محتويات المقال
بدأت الموجة الجديدة لفيروس الكورونا ورجع معاها التركيز تاني في إجراءات السلامة والحماية. دلوقتي ومع انتشارها بحكم دخول الشتاء اللي بيعتبر موسم طبيعي لزيادة معدلات العدوى رجع الإحتياج إن إحنا نفكر بعض نتصرف ازاي في حالة إن واحد من حبايبنا جالهم الفيروس ده. علشان كده، في المقال ده، هنوجه كلامنا للأمهات اللي هما فعلًا بيقع عليهم مسؤولية رعاية العيان اللي في البيت. ونفكرهم بشوية تصرفات تتعمل بمجرد حتى الشك إن فيه حد في البيت جاله كورونا فتعالي نفتكرها مع بعض:
لو عايزة تعرفي أكتر عن الكورونا شوفي المقالات اللي هنا.
العزل في البيت
أول ما تظهر أي عرض من أعراض الكورونا اللي بقينا كلنا تقريبا عارفينها ضروري يتم تنفيذ العزل المنزلي. ممنوع تماما النزول للعمل أو المدرسة أو حتى الانتقال بوسائل نقل عامة للحد من نشرة العدوى أو حتى التعرض المكثف للعدوى.
راقبي الأعراض بتركيز
يعني زي ارتفاع مستمر في درجات الحرارة مش بيتحسن بمخفضات الحرارة وعلى مر أيام، وضيق في التنفس من أقل مجهود أو عدم بذل أي مجهود. ساعتها لازم تلجأي للمستشفى.
الراحة
من المهم جدًا إن مريض الكورونا أو المشتبه في إصابته إنه يحصل على قدر كافي من الراحة والنوم لأن ده حرفيًا بيساعده جدًا في مقاومة المرض ده. بجانب طبعًا الحفاظ عليه رطب بمعنى ممنوع يحس بالعطش ولازم يفضل يتناول مشروبات دافية طول الوقت بمعدل كل ساعتين.
عرّفي اللي حواليكي
من المهم جدًا الإبلاغ في حالة الاشتباه أو ثبوت الإصابة إنك تعرّفي كل اللي اتعاملوا مع الحالة اللي عندك في البيت بالخبر ده علشان هما كمان ياخدوا احتياطاتهم ويتابعوا حالتهم, لأن أي تأخير ممكن يكون له أثر حقيقي خطير عليهم.
اطلبي الإسعاف
لو حصل أي تدهور في الحالة، أفضل إجراء متبع لحماية باقي أفراد الأسرة هو طلب الإسعاف, لأن هما محترفين بالشكل الكافي وعندهم الإمكانيات والقدرة على التعامل مع حالة بشكل صحيح.
تغطية الأنف والفم
مهم جدًا إن المريض يلتزم بنقطة تغطية الأنف والفم في حالة العطس أو الكحة، والسبب إن العدوى بتنتشر بسبب الرذاذ. وفي نفس الوقت إن المخالط أو المتعامل مع المريض هو كمان يغطي أنفه وفمه بكمامة طبية لحماية نفسه والتخلص منها بالطريقة الصحيحة.
غسل اليدين
كانت أول نصيحة ظهرت في العالم كله هو نقطة غسيل اليدين لمدة لاتقل عن 20 ثانية بالصابون العادي أو استخدام الكحول المخفف. نفس النصيحة دي لازم كل أفراد الأسرة يلتزموا بيها بشكل صارم في حالة وجود اشتباه إصابة أو إصابة مؤكدة في البيت.
القعدة في غرفة واحدة
اللي لازم تجهزيه وتخليه قاعدة أساسية في البيت عندك وجود غرفة واحدة بس بيقعد فيها المريض ومش بيتحرك غير في أضيق الحدود في البيت. وده بسبب السعي لحد انتشار العدوى وحتى سهولة اتباع الإجراءات المطلوبة في البيت.
ممنوع المشاركة
بمعنى إن المريض أو المشتبه في إصابته ممنوع يستخدم نفس الأدوات اللي بيستخدمها باقي أفراد الأسرة زي الأطباق والكوبايات والفوط وحتى الملايات لحد ما تعدي فترة الأسبوعين ويتعافى.
تنظيف الأسطح
كل الأسطح اللي بنقول عليها مستخدمة بكثرة زي مقابض الباب وزراير النور وكل حاجة استخدامها مشترك ومكرر بين أفراد الأسرة لازم يتم تطهرها يوميا وكذا مرة في اليوم للحد من انتشار العدوى.
صحيح كلنا قلقانين وناس بنحبها أو نعرفها جالها الفيروس بس ما تنسيش إن أغلب الناس بتخف منه وترجع كويسة. أهم حاجة نحافظ على قوتنا النفسية لأنها حقيقي عامل مساعد على الشفاء.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك