لو اشتريتي كريم أساس وطلع غامق أو فاتح .. تعملي إيه؟

كريم الأساس جزء أساسي من المكياج لأنه بيكون هو الأساس اللي بيتبني عليه كل الميكاب. لكن ساعات كتير بننزل نشتري وبعدها نلاقي إن الدرجة مش لايقة على وشنا لأننا جربناه على إيدينا أو اشتريناه أونلاين وجات لنا الدرجة مش مظبوطة. هتعملي إيه بقى لو اشتريتي كريم أساس فاتح جدًا أو طلع غامق؟ في المقال ده، هنقول لك تعملي إيه.

اشتريت كريم اساس وطلع غامق، أعمل إيه؟

هنا بنوفر لك 3 طرق عن كيفية تفتيح الفاونديشن.

1. اخلطيه بالكريم المرطب.
   أيًا كان نوع الكريم المرطب اللي عندك، لو خلطتيه بكريم الأساس، هيفتحه. وبكده، بسهولة جدًا تقدري تظبطي درجة كريم الأساس. بس خدي بالك، ما تخلطيش كتير مرة واحدة. خدي شوية من كريم الأساس على إيدك وبعدين حطي شوية صغيرة من الكريم المرطب لحد ما توصلي للدرجة اللي انتي عايزاها.
2. استخدمي باودر.
   البودرة أو الباودر أو الـfinishing powder طريقة تانية لتعديل درجة لون كريم الأساس. بعد ما تحطي كريم الأساس على وشك، ضيفي له شوية باودر لحد ما يكون أقرب للون جلدك.
3. استخدميه في الكونتور.
   لو شفتي أي فيديو من فيديوهات الكونتور، هتلاقي إن فيه دايمًا أجزاء من الوش بتتحدد بلون أغمق وفيه مناطق تانية بيتحط فيها الفاونديشن بلون البشرة، وبعدها بيتم خلطهم على الوش. تقدري تستخدمي كريم الأساس الأغمق في العملية دي، وتبقي ما خسرتيهوش.

تغميق كريم الأساس الفاتح

هنا بقى هنقول لك تعملي إيه لو فيه كريم أساس أفتح من بشرتك:

1. اخلطيه مع برونزر.
   هتلاقي في محلات مستحضرات التجميل نوع من الكريمات اسمه bronzer وبيستخدم علشان يدي البشرة لون برونزي. تقدري تشتريه وتخلطيه مع كريم الأساس الفاتح عشان يديكي الدرجة المطلوبة. زودي البرونزر لحد ما تحصلي على الدرجة اللي تحبيها.
2. اخلطيه مع كونسيلر.
   الكونسيلر اللي بيستخدم لإخفاء الهالات السودا بيكون فيه منه برضه درجات، والكونسيلر عادة بيكون أرخص من كريم الأساس. عشان كده، ممكن تشتري نوع كونسيلر بدرجة أغمق من بشرتك وتخلطيه مع كريم الأساس الفاتح لحد ما توصلي لدرجة بشرتك.

حل ينفع في الحالتين ( تغميق/تفتيح الفاونديشن )

اخلطي كريم الأساس مع كريم أساس تاني. لو اشتريتي كريم أساس وطلع فاتح قوي، اشتري كريم أساس أغمق من بشرتك واخلطيهم لحد ما توصلي للدرجة اللي انتي عايزاها. ولو طلع غامق قوي، اشتري كريم أساس أفتح من بشرتك واخلطيهم لحد ما توصلي للدرجة.