لازم نعترف إن COVID 19 أصبح ضيف تقيل لابد من وجوده والتعايش معاه لأطول وقت ممكن. ومستحيل الشغل يقف لحد ما يقرر الفيورس العظيم يسيبنا إلى غير رجعة. علشان كده كان لازم نتأقلم مع فكرة الشغل من البيت. لكن للأسف الموضوع مش بالبساطة دي.

مش حابب أتكلم هنا عن التحديات التقليدية اللي بتواجهنا في الشغل من البيت، زي عدم وجود مكان مناسب للشغل أو عدم القدرة على الفصل بين مهام البيت ومهام الشغل. لكن حابب أتكلم عن تجربة الشغل من البيت في حال وجود أطفال. بكل إللي بيطلبوه من اهتمام ورعاية وبكل المشاكل إللي ممكن تحصل.

تعالوا نشوف مع بعض شوية نصايح مفيدة بجد للأبهات في حال الشغل من البيت ووجود أطفال.

اصحى بدري!

زي ما بقول لك كده.. الصحيان بدري مش بس بيضمن إنك تعمل اللي عليك قبل أي حد تاني. ده كمان بيضمن لك بيئة هادية من دوشة الأولاد اللي بيكونوا في الغالب نايمين في الوقت ده. ناهيك أن الجهاز العصبي بيكون في أفضل حالاته لما تكون صاحي الصُبح ومش قالب نظام حياتك. خاصة لو حرصت على تناول فطار صحي وأنك تنام ٨ ساعات على الأقل في المساء.

ارسم حدود واضحة.. حط قوانين صريحة

مافيش أحسن من الوضوح في أي حاجة. حط قوانين بسيطة لكن تساعدك في نفس الوقت على إنجاز شغلك بشكل أسرع وأكثر احترافية. أقعد مع أولادك لو كانوا في سن يسمح لهم بفهم الكلام. وعرفهم أنك محتاج تركز في شغلك وده هايتطلب أنهم ما يدخلوش عليك الأوضة لما يكون الباب مقفول.

وشوفت حركة لطيفة من واحد من أصحابي ماعندوش باب للمكان اللي بيشتغل فيه في البيت. لكنه وضع يافطة مُلفتة بتنبه على الأولاد أنهم يخفضوا صوتهم لأنه بيشتغل. وبيعلقها لما يكون بيشتغل.

استعد بالمكافئات البسيطة!

لو عندك أطفال أصغر سنا ومش سهل يسمعوا الكلام العاقل.. الهدايا الصغيرة ممكن تحل المشكلة. خليك جاهز بحاجات صغيرة ولما تلاقي الأولاد هايقربوا منك وهاتحصل مشاكل اوعدعم انك هتديهالهم في نهاية اليوم..

لكن ضروري هنا أفكرك أنك ما تزودش من الحاجات الحلوة المسكرة، علشان مضار الإفراط في تناول الحلويات على الصغار… والأهم أنك ما تستهلكش انت الحلويات دي بنفسك علشان ده عرض جانبي معروف.

أنا بقترح يكون معاك حاجات تانية أفيد من الحلويات ومش مضرة زي: علبة الوان صغيرة.. صور مطبوعة للتلوين.. ستيكرات صغيرة ملونة.. علبة Bubbles.

ماتزودهاش!

إحنا في فترة صعبة. والناس كلها عارفة إن ممكن تحصل مواقف صعبة أثناء الشغل من البيت. فحاول تاخد الأمور بسلاسة.. لو بنتك دخلت عليك وإنت في أونلاين ميتنج ممكن تخليها تشاور للناس اللي معاك في الميتنج وممكن تدوس زرار الـmute. واعتذر ببساطة وعالج المشكلة بسرعة وبلمسة ساخرة وبدون ما تضيع وقت الناس اللي معاك.

باختصار.. خليك عارف أننا في وضع مش مثالي بالتالي ما تطلبش من نفسك تتصرف بمثالية وإلا ها تلاقي نفسك معلي سقف محاسبتك لنفسك بما لا يتناسب مع الشغل.

نظام المكافأت

وأخيرا.. ولو الكل سابك علشان تعمل شغلك بالشكل اللي يعجبك ويناسبك، لازم ده يعود عليهم بالنفع علشان يحبوا يكرروه تاني. والنظام ده معروف بنظام المكافأت ومتعارف عليه مش بس في التعامل بين البشر. لكن كمان في الترويج لمنتجات أو لزيادة شعبية منتج معين (زي البنوك لما بتديلك كاش باك لما تستخدم الكريدت كارد).

في نهاية كل يوم عمل لازم تخصص وقت كافي لأسرتك. تلعب مع الأولاد وتعوضهم عن الوقت اللي قعدوه من غيرك واحترموا فيه خصوصيتك في الشغل. ومهما حصل ما تتنازلش عن أنك تحكي لهم قصة قبل النوم وتاخد منهم بوسة.. في حاجات في الدنيا لا تقدر بتمن زي ما انت عارف.