محتويات المقال
من فترة، سمعت قول مأثور قديم بيقول: “أب واحد خير من عشرة مربين”. ولما تأملت الكلام ده لقيته صح جدًا. لكن علشان يكون الأب أفضل من عشر مربين، لازم يعرف يتكلم مع ابنه في شوية موضوعات مهمة جدًا. ومهما حصل الابن على مشورة من ناس تانية، يفضل الحوار بينه وبين الأب في الموضوعات دي مهم وبيرسم شخصية الابن وطريقته في التعامل في حياته في المستقبل. تعالوا ندردش شوية عن الحاجات دي.
ليه بتروح المدرسة؟!
السؤال ده كان واحد من الأسئلة المهمة اللي كانت بتؤرقني وأنا صغير. أنا ليه مُجبر أصحى كل يوم بدري وألبس هدومي وأروح المدرسة؟ ولما أبويا كلمني عن أهمية التعليم، وإنه الطريقة الوحيدة علشان الإنسان يكون له مستقبل كويس، هاكون كذاب لو قلت إني بقيت أحب الروتين اليومي المُرهق للمدرسة. لكن على الأقل بقيت فاهم الغرض منه، وده خلاه أخف على قلبي.
الشغل وأهمية قيمة العمل
وبما إنك اتكلمت معاه عن أهمية الدراسة، ضروري تشرح لابنك أهمية العمل في حياة الإنسان. ومن الأفضل أن المدخل للموضوع ده يكون من خلال شرحك لطبيعة عملك وإزاي شغلك بيساعد في إن البيت يفضل مفتوح، وإن ابنك يتعلم تعليم كويس، ده غير الحاجات الترفيهية في حياتكم زي المصيف أو الخروج، كل الحاجات دي مرتبطة بالشغل.
مش محتاج أقول لك إن الكلام ده لازم يكون بعيد تمامًا عن “التنبيط” أو “المعايرة” لكن لازم الكلام يكون في إطار إنك بتفهمه قيمة العمل وأهمية الشغل في حياتنا.
التنمر.. وازاي يواجهه
من الحاجات اللي كتير من الآباء في جيلنا ما اتكلموش معانا عنها: التنمر. علشان كده، لازم نصلح ده ونتكلم مع أولادنا عن التنمر. في البداية، لازم نتكلم عن إيه هو التنمر وإيه صفات الشخص المتنمر. وازاي نواجه التنمر وما نكونش ضحية له. وده من خلال خلق حالة حوار مستمرة عن تفاصيل ابنك اليومية وعلاقاته الاجتماعية.
وحسب موقع kidshealth لازم كمان نتكلم مع الأبناء في إنهم ما يكونوش متنمرين. ونعلّمهم ازاي يتعاملوا بطيبة واحترام حتى مع الأضعف منهم. وحسب التقرير اللي نشره الموقع، فـلازم الأب هنا كمان يكون قدوة عملية من خلال إنه ما يتكلمش أو يتعامل وحش مع أي شخص أضعف منه.
أهمية الرياضة والاهتمام بالصحة
من المواضيع المهمة اللي هتحتاج تتكلم فيها مع ابنك، هي اهتمامه بجسمه، والاهتمام بالجسم هيكون من خلال ممارسة الرياضة بشكل منتظم، والانتباه لنوع الأكل وفترة الراحة اللي بيحصل عليها الجسم.
وفي تقرير نشره موقع verywellfamily، ينصح إن الآباء “يذاكروا” كويس الرياضة اللي بيمارسها أبنائهم، علشان نصائحهم لهم فيها ما تكونش مجرد نصائح عابرة أو تقليدية.
ومن المهم إن ابنك يفهم من خلال حوارك معاه إن الصحة دايرة مكونة من نظام غذائي صحي ورياضة مستمرة، مع فترة تأمل ونوم وراحة. وإن أي إخلال بدايرة منهم هيكون له تأثير سلبي على صحته على المدى القصير والطويل.
الالتزام بالوعود
للأسف الشديد، بنشوف قيمة الالتزام بشكل عام سواء في الوعود أو المواعيد بتقل في مجتمعنا يوم بعد يوم. ولأن تربية أبنائنا هي جزء من صناعة مجتمع جيد، فـلازم نتكلم مع أولادنا في الالتزام بالوعود والمواعيد والالتزام بصفة عامة.
ومن الضروري إننا نفهم أولادنا إن الالتزام من صفات الإنسان المحترم الناجح في حياته، لكن الأهم أن الابن يشوف الأب وهو بالفعل ملتزم في حياته، مش مجرد تعليمات بيقولها لابنه وخلاص.
الكلام في موضوعات التربية الجنسية
ولأن الأهم بييجي دايمًا في الآخر، حبيت أتكلم عن واحد من أهم الحوارات اللي لازم تكون بين الابن وأبوه. وهي الموضوعات اللي لها علاقة بالتربية الجنسية. لأن الموضوعات دي بتكون محرجة للزوجات أنهم يفتحوها مع الأبناء.
المرحلة الأولى للكلام عن الجنس مع الابن في فترة التكوين الأولى. لازم الأب يفهّم ابنه إنه مش مسموح إن حد يقرب منه بطريقة جنسية، ومش مسموح إن حد يلمسه أو يطلب منه يوريه أعضاء جسمه الخاصة. كمان لازم الابن يتعلم يسمّي المناطق الحساسة في جسمه باسمها الحقيقي مش بأسماء مستعارة.
المرحلة الثانية هي المرحلة اللي بيبدأ فيها البلوغ، وهنا لازم تحسس ابنك إنك صاحبه وإن المرحلة دي في حياته طبيعية. وإن من الطبيعي إنه يحس بمشاعر جنسية ناحية الجنس الآخر. ولازم في المرحلة دي تشرح له مصطلحات زي الاحتلام والعادة السرية وازاي يتصرف مع كل حاجة من الحاجات دي بطريقة صحيحة وبدون ما يشعر بالعار.
ومن الموضوعات المهمة اللي قريتها في تقرير منشور على موقع allprodad هي أهمية الكلام مع ابنك من بداية المراهقة على ضرورة احترام المرأة والتعامل معاها بشكل كويس. وأن النقطة دي لما تركز عليها في حوارك مع ابنك هتكون زرعت جواه قيمة مهمة جدًا.
وفي النهاية، أفتكر دايمًا إن ابنك هو المراية اللي بتنعكس فيها صورتك. وإن بالإضافة للحوار بينك وبينه، لازم تصرفاتك تعكس أقوالك معاه. علشان كده، ركز في الطريقة اللي بتتعامل بيها مع ابنك ومع الناس علشان هي دي الطريقة اللي ابنك هيتعامل بناءً عليها.
التعليق باستخدام حساب فيس بوك