للأمهات نصائح لتدبير ميزانية رمضان قبله بشهور

رمضان 2021 هييجي السنة دي بتاريخ 13 أبريل، وكلنا عارفين إن الاستعداد لرمضان بيبدأ قبل ما يوصل بشهور، أساسي كلنا بنشتري فانوس رمضان، بنعلق الإمساكية وزينة رمضان جوه البيت وعلى البلكونات، روح كلنا ما نقدرش نستغنى عن جمالها، بس التحدي السري اللي بتعيشه الامهات بس هو ازاي تقدر تدبر ميزانية الشهر بحيث ما تكونش عاملة ضغط مادي على الأسرة، ولو انتي عايزة تعرفي تعملي كده ازاي، شوفي النصائح دي.

نصائح تدبير ميزانية رمضان:

• ابدأي قبلها بكذا شهر:

من المهم تشتري اللي هتحتاجيه في الشهر ده قبلها بكذا شهر، وده بيحكمه كذا عامل. منها درجة حرارة الجو في الفترة دي، عندك ديب فريزر ولا لأ، إيه اللي ينفع يتخزن وإيه لأ.

• رمضان جي في الصيف ولا الشتاء:

السنة دي رمضان 2021 جاي في الربيع، وبالتالي فترة الاستعداد هتكون في الشتاء، وعلشان عمومًا ما تحتاريش، من الأفضل الاعتماد على فكرة تخزين البقوليات المفضلة لأسرتك في الشهر ده تكون معبئة في أكياس ومن مصدر موثوق. بلاش السايب اللي بالكيلو لإن فرصة إصابته بالحشرات واردة جدًا، خزّني كمية الزيت والسمن اللي بتحتاجيها عموما، فترة الشتاء أفضل وقت لتخزين الزبدة واللي ممكن تشليها كسمنة لو مساحة التخزين عندك صغيرة.

• أحط الحاجة فين:

زي ما قلت لك إن مساحة التخزين اللي متوفرة عندك بتحكم كم التدبير اللي هتقدري عليه، وجود الديب فريزر هيسهل عليكي جدًا تخزني خضروات مجمدة للطبخ السريع، والفواكه للعصائر في رمضان. لو العنصر ده غير متواجد عندك، يبقى هتعتمدي على الخضروات الموسمية المتوفرة في الأسواق وقتها، أو أكياس الخضار المجمدة من أي ماركة بتفضليها. خزني الزبدة كسمنة لو مفيش مكان تخزين عندك. فضي دولاب عندك يكون مخصص للتخزين تقدري تحطي فيه كل شهر شوية حاجات اللي بنقول عليها نواشف فيه. مهم جدًا إنك تتأكدي إن مافيش أي عدوى حشرية من سوس ممكن تبوظ لك مجهودك، يعني البقوليات والمكرونات والرز والزيوت سهل جدًا تخزينهم لمدة طويلة في المطبخ.

• جهزي قائمة الشهر وعدد العزومات:

في رمضان، من الحاجات اللي تعتبر أساسية هو الشوربات المتنوعة مثلًا أكتر من أيام السنة العادية، والعصائر والحلويات ده غير طبعًا العزومات. على قد ما قرار العزومة هيكون فيه خطورة بسبب وجود خطر الكورونا، لكن لو أخدتي الخطوة دي، مهم تحددي عدد الأصناف اللي هتقدميها والكميات اللي هتحتاجيها سواء لفطار أسرتك العادي أو عزومة.

• الميزانية مش أكل بس:

مهم جدًا تعرفي إن ميزانية شهر رمضان لا تشمل فقط الـ30 يوم، لا هي بتشمل لبس العيد وكحك العيد سواءً هتشتريه أو تعمليه بنفسك في البيت. علشان كده، لو قدامك عروض حلوة للبس جديد للعيد ليكي ولأفراد أسرتك، اعملي حسابك إنه يكون منه للعيد.

• الياميش والمكسرات:

من الأمور اللي كلنا بنحبها في رمضان، لكن اعتبريها آخر حاجة تشتريها في خزين رمضان. تابعي عروض السوبر ماركت الكبيرة القريبة منك، أكيد هتلاقي وقتها عروض ممتازة، اشتريها في وقتها بكميات معقولة علشان تفضل طازة عندك.

• تبلي اللحوم:

قبل رمضان بشهر، تقدري تركزي على جزئية تتبيل اللحوم سواء فراخ أو سمك أو لحم بقري مخصوص مع رمضان. ميزة الخطوة دي إنها بتختصر وقت ومجهود غير عاديين، ده بجانب إن طعمهم هيكون مميز بسبب التتبيل.

• انتبهي من العروض المبهرة:

من التصرفات السخيفة من بعض أماكن بيع المنتجات الاستهلاكية إنهم في الفترة دي ينزلوا عروض قوية جدًا على منتجات بتكون صلاحيتها على وشك الانتهاء، وده أمر سخيف وغير مقبول وللأسف بيقع فيه ناس كتير، فخلي بالك من النقطة دي.

• مش كل يوم لحمة:

مهم جدًا إن الفكرة دي تكون في بيتك. مش لازم أبدًا كل يوم فراخ ولحمة وسمك، فيه أيام ممكن تعدي عادي، مجرد أكل بسيط زي البطاطس والكشري ومسقعة. في الأيام دي، هتلاحظي إن كمية الاستهلاك أقل والتكلفة أقل وده تصرف هتحتاجيه عمومًا.

• حافظي على صحتكم:

ممكن تستغربي يعني إيه أدبّر ميزانية أكل وأحافظ على الصحة في نفس الوقت. بصراحة احنا في رمضان بنغالي قوي في أكل الحلويات والسكريات بشكل كبير، واللي بدورها بتكلف ماديًا بجانب أثرها السلبي جدًا على صحتكم.

دي نصايح سهلة وبسيطة هتساعدك كتير في الاستعداد لرمضان، كل سنة وأنتم طيبين وأنتم موفرين وشاطرين وبخير.

المصادر
www.sayidaty.net
www.fustany.com
www.aljazeera.net

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.