محتويات المقال
تربية الأطفال حاجة مش سهلة.. فيه شوية تصرفات كدة، كتير من الآباء بيعملوها لكن مش بيكونوا عارفين إنها ممكن تدمر نفسية الطفل تعالوا نشوف مجموعة من التصرفات دي
ما تتكلمش بالنيابة عنه
من أهم العادات اللي لازم نبطلها مع أولادنا هي أننا نتكلم بالنيابة عنهم، خاصة لما حد كبير يسألهم عن حاجة معينة زي اسمهم أو سنهم أو هم في أي مرحلة دراسية. أسكت لبعض الوقت وأعطي ولادك الوقت أنهم يتكلموا عن نفسهم. ده بيزود ثقتهم بنفسهم بشكل رائع.
التقليل من حساسيته المفرطة
ساعات ابننا بيكون عنده حساسية مفرطة ناحية بعض المواقف. ودايما حاسس أن الناس كلها بتبص عليه ومستنية منه غلطه علشان يضحكوا ويتريقوا عليه. وكتير من الأهل بيزودوا الشعور ده عند ولادهم علشان يضمنوا إنهم يتصرفوا بشكل كويس قدام القرايب والضيوف. لازم نغير العادة دي لأنها هتخلي أولادنا مش مؤهلين أنهم يتحملوا المواقف المحرجة اللي ممكن تحصل لهم خلال رحلتهم في الحياة.
المساعدة الزايدة عن الحد
كتير من الأهل بيعتبر أنه لما يساعد أولاده في كل تفصيلة من تفاصيل حياتهم مهما كانت صغيرة ده نوع من الاهتمام والرعاية. لكن الصح هو أننا نتوقف عن العادة دي ونعودهم يعملوا المطلوب منهم لوحدهم منغير مساعدتنا طول ما المهمة دي في استطاعتهم ومش بتشكل عبء حقيقي عليهم.
التدخل في اختيار موهبته
إحنا فاهمين كويس إن كتير من الآباء بيكون نفسهم أولادهم يمارسوا الهواية اللي هم كانوا بيمارسوها. لكن أكتر حاجة وحشة ممكن الأب يعملها مع الأبناء هي أنه يتدخل في اختيارهم لموهبتهم ويحاول يفرض عليهم حاجه معينة هما مش عاوزينها.
الضرب
ساعات الأولاد بيعملوا تصرفات بتخلينا نخرج عن شعورنا. لكن فكرة العقاب بالضرب من الأساليب اللي لازم تختفي من علاقتنا بأولادنا، ويكون مكانها الحب والتفهم ومحاولة الإقناع والعقاب بطرق تانية تعلم أكتر بدون ما تهين.
الكلام السخيف
في مقال في موقع bestlifeonline.com حذر المقال – ضمن مجموعة نصايح تانية- بتجنب الكلام الوحش مع الأبناء زي (ياريتني ما خلفتك) أو (إنت اكبر غلطة في حياتي) كلام من النوعية دي وإن كان بعض الأهل بتقوله في ساعة غضب لكنه بيسيب أثر وحش جدا مش بيروح طول العمر تقريبا خاصة لو تكرر نفس الكلام ده.
المقارنة مع الأقران
كلام من نوعية: ابن خالتك أشطر منك. أو بنت عمتك بتسمع كلام مامتها أكتر منك. الكلام ده يبدو بسيط أو مش بيسيب أثر. لكن بيكون له أثر كبير على نفسية الأبناء وبيخلق ضغائن بينهم وبين أقرانهم.
المقارنة مع نفسك!
المقصود هنا هو المقارنة مع إنجازاتك لما كنت في نفس السن. جُمل زي (لما كنت في سنك كنت الأول على الفصل) أو (أنا لما كنت صغير بتصرف أحسن منك) ممكن تخلي أولادنا يفقدوا الثقة في نفسهم ويحسوا أن عليهم عبء كبير لازم يشيلوه من على كتافهم علشان يكونوا أشخاص أفضل.
الدلع الزايد عن الحد
وزي ما بنقول أن الشدة الزايدة عن الحد ضارة، برضو الدلع الزايد عن الحد ضار. وشعور الإبن أن الأهل (مش طايقين عليه الهوا) بيخليه أحيانا يتمارض أو يتصنع الوقوع في مشكلة علشان يلفت النظر وياخد مزايا إضافية.
الإستجابة لكل طلباته
وأخيرا. وحتى لو كانت الإمكانيات مساعدة، مش لازم كل حاجه يطلبها الابن أو البنت ياخدوها علطول. لازم يحسوا إنهم بيتحركوا ضمن ميزانية محددة مثلا للعيلة. أو ضمن مجموعة اختيارات لازم يختاروا منها. مش قصدنا أن الأولاد تكون محرومة. لكن في نفس الوقت ما تكونش مرفهة أزيد من اللازم.
المصادر
- 10 Things Parents Shouldn’t Do for Their Children
- 60 Things You Should Never, Ever Say to Your Kids
- 25 Things Parents Should Never Say to Their Kids
التعليق باستخدام حساب فيس بوك