا لنا كده، ونجري ناخدهم بالحضن!
– أول حاجة مهم نعملها إننا ما ناخدش الجملة دي بشكل شخصي، إننا نبقي فاهمين ومستوعبين إن ده تعبير عن الغضب، وسهل يتعلموا يعبروا بطريقة صح لو احتويناهم ودربناهم.
– مش وقت لوم أو عتاب: لما طفلك يقول لك جملة زي دي، وقفي أي حاجة كنتي بتعمليها معاه، وبيّني رفضك للكلام أو التعامل طول ما هو بيجرحك بكلامه بالشكل ده.
– اقلبي التربيزة بشياكة: بأنك توصلي له إنك حاسة بغضبه بس رافضة طريقة التعبير زي إنك تقولي له “بس أنا بحبك”، مش هقدر اتكلم معاك وانت بتقول لي كده عشان الكلمة ده بتزعلني جدًا/ واضح إنك متضايق قوي، ممكن تهدا وبعدين نكمل كلامنا.
انتي كده قدّرتي مشاعر الغضب ووصلتي لطفلك رسالة الحب غير المشروط وإنه مقبول ومحبوب في كل حالاته مهما حصل. بس في نفس الوقت، الغضب ده له أصول وطريقة للتعبير من غير ما نجرح اللي قدامنا، وده وصلتيه بأنك رفضتي بطريقة صارمة تكملي كلام وتجاوب معاه لحد ما يهدي.
– وآخر خطوة تعمليها إنك أكيد ما ينفعش تفوّتي جملة زي دي من غير ما تتكلموا فيها وفي عواقبها، يعني بعد ما يهدا وغالبًا لما مش هيلاقي منك رد فعل قوي زي الزعيق أو الخصام هييجي يعتذر من نفسه، وقتها نقدري تتكلمي معاه في إيه المسموح وإيه اللي مش مسموح وقت الغضب، وإيه الطرق الصح اللي نقدر نعبر بيها عن مشاعرنا باحترام من غير ما نإذي غيرنا بكلامنا أو تصرفاتنا.
التعليق باستخدام حساب فيس بوك