اللون الأسود من الألوان الجريئة اللي مش كل الناس بتتفق عليها، ناس كتير بتعتبره لون كئيب ومش بيفضلوا يستخدموه وناس كتير بتعتبره لون الفخامة والرقي وبيستخدموه في ديكور البيت زي ألوان الحيطان والستاير ولون العفش كمان.. في الموضوع ده هنعرفك إزاي تستخدمي اللون الأسود في ديكور البيت وكمان هنديكي شوية نصايح قبل ما تختاري اللون الأسود في ديكور البيت..
- لو إنتي بتجددي في ديكور بيتك حددي المكان اللي حابة تستخدمي فيه اللون الأسود سواء هتستخدميه كلون حيطة في الغرفة كاملة أو جزء منها.
- اللون الأسود لو إتعمل لون حيطة في غرفة كاملة ممكن يدي إحساس إن الغرفة ضيقة عشان كده يفضل إن المكان يكون واسع لو هتدهني الغرفة كلها باللون الأسود وكمان تراعي إن ديكور المكان والمفروشات تكون فاتحة عشان يكون المنظر مريح للعين.
- لو المكان مش واسع ممكن تدهني حيطة واحدة بس وتعملي تناسق مع لون تاني زي الأبيض أو الرمادي وتخلي الحيطة مقلمة.
- الستاير السودا بتدي رقي للمكان بس لازم يبقى فيه مراعاة للون الحيطة وعفش المكان وتكون الألوان متناسقة مع بعضها.
- لازم تاخدي في إلاعتبار إن اللون الأسود للأسف ممكن يكون صعب في التنظيف وبيبان فيه التراب والجروح بسهولة وممكن شكله يقدم بسرعة خصوصًا لو هتختاري قماش إسود للمفروشات.
ودي شوية أفكار لإستخدام اللون الأسود في ديكور البيت
اللون الأسود كلون للحوائط
اللون الأسود في ألوان أو ورق الحائط بيبقى شكله شيك جدًا لازم يكون فيه مراعاة لألوان المفروشات والسيراميك إنها تكون فاتحة خصوصًا لو لون الحيطة كلها أسود.
اللون الأسود لغرف النوم
غرف النوم لو حابة تعمليها كلها باللون الأسود ممكن تعمليها بالدرجات الفاتحة مع الغامقة عشان ميبقاش شكلها ممل أو غامق بزيادة وتراعي تناسق الالوان في الستاير ودهانات الحوائط.
اللون الأسود في تصميم المطابخ
تصميم المطبخ باللون الأسود بيبقى شكله لطيف جدًا خصوصًا لو إخترتي سيراميك فاتح أو تصميم شيك زي الأندلسي وطبعًا تختاري معاه لون رخامة فاتح زي الأبيض أو الرمادي.
اللون الأسود في تصميم الحمام
تصميم حمام بالكامل من اللون الأسود خطوة جريئة ممكن تجملي شكله بالديكورات زي إختيار إطار مراية فضي أو أسود وتهتمي بالإضائة عشان المكان ميكونش غامق.
اللون الأسود في الستاير
ممكن تجددي ديكورات بيتك وتستخدمي اللون الأسود في ألوان الستاير كنوع من انواع التغيير عن ألوان الستاير المعتادة وبتدي شكل حلو وشيك للمكان.
لو بتحبي اللون الأسود، ممكن تنفذي فكرة زي كده فى بيتك؟
