محتويات المقال
كلنا عارفين هذا الرجل اللي ما بيبطلش بص يمين وشمال على أي ست معدية. لكن هتبقى مشكلة إن الرجل ده يبقى حبيبك أو خطيبك أو جوزك. الموضوع عامل زي ما تكوني قاعدة على بوتوجاز طول الوقت، فيه إحساس بياكل قلبك من جوا ومش عارفة تعملي إيه. هنا، هاحاول أقول لك تعملي إيه، يمكن نقدر نلاقي حل للزوج أبو عين زايغة أو زي ما بنقول عليه برضه الرجل البصباص بسلامته.
أولًا الفهم: افهمي دوافع الرجل البصباص
طبعًا غالبًا الخطوة الجميلة دي بتتنسي أصلًا. لإنك أول ما بتلاقيه بيعمل كده، إما بتتخانقي معاه، أو بتتهمي نفسك إنك مش مالية عينه. في الحالتين، هنكون استعجلنا الخطوة، الفهم هيخليكي أهدا وتقدري تتعاملي بشكل ألذ وأبرد. (أيوة أبرد عشان انتي اللي النار هتؤذيكي أول واحدة). طب أفهم إيه؟ هو عينه زايغة! أيوة افهمي بجد عينه زايغة ليه. هل هو بيحب اللبس؟ هل بتلاحظي إنه بيتفرج عليكي وانتي خارجة عشان يشوف لبسك، أو بيبص عليكي في البروفة في محلات اللبس؟ يمكن يكون فعلًا بيلفت نظره ستايل معين أو هو عمومًا بيحب الموضة. طب فرضنا إنه مش بتاع موضة خالص؟ هاديكي كذا سبب تاني.
- الميكب ملفت (لو كل اللي بيبص عليهم بيحطوا ميكب).
- هي\هم معاه في الشغل دايمًا.
- كبر في السن (أزمة منتصف العمر)، وعايز يثبت لنفسه إنه لسه مرغوب فيه.
- من غير أي سبب غير إنه فعلا بصباص!
فاشونيستا
كل حالة ولها دخلتها. لو فعلًا بيبص على بنات أو ستات كلهم فيهم نفس الحاجة، يبقى الحاجة دي هي اللي بتشده مش الستات: ستايل اللبس\المكياج\نوع البرفان\الروج. وده سهل جدًا تكلميه وتحلي معاه لإنه مش الستات هي مشكلته.
موضة ألوان شتاء 2022 .. “جاهزة يا حجّة”
بيعاكس زميلته
النوع التاني، اللي بيبصبص لزميلاته في الشغل أو بيعاكسهم أو بتلاقي رسايل سخيفة كده رايحة وجاية بينه وبينها أو بينه وبينهم. ده مشكلته إن الوقت كل ما يطول بينه وبين حد بياخد عليه. والحل إنك تتواصلي معاه طول فترة وجوده في البيت. ما تخليهوش يمسك الموبايل من غير ما تشاوري على الموبايل. يعني بلاش “سيب اللي في إيدك ده وكلمني”. لا أبسط من كده، اقعدي جنبه وكلي دماغه، شغلي فيلم تتفقوا عليه واعملوا فشار. اخرجي معاه في الويك إند. ما دام نوع الحب بتاعه هو تقضية الوقت ما تسيبي لهوش وقت برا الشغل يكلمها فيه. الخطوة اللي بعد دي، إنك تكلميه عن الوقت اللي جوا الشغل لو لاحظتي إن الموضوع لسه مستمر.
أزمة منتصف العمر
دي أزمة بتحصل لكل الناس لما يبدؤوا في الأربعين، ساعات في النص التاني من الأربعين. وساعات عند الستات بتبقى مع انقطاع الدورة الشهرية. الوقت اللي بيفوق فيه الشخص ويلاقي نفسه كبر: “بابص لروحي فجأة، لقيتني كبرت فجأة، تعبت من المفاجأة” بجد والله. دي بتكون مشكلة عند الرجالة أكتر لأسباب كتير مش موضعها هنا. المشكلة هنا إنها بتسبب إحساس كده بإن يالهوي أنا كبرت خلاص؟ يعني ما ينفعش أحب واتحب\شكلي اتغير\شعري ابيض. ودي تجلياتها بتبقى مش بس البصبصة وزوغان العين، دي بتبقى كمان في مظهر الرجل عمومًا. صبغ شعره، ابتدا يلبس حاجات كاجوال أكتر، أو غير ستايل لبسه عمومًا. ده حله إيه؟ التواصل والصبر. لازم تتواصلي معاه وتتكلموا. ويفضل إنك تصبري، لإنها حاجة كده كده مؤقتة. لكن لو مش قادرة تصبري، ما تصبريش واطلبي بشكل واضح إن السلوكيات الغريبة تبطل. وممكن تشوفوا أخصائية علاقات تقدر تساعدكم.
هو بصباص من غير سبب
بصي يا ست الكل، غالبًا ده بيبان من قبل الجواز، بس لو استمريتي في العلاقة وخلاص دلوقتي مش قادرة تتحملي، فيه حلول. طبعًا أول حل التواصل! كلميه، قولي له إنك متضايقة، اشرحي له الإحساس اللي بتحسيه بالظبط. حطيه في الإحساس ده بالكلام: قولي له لو لقيتني بابص على راجل تاني بنفس الطريقة بتاعتك هتعمل إيه؟ هتحس إيه؟ اسأليه عايز إيه من ورا كل البصبصة دي؟ بس خدي بالك من حاجة: بلاش تقولي له انت خاين. ليه؟ عشان هيروح يخونك. بالبساطة دي. لو هو بصباص، هو مش هيبقى شايف نفسه خاين، هو شايف نفسه راجل نِفسه حلوة، وعينه بتروح للجمال “والله جميل يحب الجمال” زي ما هيبرر لك. لكن هو في الآخر ما بياخدش خطوة بعد البصبصة والمعاكسة. اتهامك له إنه خاين، هيخليه يقول طب يعني أنا مش باخونها وهي بتقول إني باخونها؟ طب هاخونها بجد! فما تروحيش السكة دي. قرري انتي عايزة إيه، قرري إذا كانت البصبصة حاجة تقدري تعيشي معاها ولا لا. وبلغيه بقرارك وروحوا لاستشاري علاقات زوجية.
أتمنى لك حياة سعيدة من غير قلق وشكوك وغيرة.
التعليق باستخدام حساب فيس بوك