محتويات المقال
تعالا نتكلم مع بعض كرجالة بصراحة.. بعد ما وصل المولود الجديد وانتهت فترة المباركات والسبوع واللذي منه. هل حسيت بشوية غيرة؟ هل حسيت أنك مابقتش رقم ١ في حياة المدام زي الأول؟ هل حسيت أن كل مجهودها بقى للطفل وأنت مابقاش لك دور؟ لو حاسس بأي حاجه من دي أحب أقولك لا تقلق.. لست وحدك!
ليه بنحس بالغيرة من الطفل الجديد؟
كتير من الرجالة بتحس بشعور الغيرة من المولود الجديد. وسألوا زوجاتهم قبل كده: هل بتحبي الطفل الجديد أكتر مني؟!
وأسباب الشعور بالغيرة كتير.. أولها هي أنك بتحس أنك مابقتش محور البيت زي زمان. والكائن الصغير الجديد أصبح بينافسك وبقوة على زعامة البيت. ومين فينا بيحب حد ينافسه على الزعامة في البيت؟ وكمان مراتك ما بقتش مهتمة بيك زي الأول ولا مركزة معاك.. واي حاجة إنت عايزها ما بقتش -غالبا- بتحصل.. خصوصا في أول كام شهر بعد ولادة البيبي.
مش بس كده.. البيبي لما بييجي بيكون معاه مجموعة من المسئوليات والتغيرات في الحياه اليومية للأب. يعني أصبح عادي تصحى من أحلى نومة علشان النونو تعبان. أو تغير مكان نومك علشان تسيب مساحة للطفل. أو تاخد بالك من تصرفاتك علشان أصبح فيه طفل في البيت ممكن يتعرض لأي مشكلة. كل دي حاجات بتحسس الأب بالغيرة.
وللأسف الشديد رد الفعل اللي بيعمله الراجل في حالات الغيرة مش بيكون صح في الغالب. كتير من الرجاله بتنعزل عن الأسرة وتلجأ للصحاب والقعدة في الكافيه. أو بيفتعل المشاكل مع مراته. أو حتى بيبدأ يقصر في واجباته ناحيه طفله. حتى لو كان ده بشكل لا شعوري.
إزاي أتأكد أن المشاعر اللي عندي مشاعر غيرة؟
وعلشان نتأكد فعلا أن المشاعر اللي عندنا مشاعر غيرة مش أي حاجه تانية، لازم نلاحظ شوية علامات مهمة، حسب تقرير نشره موقع babygaga
• لما تلاقي نفسك بتتعامل مع مراتك بتحفز صامت.. زي وقت الخلافات الزوجية. لكن المرة دي بدون وجود خلافات.. بتعمل اللي عليك لكنك ساكت معظم الوقت ومش حابب تتكلم أو تعبر عن نفسك.
• لما تحس أنك في منافسة طول الوقت علشان تثبت براعتك في العناية بالطفل الجديد. وأن الاحتياج الوحيد لك بسبب الحاجات اللي بتقدر تقدمها للطفل.
• لما تحس أن مهما حقق طفلك أو مراتك من إنجازات أنها حاجات عادية ومش محتاجه كل الاهتمام ده.
• لما تلاقي نفسك بتطلب التشجيع أو الشُكر على كل تصرف قمت بيه للطفل مهما كان بسيط أو طبيعي.
• لما تلاقي نفسك بتدور على التقدير بره البيت.. لما تقعد مع صحابك في الكافيه وعاوز تحس أنك أحسن واحد بتلعب (استيميشن). لما تحس بفخر مبالغ فيه لما تغلب صاحبك في ماتش فيفا في البلاي ستيشن بس علشان تحس أنك حققت أي انجاز والسلام.
• وأخيرا.. لما تلاقي مصاريفك لنفسك رايحه في اتجاه أنك تشتري لنفسك ألعاب (أسطوانة بلاي ستيشن مثلا) أو الحاجات اللي ماكنتش بتصرف عليها كتير قبل كده. في الحالة دي عقلك الباطن بيخليك تشتري ألعاب لنفسك زي اللي ماما بتشتريها لطفلها الجديد.
إزاي أتغلب على شعور الغيرة من طفلي الجديد؟
علشان كده جمعنا لكم شوية حاجات بسيطة تقدروا تتغلبوا بيها على شعور الغيرة، سواء من تجاربنا الشخصية أو من مقال نشره موقع Education عن الغيرة من الإباء للأبناء.
أولا: لابد من المصارحة.. لازم أعرف أن المشاعر اللي عندي مشاعر غيرة. وبلاش نسمي المشاعر دي بأي اسم تاني. لازم كمان نفهم أن ده شعور طبيعي وأن ده مش (نقص) من الراجل اللي بيحس بكده. لكنها مشكلة قابلة للحل. فحسب مقال منشور في النيويورك تايمز. كتير من الرجالة بيحسوا بأنهم غلطانين نتيجة شعورهم بالغيرة.
ثانيا: حاول تشرك نفسك في أنشطة رعاية الطفل الجديد. بلاش تعزل نفسك عن الأم والطفل. لما تدخل في أنشطة رعاية الطفل واللعب معاه هاتحس بمتعة كبيرة. وهاتحس أن الأسرة زاد فيها فرد جديد بيسبب لكم السعادة. المشاعر الإيجابية دي كلها هاتطرد مشاعر الغيرة.
ثالثا: أطلب الدعم من مراتك.. فهمها مشاعرك وألفت نظرها أنك ممكن تكون محتاج اهتمام أزيد شوية في الفترة دي. بس لازم تحط في اعتبارك أنها بتمر بتغيرات نفسية وإنسانية كبيرة بعد الولادة. ومسئولياتها وأعبائها زادت مع المولود الجديد. لكن ممكن تعملوا أنشطة جميلة مع بعض زي مشاهدة فيلم أو الخروج في نزهة قصيرة بعيد عن ملل البيت.
رابعا: مش غلط ولا عيب أنك تطلب مساعدة متخصصة ومحترفة من خبراء الدعم النفسي لو حاسس إنك محتاجها. الخبراء عارفين كويس المشاعر اللي بتمر بيها ويقدروا يساعدوا. وحتى أنهم بيساعدوا الأمهات اللي حاسين أن أزواجهم أصبحوا غيرانين من أطفالهم.
خامسا: وأخيرا.. أبني علاقتك الخاصة بإبنك.. لاعبه واستمتع بصوت ضحكه. ألقط له صور حلوة بتليفونك واعمل لها شير مع أصحابك.. أستمتع بفكرة الصديق الجديد اللي أصبح معاك.. مش منافس ليك في البيت وحب الأم.
التعليق باستخدام حساب فيس بوك