الرجوع للمدرسة السنة دي مشاعره مختلفة لنا ولولادنا. آه متحمسين عشان يرجعوا يمارسوا حياة شبه الطبيعية لكن الخوف والتوتر غالب علينا ويمكن عليهم كمان. والكام شهر اللي فاتوا سابوا أثر كبير على أطفال كتير، بتختلف درجته حسب شخصية كل طفل والظروف حواليه واللي شافه خلال الشهور اللي فاتت. عشان كده، مهم نكون فاهمين إن شكل الرجوع للمدرسة السنة دي محتاج مننا تحضير نفسي للولاد ونتأكد إنهم فعلًا جاهزين ومتطمنين.
الاستعداد النفسي للأطفال قبل المدرسة
- مهم أول كام يوم في المدرسة، نتقبل فكرة إن فيه أطفال مش متعودة، وهتكون قلقانة ومتوترة من فكرة النزول والاختلاط. ده عادي، وهيبان على سلوكهم زي عصبية أو عياط كتير مثلًا. زينا بالظبط لما بدأنا نرجع شغلنا بعد كام شهر في البيت بسبب الكورونا، كنا متوترين لحد ما بدأنا نتعود. عشان كده، ولادنا محتاجين مننا إنهم يشوفونا positive ومتحمسين وما نبيّنش قلقنا قدامهم، عشان ده مراية ليهم. ونشجعهم يتكلموا على اللي حاسين بيه وندوّر معاهم على حلول ونطمنهم.
- لازم نهيأهم نفسيًا كمان إن شكل المدرسة الجديد السنة دي وإن ممكن ما يبقاش فيه بريك أو أي إجراءات تانية. نعمل معاهم أنشطة ونسأل بعض كل واحد متوقع إيه /حاسين بإيه /يومنا هيكون ازاي لو فيه أونلاين /نمثل معاهم اليوم /نتعاطف معاهم لما يعترضوا على شكل يوم المدرسة الجديد /ندور معاهم على بدايل مناسبة.
- محتاجين كمان ندرّبهم على وسائل الامان من غير توتر مننا أو جمل تخوفهم. ونتخيل السيناريو في الكلاس ونمثله سوا لو لقينا اللي حوالينا مش ملتزمين هنعمل إيه؟ /هنسلم على أصحابنا ازاي /هنحافظ على مسافة ازاي بيننا وبين أصحابنا.
- ممكن كمان نكتب لهم notes في اللانش بوكس زي ما بنكتب لهم كلمات تشجيع وحب، نكتب تحتها إنهم يغسلوا إيديهم ويحافظوا على لبس الـface shield
- واحنا بنحضّر حاجة المدرسة، نلزق استيكر باسمهم على الفيس شيلد من فوق، ونحضّره مع حاجة المدرسة الجديدة أو شخصية كارتون بيحبوها. المهم يحسوا الـface shield مش حاجة عايزين يخلصوا منها. الماسك نحاول يبقى شكله لذيذ ومعمول عشانهم بديزاين بيحبوه.
أول فترة هتبقي مش سهلة على أطفال كتير اتأثروا باللي سمعوه واللي حسوه الشهور اللي فاتت. لكن بدعمنا لهم وتقبلنا لمشاعرهم وتشجيعهم إنهم يتكلموا ويعبروا عن اللي حاسّينه، هيتغلبوا على القلق اللي اتسببت فيه الشهور اللي فاتت وهيرجعوا يتعودوا ويتبسطوا بوجودهم في المدرسة. ورجّعوهم لحياتهم حتى لو بشكل جديد.
What’s your Reaction?
التعليق باستخدام حساب فيس بوك