لكل أب عنده بنت الكلام ده عشانك

البنات هم فاكهة البيت واللي بيحلّوا الحياة وعلى قد حلاوتهم على قد ما تربيتهم صعبة ومحتاجة تركيز في تفاصيل كتير. وطبعًا البنت حبيبة باباها وأقرب وأهم أنثى لقلبه. في المقال ده، هاقول لكل أب شوية حاجات محتاج تعملها مع بنتك عشان تعرف تكبّرها بنت حنونة واثقة في نفسها ومسؤولة وقوية عشان تديها جناحات تطير بيها وتواجه الدنيا وانت متطمن عليها.

• احضنها كتير وعبر لها عن حبك: حافظ على الوقت الخاص بينكم انتم الاتنين، وقت يكون كله لعب وأحضان وضحك وزغزغة. خدها في حضنك وفكّرها كل يوم إنك بتحبها وقل لها إنك موجود دايمًا جنبها حتى لو اختارت طريق مختلف عن اللي بتتمناه ليها.
• اسمعها كويس وخد رأيها: قرّب منها واحكي لها عن يومك ومشاكلك واسمع منها اللي حابة تحكيه وانت مركز معاها ومن غير ما تحكم عليها. مش شرط يبقى عندك حلول لكل مشاكلها، لكن على الأقل اسمعها واديها من وقتك لأن مجرد تفاعلك معاها واهتمامك بيها هيريحها ويحسسها بالأهمية، وعوّدها إن رأيها مسموع وله قيمة.
• احترم خصوصيتها: علّمها تحافظ على مساحتها الشخصية من غير اقتحام. من وهي طفلة، خبّط على باب أوضتها قبل ما تدخل، اديها إحساس إنها مصونة ومش مباحة ومش متراقبة.
• علّمها تعبر عن مشاعرها: واتعاطف مع إحساسها وعوّدها إن المشاعر باختلافها حاجة من حقها تحس بيها وتعبر عنها بطريقة صح ومش من حق حد ينكر مشاعرها عليها ووصّل لها إنها مقبولة زي ما هي. مهما كان اللي حاسة بيها، انت بتحبها وقابلها وموجود عشانها.
• ادعمها وعلمها أهمية نجاحها وإيمانها بنفسها: وإن من حقها تحلم بطريق خاص بيها زي ما تتمني وإن مستقبلها وطموحها ونجاحها هيسندها وهيساعدها باقي حياتها.
• قل لها إنها جميلة زي ما هي: وإنها متميزة ومنفردة بشكلها، وإنها ما تسمحش لقوالب المجتمع إنها تهز ثقتها بصورتها، علمها أن ربنا خلقنا مختلفين، وإن كل الأجسام و الأشكال جميلة.
• علمها إنها مش سبب في أفعال الناس: لو حد أذاها أكد لها أنها مش السبب، لكن السبب أنه إنسان مش كويس، مش عشان هي ضعيفة أو قصرت في حاجة.
• علمها إنها غالية: وإن جسمها من حقها هي وبس وعرفها الفرق بين المقبول وغير المقبول، سواء من اللمسات أو الكلام من الناس القريبين أو الأغراب، وعلمها كمان إزاي تدافع عن جسمها وإمتي تطلب المساعدة.
• علمها تكون قوية بنفسها: ما تنقذهاش في كل المواقف وتساعدها، سيبها تتصرف وتحل مشاكلها واتدخل بس وقت اللزوم، علمها تكون صادقة ومسؤولة عن تصرفاتها وأنها مش مضطرة تكذب أيًا كان الموقف.

وأخيرا بنقول لك على قد ما هتخلّي بنتك غالية وتكون أقرب صاحب ليها، على قد ما هتكبر واثقة ومتصالحة مع نفسها وحاسة بالأمان اللي هيخليها قادرة تبقي منتجة وسعيدة.