لغات الحب الخمسة .. بنحب ولادنا بطريقتنا ولّا بطريقتهم

كلنا بنحب ولادنا وبنحاول نعمل اللي نقدر عليه بدافع الحب ده، بس يا ترى بنستخدم اي طريقة من طرق التعبير عن الحب وإيه هي لغات الحب الخمسة وهل احنا بنعبّر لولادنا عن حبنا باللغة اللي توصل لهم ويحسوها؟ ولّا بنعبّر عن الحب ده بلغتنا احنا، وفجأة نتفاجيء إنهم مش متأكدين من حبنا أو مش راضيين عن اللي بنقدمه لهم أو مش مكتفيين ودايمًا حاسين إن فيه حاجة ناقصة؟

عشان كده، كل طفل محتاج يتحب بطريقة معينة، يتحب بطريقته زي ما هو بيحب اللي حواليه. في مقال النهارده، بناءً على كلام الكاتب الأمريكي جاري تشابمان في كتاب The Five Love Language of Children، هنعرف لغات الحب الخمسة وازاي نتعرف على لغة الحب الخاصة بولادنا، لإن الطفل اللي بيحس إنه محبوب بجد هو الطفل اللي بيقدر يطلّع أحسن ما عنده.

لغات الحب الخمسة

1. لغة التلامس الجسدي Physical Touch
2. لغة كلمات الحب Words of Affirmation
3. لغة الهدايا  Receiving Gifts
4. لغة الوقت الخاص  Quality Time
5. لغة تقديم الخدمات  Acts of Service

• لغة التلامس الجسدي Physical Touch

واحدة من طرق التعبير عن الحب هي لغة الطفل اللي بيحب الأحضان والبوس الكتير وتلاقيه دايمًا قاعد في حضنك، يطبطب على شعرك أو يمسك إيدك وهو قاعد سرحان، وهو الطفل برضه اللي بيحب اللعب اللي بالإيدين زي الزغزغة مثلًا.

• لغة كلمات الحب Words of Affirmation

لغة الحب دي بتعتمد على تشجيع الطفل بالكلام، والتركيز إن توجيهنا له يكون بإيجابية والمدح للحاجات والإنجازات اللي بيعملها مش مدح الطفل نفسه زي “انت أشطر واحد”، ومهم إنه ما يكونش عمال على بطال وما يكونش مدح أو شكر على حاجة مش حقيقية أو مجاملة تخلّي الطفل يتنفخ على الفاضي أو يستني طول الوقت التقدير من اللي حواليه.

• لغة الهدايا  Receiving Gifts

وهنا مش مقصود المعنى الحرفي للهدايا إننا عشان ولادنا يحسّوا بحبنا يبقى مطلوب مننا طول الوقت نشتري في كل حاجة يطلبوها أحسن يفتكرونا مش بنحبهم مثلًا!

لكن المقصود هو التركيز في الحاجات الصغيرة اللي بيحبوها ومفاجئتهم بيها زي مثلًا إني أجيب لبنتي ستيكر أصفر عشان عارفة إنها بتحب اللون ده، أكتب لابني رسالة صغيرة في اللانش بوكس بتاعه وجنبها رسمة شخصية كارتون بيحبها. فأنا هنا هاديته بحاجة بسيطة وفرّحته بإني مركزة في تفاصيل صغيرة بتفرق معاه.

• لغة الوقت الخاص  Quality Time

وده بقى من أكتر لغات الحب اللي أنا شخصيًا باحبها وبانصح بيها الأمهات دايمًا في التعبير عن الحب للأطفال، وهي الوقت الخاص اللي بنقضيه مع الطفل بتركيز وبتكريس الوقت ده له بس، بيوصّل للطفل رسالة إنه مهم عند أهله وبيقوّي العلاقة بيننا جدًا، فكمان الأطفال اللي لغة الحب بتاعها هي الوقت بتلاقيهم دايمًا يطلبوا تلعبوا معاهم أو تشاركوهم اللي بيعملوه، وبيزعلوا قوي لو مسكنا الموبايل أو انشغلنا عنهم في الوقت ده، فهي من الآخر قعدة حلوة نقعدها معاهم واحنا مبسوطين.

• لغة تقديم الخدمات  Acts of Service

من لغات الحب الخمسة كمان إن الطفل بيحس بحبك له طول ما انتي بتساعديه وتدعميه في اللي مطلوب منه، وهنا برضه مش مقصود بيها الدلع الزيادة أو عدم تحمل المسؤولية، لكن لو عرفتي إن طفلك ده لغة التعبير عن الحب بتاعته، فممكن تركزي دايمًا في كلامك على النقطة دي زي “أنا عملت لك النهارده المكرونة اللي انت بتحبها” أو “أنا حبيت أساعدك فروّقت الأوضة بتاعتك وإنت مش موجود” فدي حاجات ممكن كده كده تكوني بتعمليها، لكن لما تعمليها وانتي مبيّنة إنها بدافع الحب هتوصل لهم.

وعشان تعرفي لغة الحب الخاصة بولادك، شوفي هم بيحبوا يعبروا للي حواليهم عن الحب ده ازاي، وفيه كمان الاختبار ده ممكن تساعدوهم يعملوه أونلاين وتشوفوا سوا ترتيب لغات الحب بتاعتهم وفرصة تشرحوا لهم الفكرة وتتكلموا كل حد فيكم بيحب يتحب ازاي.

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.