“أغسل غسيلي ولا فيش مثيلي”
بصرف النظر عن ستايل زوزو نبيل في ألف ليلة وليلة ده، احنا كستات بنواجه مشكلة حقيقية في موضوع إزالة البقع من الملابس. وخصوصًا إن أنواعها مختلفة جدًا، وبالتالي التعامل معاها ومعالجتها بدون الإضرار بنسيج الملابس أو ألوانها بيشكل لنا تحدي حقيقي. وعلشان أنا شريكة معاكم في الكفاح ده، قررت أجرب كل طريقة بنفسي علشان أتأكد إنها فعالة. ولأن الموضوع مش سهل، جبت لك مجموعة نصائح لو اتبعتيها، هتعرفي تتعاملي مع البقع بسهولة أكبر. تعالي أقول لك إيه هي.
نصائح لكيفية إزالة البقع
- حاولي تتعاملي مع البقعة بأسرع وقت ممكن. كل ما تعاملتي معاها بسرعة، كل ما كانت إزالتها أسهل. بس ده لا ينفي إن فيه طرق لإزالة البقع القديمة من الملابس.
- قبل ما تأخدي خطوة نقع الملابس، استخدمي أساليب علاج البقع المختلفة. ده بيسهل جدًا التخلص منها.
- بعد ما تاخدي خطوات إزالة البقع، وتشغلي الغسالة، وقّفي خطوة التجفيف، لحد ما تتأكدي إن البقعة تمت إزالتها. لو لقيتي إن لسه لها أثر، عيدي خطوات إزالتها لحد ما تختفي، وبعد كده، خدي خطوة التجفيف.
بعد ما عرفنا النصائح دي، تعالي نعرف إيه أنواع البقع اللي بتصيب الملابس وكيفية علاجها. كل نوع لوحده.
أنواع البقع وكيفية علاجها
- بقع الحبر:
غالبًا ده أكتر نوع بقع بتواجهيها في ملابس زوجك أو أولادك اللي في المدرسة. والتخلص منها يعتبر تحدي حقيقي، إنك ازاي تشيلي الحبر من غير ما لون القميص أو النسيج يبوظ. علشان كده، هاقول لك طريقتين لإزالة الحبر السائل، وطريقة لإزالة الحبر الجاف.
الطريقة الأولى
- استخدمي اسفنجة في عمل إطار حول بقعة الحبر بالكحول أو مسحوق غسيل سائل.
- حطي تحت البقعة ورق مناديل من النوع سريع الامتصاص وابتدي رشي كحول أو سائل الغسيل على البقعة مباشرة. هتلاقي ورق المناديل بيمتص الحبر.
- استمري في تغيير المناديل كل ما يمتص لحد ما البقعة تختفي. وبعد كده، اغسليها بالطريقة المعتادة.
الطريقة التانية لـ إزالة البقع من النوع ده
في الطريقة دي، هتستخدمي نفس مكونات الطريقة الأولى. بس الفرق إنه بدل مناديل الورق، هتستخدمي برطمان، عن طريق إنك بعد ما تحاوطي البقعة بالكحول أو سائل الغسيل، توجهى البقعة على فتحة البرطمان، وتبتدي ترشي الكحول. هتلاقي البقعة بتقع في قلب البرطمان. وبعد كده، اغسلي كالمعتاد.
طريقة إزالة الحبر الجاف: استخدمي ديتول (أو مطهر مماثل) مع فرشة أسنان، قبل ما تغسلي كالمعتاد.
- بقع الشحوم والزيوت
أنواع بقع الشحوم والزيوت بتنقسم لبقع خفيفة، وبقع تقيلة أو صعبة. الحالتين كل واحدة فيهم لها طريقة تعامل مختلفة. تعالي أقول لك هم إيه:
بقع شحوم خفيفة: التعامل معاها سهل. قبل ما تغسلي بالشكل المعتاد، استخدمي مسحوق الغسيل على البقعة، أو حتى صابون اليد. واغسليها بشكل يدوي، وبعد كده، اغسليها بالشكل المعتاد. هتلاقي البقعة راحت بسهولة.
بقع شحوم ثقيلة: هتسخدمي مسحوق غسيلك المعتاد على البقعة وتغسليها يدوي. لكن من غير ما تشطفيها بالمياه. لكن نشفيها بورق مناديل، وكرري لحد ما البقعة تختفي. وبعد كده، اشطفي مكان البقعة كويس وسيبيها تنشف، وبعدها اغسليها كالمعتاد.
- بقع الدم
بينقسم لنوعين: بقعة دم حديثة، وكل اللي هتحتاجي له إنك تشطفي مكان البقعة بمياه باردة فقط لحد ما تختفي، وبعد كده تتغسل بالشكل المعتاد. وفيه بقع الدم القديمة. وهتحتاجي تنقعي النسيج في مياه سخنة مع ديتول، لحد ما البقعة تتفكك وتقدري ساعتها تغسليها في الغسالة بالشكل المعتاد.
- بقع الشوكولاتة
أ. بمجرد ما تحصل البقعة، حاولي تشيلي كمية الشوكولاتة الزيادة، عن طريق فرك القماش بمنديل بشكل خفيف علشان البقعة ما تنتشرش.
ب. لما ترجعي البيت، انقعي القميص في مياه باردة
ج. بعد كده، استخدمي مسحوق غسيلك العادي، بس افركيه على البقعة. وبعدها، اغسليه بالشكل الاعتيادي.
بمناسبة الشوكولاتة، اعرفي من هنا وصفات حلويات باردة سهلة وسريعة.
- بقع القهوة والشاي
أ. انقعي البقعة في مياه باردة
ب. افركي البقعة بمسحوق غسيل سائل واشطفيه تمامًا
ج. اغسليه بالشكل المعتاد وهتلاقي البقعة راحت
- بقع مستحضرات التجميل وأحمر الشفاه
من أصعب البقع اللي بتواجهك خلال الغسيل. بس أسهل طريقة تعامل هي استخدام صابونة اليد. اغسلي البقعة بشكل يدوي بصابونة اليد، وبعد كده، اشطفيها بالماء كويس، وبعد كده، اغسليها بالطريقة المعتادة، هتختفي البقعة.
- بقع الآيس كريم
استخدمي ديتول (أو أي مطهر مماثل)، وانقعي البقعة فيه لمدة لا تقل عن 30 دقيقة. اغسلي في مياه دافية بشكل اعتيادي، هتلاقي البقعة راحت.
استعرضنا أكتر البقع المعتادة اللي بتواجه أغلبنا خلال غسيل الملابس. أتمنى أكون قدرت أساعدك وأقدم لك الطرق العملية اللي تخلصك من المشكلة دي. جربي الطرق دي، وعرفينا جابت نتيجة معاكي زي ما جابت معايا ولا لأ.
التعليق باستخدام حساب فيس بوك