شهر رمضان له سحر خاص، مش بس في الأكل والأجواء الاجتماعية، لكن الأهم هي الأجواء الروحانية، لإنه شهر عزيز بييجي مرة في السنة، ولازم نطلع منه بأكبر غنائم دينية، ومن أجمل العبادات اللي ممكن تُمارس في رمضان، هي صلاة التراويح، ولكن مع انتشار فيروس كورونا في السنتين اللي فاتوا، الجوامع اتقفلت علشان الحد من انتشار العدوى، ودلوقتي رجعت فتحت بس مش كلها فيها مصليات للنساء، والوقت المفتوحة فيه مش طويل زي زمان، ده غير إن الأمهات مش دايمًا بيقدروا يروحوا المسجد مع أطفالهم، فهل ده معناه إن الأم تتحرم من صلاة التراويح. طبعًا لا، لإنها تقدر تصليها في البيت، ودلوقتي هنقولك على كل حاجة تخص صلاة التراويح في البيت:
-
إيه هي صلاة التراويح؟
صلاة في شهر رمضان، بيبدأ وقتها من بعد صلاة العشاء، لحد قبل أذان الفجر، وهي من النوافل مش فرض، يعني تاخدي أجر وثواب لو صليتيها، ولو ماقدرتيش تصليها متاخديش ذنب.
-
صلاة التراويح كام ركعة؟
بتبدأ من أول ركعتين، لحد عشرين ركعة وأكتر لو قدرتي تزودي.
إمتى ابدأ تعليم صلاة التراويح للأطفال
-
كيفية صلاة التراويح
عدد الركعات بيكون متقسم إنك تصلي ركعتين وتسلمي، وتقومي تبدأي ركعتين تاني وهكذا لحد ما تخلصي عدد الركعات اللي انتي عاوزاه، وتقدري ترتاحي ما بين كل ركعتين، أو كل أربعة، أو تصليهم كلهم ورا بعض، على حسب وقتك وطاقتك ومقدرتك، وبعد ما تخلصي عدد زوجي من الركعات، تقومي تصلي ركعة وتر لوحدها، أو أي عدد فردي من ركعات الوتر.
-
أقرأ قد إيه في صلاة التراويح؟
ده بيرجع لمقدرتك انتي، تقدري تصلي في الركعة الواحدة بالفاتحة والكوثر، أو بالفاتحة وسورة البقرة، أو الفاتحة وما تيسر ليكي من آيات القرآن.
-
هل ينفع اقرأ من المصحف في صلاة التراويح؟
ينفع، ولو حافظة من القرآن، فدي فرصتك للمراجعة والتسميع.
-
بتعب وأنا بصلي التراويح، ينفع أقعد؟
الوقوف مش فرض في صلاة النوافل، لكنه أجره مضاعف عن الجلوس، لكن لو الواحد عنده عذر قوي يخليه مايقدرش يقف، فأجره زي أجر الوقوف في الصلاة إن شاء الله.
التعليق باستخدام حساب فيس بوك