محتويات المقال
أول مرة أروح معرض الكتاب من سنين كتير، كنت واخدة معايا مبلغ محترم، وبمجرد ما دخلت انبهرت جدًا بالأجواء ودخلت أول خيمة كانت جنب الباب وصادف إنها لدار الشروق واشتريت منها أربع أو خمس كتب كبار أخدوا ميزانيتي كلها تقريبًا، وما فضلش حاجة بعد كده لأي حاجة تانية في المعرض. وحسيت يومها بندم شديد جدًا، لذلك حبيت أجمع خبرتي وخبرة أصدقائي في المقال ده، يمكن يساعدك لو دي أول زيارة لمعرض القاهرة الدولي للكتاب، واللي هيستمر في الفترة من 30 يونيه ولحد 15 يوليو 2021، واللي بينطلق السنة دي تحت شعار “في القراءة .. حياة” في مركز مصر للمؤتمرات والمعارض الدولية بالقاهرة الجديدة.
معرض الكتاب 2020: إزاي تختاري الكتب المناسبة لطفلك؟
أمّني نفسك
قبل ما تروحي لازم يكون معمول حساب المجهود لأن المساحة كبيرة جدًا، يعني بنتكلم في كوتشي مريح، وشنطة فيها كاب ونظارة وسندوتش أو أكتر وعصير ومياه، لأن اليوم بيكون طويل جدًا، ولو دي أول مرة تروحي، فاعملي حسابك إنك تروحي أكتر من يوم عشان تهضمي المكان وتعرفي المكان عامل ازاي أكتر، لإن المعرض مستحيل يخلص في يوم واحد، والجو هناك حر جدًا خاصةً إننا في عز الصيف لإن المعرض معمول في غير معاده السنة دي.
معرض الكتاب: اشتري إبيه لأولادي من هناك
اعرفي أكتر عن المعرض
سواءً عندك دار نشر مفضلة أو كاتب مفضل، الأحسن تكوني محددة قبل ما تروحي انتي رايحة تشتري إيه ولو بشكل مبدأي. تقدري تعرفي ده من خلال الإعلانات اللي بتبدأ دور النشر والكتاب ينزلوها عن أعمالهم الجديدة في المعرض كل سنة، ولو ليكي صديقة قارئة قديمة وبتزور المعرض كتير، ممكن تروحي معاها، هتساعدك كتير.
ولو استقريتي إنك هتروحي المعرض أكتر من مرة، خدي نوتس بالكتب اللي عجبتك وبعدين اشتري في تاني أو تالت زيارة.
معرض الكتاب: دليلك لو هتروحي معرض الكتاب مع الأولاد
المعرض مش كتب وبس
في جزء الناس تغفله في معرض الكتاب، وهو الندوات الثقافية الي بتنظمها وزارة الثقافة، ودي بتكون مهمة جدًا، غالبًا بيكون اسمها الخيمة الثقافية أو المقهى الثقافي، وكمان ورش فنية للأطفال وأهم واكتر جزء الناس بتحب تروحه هو سور الأزبكية حيث الدرر الحقيقية اللي بسعر لا يقارن، ما تفوتيش فرصة المرور على السور لإنه كمان فيه مجلات قديمة وكتب قديمة، وأحب أقول لك إن أحسن وقت تجيب فيه الموسوعات والكتب الغالية بيبقى آخر كام يوم من المعرض لأن الخصومات بتزيد.
خدي احتياطاتك
المعرض السنة دي بيشهد تخصيص مسار خاص وسريع لكبار السن وذوى القدرات الخاصة، وبيسمح لهم بالدخول بصحبة مرافق من جميع البوابات، ما تنسيش تلبسي كمامة طبية ويكون معاكي الكحول وتحافظي على التباعد الاجتماعي والتعقيم طول فترة وجودك في المعرض.
التعليق باستخدام حساب فيس بوك