دايمًا تفكير الأم بيكون على اللانش بوكس بتاع أولادها، ومش بتدّي الاهتمام اللي تستحقه لنفسها في الشغل، ولو مش بتشتغل، مش بتدي الاهتمام اللي تستحقه لفطارها. علشان كده، هنا هنكلمك عن لانش بوكس الأم العاملة .. أيوة وهقول لك على 5 أفكار سندوتشات سريع و وغير تقليدية علشان تعملي أجمد لانش بوكس ليكي .. وهتكون حلوة جدًا لو عملتيها لأولادك كمان.
أفكار لانش بوكس الأم العاملة
- ساندوتش تركي مدخن
- زبدة الفول السوداني مع المربى
- سلطة المكرونة
- فطائر محشية بطاطس ولحمة مفرومة
- بيض كوردن بلو
ساندوتش تركي مدخن
من المفضلين عندي واللي سهل جدًا تنفيذه، باحب أختار عيش بني وخصوصًا عيش بني بالسبع حبوب، واحط طبقة خفيفة مايونيز وشريحة تركي مع شريحة جبنة جودة وخس مغسول وناشف، وبعد كده، طبقة تركي وعليها توست مدهون مايونيز خفيف. تقدري على فكرة تستبدلي العيش التوست بعيش تورتيلا لو بتحبي العيش يكون رول.
زبدة الفول السوداني مع المربى
ساندوتش لطيف جدًا وسهل. اختاري نوع العيش اللي بتفضليه، عن نفسي، باحب أجيب زبدة الفول السوداني التشانكي علشان احس بقرمشة السوداني. وباختار مربى فراولة كريمي أو مشمش، بادهن طبقة من زبدة الفول السوداني وعليها طبقة مربى خفيفة، واستمتعي بأحلى ساندوتش من حيث الطعم، وكمان بيوفر لك طاقة عالية جدًا.
سلطة المكرونة
هي صحيح مش ساندوتش بس فيها كل عناصره، فكرتها سهلة جدًا: إنك تسلقي شوية مكرونة وشوية خضار مشكل وتشوي قطعتين بانيه على الجريل هتحطيهم في اللانش بوكس جنب بعض واستخدمي مايونيز اللي في الأكياس الصغيرة ده، لما تيجي تاكلي، قلبيهم مع بعض واستمتعي، على فكرة ممكن تضيفي لطبق المكرونة ده درة صفرا وشوية مشروم لو تحبي تضيفي قيمة غذائية زيادة.
فطائر محشية بطاطس ولحمة مفرومة
دي من البدائل السهلة جدًا للساندويتش وانتي هتحبيها وأولادك كمان. لو بتحبي تخبزي، فأسهل عجينة هتكون عجينة البيتزا وتكوني مجهزة الحشو عبارة عن لحمة مفرومة متعصجة مع بطاطس مسلوقة مهروسة. وتتبليها بالشكل اللي يعجبك وتقدري تضيفي فلفل ألوان وشرائح زيتون، وهتقسمي العجينة دواير وتحشيها وتقفليها نص دايرة وتخبزيها. ولو مش عايزة تدخلي في جزئية العجن، تقدري تشتري عجين جاهز من أي مخبز بالكيلو وتختاري يكون عجين بيتزا أو عجين عيش فينو.
بيض كوردن بلو
ده شكل من أشكال البيض الأومليت بس لما بيستوي بنحشيه ونلفه كأنه كوردن بلو، بكل بساطة هتقلبي من بيضتين لتلاتة مع شوية ملح وفلفل وزعتر (ولو عندك كريمة طبخ) وسيبيه يستوي على نار هادية. وبعد ما يستوي، ضيفي شريحة من أي نوع لحمة مدخن مفضل ليكي مع بشر جبنة سواء شيدر أو موتزاريلا. وبعد كده، لفيه بشكل رول أو استخدمي عيش التورتيلا ولفيهم مع بعض جنبه شوية زيتون وخيار مخلل وكابوتشي أو خس.
أتمنى الأفكار دي تكون عجبتك وتقدري تدخلي منها تنوع على اللانش بوكس بتاعك أو عمومًا وجبة الفطار اللي هي فعلًا الوجبة الأساسية في اليوم واللي بتديكي الطاقة اللي محتاجة لها طول اليوم.
التعليق باستخدام حساب فيس بوك