محتويات المقال
هل تعرفي إنه الحب ليه لغات! مش العربي ولا الإنجليزي ولا الفرنساوي. لغات الحب الخمسة ببساطة هي طرق تعبير عن الحب والاهتمام ابتكرها واحد اسمه جاري تشابمان في كتابه الشهير لغات الحب الخمسة وعلى الرغم من إنه صدر سنة 1992 إلا إنه لحد دلوقتي بيساعد الأزواج على التواصل.
لغة الحب هي الحاجة إللي بتعمليها لحد وده بيخلي الشخص إللي بتتواصلي معاه أو شريك حياتك في قمة سعادته، وبيحس بالطريقة دي إنك بتحبيه فخزان الحب بيتملي عنده. كل حد فينا ليه لغة حب.. لما غيره بيتكلم معاه بيها بيحس إنه محبوب. المشكلة بتحصل لما بنحب حد إننا بنحبه بلغتنا إحنا مش بلغته هو وبنغفل تماما لغة الشخص إللي بنتعامل معاه.. إللي بيجيب نتيجة معاكي كلغة حب مش ضرورة يكون بيجيب نتيجة مع الشخص إللي بتتواصلي معاه.. فلو عايزيين نتواصل مع حد بشكل فعال ونعبر له عن حبنا محتاجين نفهم لغة الحب بتاعته..
بمجرد ما تعرفي لغة الحب لشريك حياتك أو للشخص إللي بتتواصلي معاه وتتعلميها وتعبري بيها هتكوني اكتشفتي المفتاح إللي هيخليكي تعيشي معاه علاقة مميزة جدًا…
أسباب فشل العلاقة الزوجية .. الست عايزة أب والراجل عايز ست
إيه هي لغات الحب الخمسة؟
لغة الحب الأولى: (كلمات الثناء والتشجيع) Words of affirmation
الناس إللي بتحب (كلمات الثناء والتشجيع) كلغة حب بيحبوا الكلمة الحلوة.. بيحبوا حد يقولهم (بحبك) بيحبوا الثناء والمدح بيحبوا الرسايل النصية الحميمية والتواصل على السوشيال ميديا كمان.
لغة الحب الثانية: (تكريس الوقت) Quality time
الناس إللي بيحبوا (تكريس الوقت) بيحسوا بسعادة غامرة لما يقذوا وقت خاص فيه كواليتي مع حبايبهم وبيحبوا الخروج قوي ولما بيتكلوا مع حد بيحبوه يكون منصت ومنتبه وفيه تواصل بصري في الحديث بينهم من غير ما يكونوا ماسكين تيليفون ولا بيتفرجوا على التيلفزيون!
لغة الحب الثالثة: (تبادل الهدايا) Gifts
(تبادل الهدايا) يعتبر وسية واضحة وسريعة ومباشرة للتعبير عن الحب، الناس بتحس بالحب لما يجيلهم هدية بغض النظر عن القيمة المادية للهدية دي. المهم زي ما بيقولوا “فن اختيار الهدايا” إنك تختاري هدايا الشخص بيحبها فعلا وفارقة معاه.
لغة الحب الرابعة: (الأعمال الخدمية) Acts of services
لو لغة الحب بتاعة الشخص هي (الأعمال الخدمية) بيحبو حد يعمل له خدمات تسهل عليه حياته.. حد يجيب له شوربة سخنة وهوعيان.. يساعده في مشوار.. يشتريله الطلبات.. يدفع فاتوة التيليفون..
الناس دول مؤمنين إنه الحب أفعال لا أقوال.
لغة الحب الخامسة: (الاتصال البدني) Physical touch
الناس إللي بيحبوا (الاتصال البدني) بيحبوا اللمس والطبطبة.. بيحبوا البوس والأحضان.. العلاقة الحميمية مهمة عندهم جدًا وبيعتبروها تعبير عن الحب.. بيسقبلوا الحب باللمسة..
الخلاصة:
كلنا بنحب نتحب بكل لغت الحب عادي، لكن كل واحد ليه لغة أو اتنين بيحب يستقبل بيهم الحب.. فمهم تعرفي لغة الحب بتاعة شريكك أو الشخص إللي عايزة تتواصل معاه وبرضه مفيد إنه تعرفي لغة الحب بتاعتك وتقوليها وتعلميها للقريبيين منك.
التعليق باستخدام حساب فيس بوك