محتويات المقال
إيه ده إنتي اوحشيتي كده ليه أكيد حامل في ولد، بشرتك غامقة كده ليه، إيه ده شكلك تعبان أوي، إيه بقع اللي في وشك دي تعليقات كتير بتسمعها أمهات كتير في فترة الحمل، والحقيقة إنها مش بتبقى تعبانة ولا مرهقة ولا وشها طلعله بقع فجأة، والإسمرار أو البقع اللي في وشها وأجزاء تانية في الجسم بتكون ببساطة حاجة اسمها كلف الحمل وهنتعرف عليها أكتر في الموضوع ده.
إيه هو كلف الحمل؟
هو عبارة عن بقع غامقة بتظهر في أجزاء متفرقة في الوجه والجسم، ممكن يظهر في أول شهور الحمل وممكن تستمر لبعد الولادة في فترة الرضاعة وتختفي بعد شهور قليلة.
أسباب ظهور كلف الحمل
- التغييرات الهرمونية اللي بتمر بيها الحامل وإرتفاع هرمونات البروجيسترون والاستروجين اللي بيسببوا زيادة في صبغة الميلانين في البشرة.
- التعرض لأشعة الشمس لفترات طويلة من غير استخدام صن بلوك، فبالتالي بيحصل على صبغة الميلانين وتسبب تغير البشرة.
علاج كلف الحمل
بالرغم من إن كلف الحمل أمر طبيعي وممكن يختفي لوحده في فترة الرضاعة، لكن هناك بعض الحالات اللي للأسف الشديد كلف الحمل ممكن يستمر لمدة طويلة.. ودي بعض العلاجات الطبيعية اللي ممكن تقلل منه:
تقشير البشرة
تقشير البشرة بيساعد على التخلص من الجلد الميت والبقع السمرا، ممكن تعملي ماسكات تقشير من الشوفان المطحون أو اللوز المطحون مع اللبن والعسل واخلطيه لحد ما توصلي لقوام العجينة وتحطيه على مناطق الكلف وتستخميه زي الماسك كذا مرة في الأسبوع.
ماسك الألوفيرا الطبيعي
الألوفيرا بتقلل من البقع السمرا في البشرة وتجدد الخلايا، ممكن تستخدمي أوراق الألوفيرا الطبيعية عشان تستخرجي منها جل الصبار أو تشتري الألوفيرا الطبيعي من محلات مستلزمات التجميل أو العطارة وتحطيه على المناطق اللي فيها الكلف فترة قصيرة وتشطفيه كويس.
الوقاية من كلف الحمل
- إستخدام الصن بلوك وقت الخروج من البيت والتعرض للشمس.
- استخدمي غسول البشرة المقشر للبشرة عشان تجددي خلايا بشرتك وترطبيها.
- البسي نضارة شمس عشان تقللي من ظهورها عند منطقة العين.
كلف الحمل ظاهرة طبيعية بتتعرض ليها كل حامل. حبي بشرتك وحبي نفسك ومتخليش أي تعليق يؤثر عليكي، إنتي بطلة وأحلى أم.
المصدر: Dailymedicalinformation
التعليق باستخدام حساب فيس بوك