رمضان 2022 وصل، ومعاه سؤال كل أم مرضعة، هل يا ترى هتقدر تصوم بشكل لا يؤثر بالسلب على حليب الثدي بحيث تقدر تدي طفلها التغذية اللي محتاجها؟ طيب فيه للأم المرضع أطعمة في الصيام لزيادة حليب ثدي بحيث يكون مشبع ومغذي.
خلينا نعترف إن مافيش أبحاث رصينة معتمدة بتثبت الأثر السلبي أو الإيجابي للصيام على حليب الأم، وإن الموضوع أصبح نسبي ومختلف من حالة للتانية، بس الشيء اللي هنعتبره معيب وممكن يكون ظلم للنفس وللطفل إن الأم تصر على إنها تصوم وتشوف بعينها أثر ده بشكل سلبي على صحتها وعلى صحة طفلها ورغم كدة تصر على إنها تستمر في الصيام من منطلق إحساسها بالذنب إنها مش بتمارس فريضة الصيام.
وحقيقي وبشكل شخصي بقولك إن الصيام من العبادات اللي ربنا فرض فيها اليسر مش العسر، وكمان سمح إن فيها قضاء بيكون مقبول وتام الثواب عند الله، وإن ظلم النفس ذنب يتطلب التوبة عند ربنا وشيء غير مقبول بالمرة.
الفتواي الخاصة بإفطار المرضعة بتسمح إنك تفطري وتقومي بإطعام فقير، فحاولي تفكري إن ربنا بيجعل أرزاق ناس على ناس، فممكن قرارك إنك تفطري وتقومي بإطعام فقير هو رزق ربنا باعته للفقير ده وربنا برحمته استخدمك لوصول لرزق ده، وكل اللي بقوله ده بيوقع تحت بند إنك إتأكدتي إن صحتك لا تسمح بالصيام، لكن لو لاقيتي إنك قادرة على فريضة الصيام فهنا تعالي نتكلم عن نوعية التغذية والأغذية اللي هيحتاجها جسمك علشان يفضل مستمر في إنتاج الحليب اللي محتاج له طفلك.
أطعمة للأم المرضع في الصيام لزيادة حليب الثدي
- الخضروات الورقية
- الحلبة
- حبوب الكمون
- الشمر
- الثوم
- السمسم
- دقيق الشوفان
- الشاي الأخضر
- الحمص
- العدس
الخضروات الورقية
للأم المرضع أطعمة مهمة في الصيام لزيادة حليب ثدي
يعني خس، جرجير، كرات، لفت، كابوتشي كل الورقيات الخضراء اللي كتير مننا بيهمل في تناولها، مع إنها مصدر رائع للفيتامينات والمياة والكالسيوم ، وكلها عناصر جسمك في أمس الحاجة ليها في فترات الرضاعة والصيام، أقل كمية تتاكل إنها تدخل بشكل يومي في وجبة من وجباتك، والأفضل إنها تتغسل وتتاكل سليمة، يعني مش متقطعة في سلطة علشان تستفيدي منها بشكل كامل.
أفضل طرق حفظ وتخزين الخضروات الورقية
الحلبة
للأم المرضع أطعمة مهمة في الصيام لزيادة حليب ثدي
الحلبة دي تعتبر موروث ثقافي نسائي على مستوى العالم، يمكن مش بس علشان قيمتها الغذائية إنما كمان علشان قدرتها الفعالة في إنتاج حليب الثدي، ده طبعا بصرف النظر عن رائحة الجسد اللي بتخلينا فعليا نتهرب من شربها رغم إن طعمها حلو.
فالحلبة بتتميز إنها غنية بالأوميجا 3 والكالسيوم والحديد، على فكرة إنتي ممكن تستخدي الحلبة مش بس مغلية، ممكن حتى تطحنيها وتستخدميها في تتبيل اللحوم.
اعرفي كل فوائد الحلبة وازاي تستفيدي منها من غير أضرارها
حبوب الكمون
للمرضع أطعمة مهمة في الصيام لزيادة حليب ثدي
الكمون من التوابل المحببة لناس كتير، ويعتبر جزء أساسي في أكلهم، بس طعمه مش الميزة الوحيدة اللي بيتمتع بيها، لأن حبوب الكمون بتقدر تساعد على تحسين عملية الهضم، التخلص من الإمساك، والحموضة والإنتفاخ، أفضل طريقة لاستخدامه إنك مثلا تتبلي بيه السلطة، أو تنقعيه في مياة وتشربيه وقت الفطار.
أنواع التوابل والبهارات واستخداماتها الصحيحة
الشمر
بصراحة بحب أستخدم الشمر مع الرز بسمتي لأنه بيدي طعم وريحة لطيفة جدا للنوع ده من الرز، لكن هو مشروب حلو الطعم كمان ومش بيستخدم لإدرار حليب الأم بس، لكنه علاج منزلي فعال لحالات المغص والغازات.
الثوم
على الرغم إن الثوم له سمعة إن تناول الأم ليه هيسبب إصابة رضيعها بالإنتفاخ، إلا إنه في الحقيقة ده ظلم موجه للثوم، وإنه بيعتبر واحد من أفضل الأطعمة اللي بتساعد على زيادة حليب الثدي، بس طبعا مش معناه إن الحياة كلها تتقلب لتوم علشان الموضوع ميتحولش فعليا لحالة إنتفاخ رهيبة ليكي ولرضيعك، كل حاجة بإتزان حلوة.
10 فوائد لتناول الثوم على الريق يوميًا
السمسم
أطعمة في الصيام لزيادة حليب ثدي
السمسم من أجمل البذور من حيث الطعم، سواء أكلتيها نية أو محمصة، صحيحة أو مطحونة في شكل طحينة، ديما بتعتبر إضافة مميزة للأكل، ده غير إنها تعبر مصدر رائع وغني جدا للكالسيوم، وده أكتر عنصر بتحتاجيه كأم علشان تتعافي من الولادة، وبيحتاجه طفلك علشان يحصل على نمو صحي، ضيفيه على السلطة أو كوباية زبادي، أو أعملي طبق سلطة طحية بشكل مستمر على سفرتك، أو حتى ضفيه على الحلويات، وأدينا قربنا على العيد والكحك مينفعش من غير سمسم لذيذ، بصرف النظر عن السعرات أكيد.
دقيق الشوفان
الشوفان دلوقتي إكتسب شهرة عالمية كمصدر غني بالألياف وبديل صحي عن الدقيق الابيض، بس هل كنتي تعرفي إنه مغذي جدا ليكي، وتقدري تستخدميه في أكلك كوسيلة لزيادة حليب الثدي، تقدري تستخدميه في البان كيك، في شورية الشوفان بالكريمة، أو حتى كبديل لحبوب الأفطار مع لبن وعسل.
7 أكلات بالشوفان لفطار صحي وسريع
الشاي الأخضر
كلنا بنحب نشرب الشاي الأخضر كمشروب يسكت ضميرنا بعد وجبة بيج تيستي، بس هو الحقية مش ده دوره، الشاي الأخضر مضاد ممتاز للأكسدة وبالتالي تنقية للجسم من الشوارد الضارة، تنشيط للدورة الدموية وتقليل من الكليسترول، وفيه بعض الدراسات اللي بتقول إن له أثر فعال في زيادة حليب الثدي، اشربي كوباية واحدة منه يوميا.
الحمص
أطعمة في الصيام لزيادة حليب ثدي
الحمص مش بس حلبسة، ده لا يمنع إن الحلبسة تحفة جدا، بس حقيقي الحمص بيتصنف كواحد من الأغذية الخارقة، من كتر ما هو مليان فوائد غذائية بيحتاجها الجسم ومش بتتوفر غير عن طريق الأغذية الخارقة.
فهو تقريبا غذاء صحي لكل إنسان، وده طبعا في إطار معتدل، فالحمص مليان بمركبات فيتامين ب والكالسيوم اللي بيساعدوا على زيادة إدرار حليب الأم.
طريقة عمل حمص الشام المصري (الحلبسة) في الشتاء
العدس
بما إننا في رمضان فهو موسم للشوربة، اللي تعتبر طبق رئيسي كل يوم على سفرة لإفطار، وتخيلي إن شوربة العدس مش بتتشرب بس في أيام البرد، لأ عادي ممكن تشربيها في أي وقت،وكمان كسلطة وتستمتعي بطعمها وفوائده العظيمة اللي ليها دور فعال في زيادة حليب الثدي.
أكلات شعبية مصرية: طريقة عمل شوربة العدس المصرية
في الأخر كل اللي رشحته ليكي فوق ده مش هيقدر يديكي النتيجة الفعالة من غير شرب كميات كبيرة وكافية من المياة، اللي هو إتنين لتر يعتبر حد أدنى، وإن أفضل حاجة تعمليها لنفسك إنك تشربي كل ساعة كوبياة مياة حتى لو مش عطشانة، وده طول فترات الفطار، وبعد رمضان كمان، كل أعضاء جسمك مش هتقدر تقوم بدورها ووظيفتها إلا في إطار توفير الترطيب الكافي اللي مش بيحصل غير بشرب كميات كافية من المياة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك