بعد بداية رمضان، وبداية مسلسلات رمضان وبرامجه، سمعنا كلنا أغنية “اللي قادرة” لآمال ماهر على كليب بيجمع لقطات تمثيلية من مسلسل “ليه لأ” اللي لسه ما حدش شافه، لأن لسه مقرر عرضه في النص التاني من رمضان، يعني على بعد ساعات. كلمات الأغنية فيها تصميم كبير وتحدي. هنسيبكم دلوقتي تقروا الكلمات وتسمعوا الأغنية ونتكلم عنها بعد ما تسمعوها.
كلمات أغنية “اللي قادرة”
اللي قادرة ع التحدي وع المواجهة
واللي قادرة في خوفها تعلن احتجاجها
تبقى هي دي الأحق إنها تقول ألف لأ
لو لقت أيامها مش ماشية بمزاجها
اللي رافضة وجودها يبقى سد خانة
وتسيب حد يعاملها باستهانة
صعب تتحاوط بسور، سهل لو تغضب تثور
كبريائها مانعها تعمل دور الجبانة
عافية ذوق، طول ما أنا صاحبة حقوق، مش هابان مكسورة ولا دايمًا ضعيفة
عافية ذوق، شايفة إن مكاني فوق واللي عاشت ملكة، مش هتعيش وصيفة
مش هاحايل قلب شايفاه مش عايزني
مش هاخلّي دموعي تنزل غير بإذني
مش هاعيش غير ليّا بس
مش هيسكت ليّا حِس
مش هابطل ضحك حتى في عز حزني
عافية ذوق، طول ما أنا صاحبة حقوق، مش هابان مكسورة ولا دايمًا ضعيفة
عافية ذوق، شايفة إن مكاني فوق واللي عاشت ملكة، مش هتعيش وصيفة
بعد سماع ناس كتير للأغنية، ونبرة التحدي والتصميم اللي فيها خصوصًا مع مشاهد تحرر أمينة خليل من قيود الجواز والعيلة ودخولها في حياة مستقلة وشغل، أشادوا بالأغنية. عدد كبير منهم كانوا شابات نفسهم يتحرروا هم كمان من فكرة الجواز، طبعًا احنا كأمهات مش ضد الجواز لكن ضد إن الست يكون حياتها كلها متمحورة حوالين الجواز ووجود راجل في حياتها.
أما ناس تانية كتير برضه غضبوا جدًا من الأغنية وشافوا إنها تحريض لكل عروسة على إنها تسيب فرحها وعريسها وتسيب أهلها. والحقيقة إننا لسه أصلًا ما نعرفش إيه اللي اضطر البطلة في المسلسل إنها تسيب الفرح والعريس في المسلسل لأننا لسه ما شفناش المسلسل. وعشان كده، كلنا مستنيين المسلسل على أحر من الجمر عشان نفهم يا ترى أمينة خليل عملت كده ليه عشان نقدر نحكم بفهم.
التعليق باستخدام حساب فيس بوك