في الحياة السريعة اللي إحنا عايشينها دلوقتي وبالنسبة الكبيرة من الستات اللي بتشتغل شغلانات طويلة وتقيلة، والستات اللي شايلة شيلة البيت والولاد لوحدها، ووصف الستات بجملة “ست بميت راجل”.
ومن غير ما ناخد بالنا بقي في لخبطة جوانا بين طاقة الأنوثة والذكورة اللي عند كل واحدة فينا، مع إن في كتير مايعرفوش إن جوا كل ست في طاقة أنوثة وذكورة بس بتختلف بين الستات والرجالة.
يعني إيه طاقة انوثة وطاقة ذكورة؟
اول إختلاف جوهري في الراجل والست هو الفرق بين طاقاتهم، الفرق بين طاقة الذكورة وطاقة الأنوثة طبعا ممكن حد يتخيل زي ما انا كنت فاكرة في وقت من الاوقات إيه يعني ما اكيد الست طاقتها هي طاقة الأنوثة والراجل هو طاقة الذكورة إيه الجديد يعني!
الجديد والمفاجأة إنه إحنا الإتنين رجالة وستات عندنا من الطاقتين، جون جونمان خبير العلاقات بيقول إن كل واحد فينا هو خليط بين طاقة الأنوثة والذكورة بنسبة 30\70 زادت بقي النسب ده او قلت عن وضعها الطبيعي هنا بتحصل المشكلة وبيبدأ الخلاف!
خليني أوضح اكتر رجوعا للإنسان البدائي وفطرتنا منذ بدأ الخلق فكانت طبيعة طاقة الأنزثة والذكورة اللي بتفرضها عليهم الأدوار وشكل حياتهم إن الأصل في الست هو الحنية والإحتواء والطيبة والمشاعر الجياشة ومساحة الأمان اللي الراجل بيرجع يترمي في حضنها أخر اليوم.
والراجل الأصل فيه هو الحماية والقوة هو مركز طول الوقت علي الشغل والحركة وحماية بيته ويرجع اخر اليوم للست مصدر الأمان والراحة.
الست وظيفتها هي إحياء العلاقات جوا البيت بين افراد الأسرة والراجل وظيفته أمان وإحتياجات الأسرة.
لكن مع التطور الطبيعي لشكل الحياة والستات اللي بقت تشتغل وتصرف زي الراجل وفي بعض البيوت اكتر من الراجل وحتي لو مش بتشتغل فالستات بقت في الشارع طول النهاردة من تمارين لدروس لغيره.
فبدأت الست تنشف تشيل شوية من شيلة الراجل وهنا بقي لما مش بنظبط الحتة ده تبدا طاقة الذكورة عندها تزيد تبقي هي المر الناهي في البيت\ اللي بياخد كل القرارات\ واللي يمكن كمان بيصرف في البيت زيها زي جوزها فيحصل خلل في تصرفاتها وعدم توازن في الادوار في البيت وبتبقي هي اول واحدة مش مرتاحة ومتعصبة ومتوترة طول الوقت وهي مش عارفة السبب.
بتبقي عاملة بالظبط زي اللي بتدي كتف لجوزها وبتقوله اركن انت بقي شوية علي جنب انا كفيلة بالليلة ده، فتدريجي تلاقي طاقة الأنوثة عند الراجل تزيد وهي من جواها شايفة انها “مضطرة تبقي راجل” وعادي جدا إنها في اول خناقة تقوله “هو انت راجل اصلا!!” ومن هنا بقي بيبدأ عم الراحة للطرفين ولخبطة الأدوار اللي للأسف الشديد مش بس بيأثر علي الزوجين لكن بينعكس انعكاس مباشر علي الأطفال اللي شايفين ماما ممشية البيت وبينعكس علي تكوينهم لصورة نموذج الراجل والست بعدين!
في دراسة نشرتها اليلي ميل الجريدة البريطانية المعروفة وسألوا مجموعة كبيرة اوي من الرجالة علي الحاجات اللي مفتقدينها في ستاتهم لقوا إن الحاجة المشتركة او المشتركة اللي معطم الرجالة متفقين في افتقادها هي:
- الندية بلا هدف\ واقفاله علي الكلمة ناطة له كدة في زوره مش سايباه يقرر ولا حتي يقول لا علي حاجة “عشان معتقد انا زيي زيك”
- وتاني حاجة هي رغبة الست الزايدة في تملك الراجل “مش مدياله مساحته وبتديله في اوامر اعمل وسوي وصلح اللمبة “بغض النظر انه بيصلحها بعد مائة عام من صلح اللمبة” بس بالنسبة له المحاوطة ده تملك! هي هنا الست اتحولت لدور المتحكم في العلاقة وده بيخللي الراجل ينفرعلطول.
- جون جراي بيشبه الراجل بالاستك كل شوية عايز يبعد ويفصل شوية بس لما الست بتبقي مش مدياله فرصته وكل ما يبعد تجيبه من افاه يوم ما يزهق الاستك هيرد عليكي ويلسوعك انتي!
طيب نعمل إيه كستات عشان طاقة الذكورة بتاعتنا متعلاش عن الأنوثة؟
حلو ان دماغك تكون توزن بلد، تكوني جدعة وبتسدي في أي موقف، تعرفي تتصرفي ومابتغرقيش في شبر مية، مستقلة ماديا ومش مستنية حد يسندك، لكن في نفس خدي بالك بقي انك وانتي بتفكري وتتصرفي بميت راجل ماتنسيش طاقتك ك”ست”، ماتسيبيش طاقة الذكورة تغلبك!
بمعني انك:
- ماتشيليش شيلة مش شيلتك، تاخدي خطوة لورا وتركزي ان مهما شخصيتك كانت قوية ومهما كنتي شايلة ادوار قبل، فالاصل فيكي السكن والراحة والمشاعر اللي كل بيتك بيحتاجها منك\ فعيشي ده واظهريه واستمتعي بيه وإدي للراجل فرصة القوامة عشانك اصلا قبل ما يكون عشانه.
- ماتعلّيش علي شريك حياتك عشان الحاجة لو معملتيهاش بطريقتك مش هتتعمل.
- ما توقفيش راس براس!
- ما تسحبيش منه القوامة عشان بقيتي تصرفي في البيت زيه !
- لو عايزة تعملي اي حاجة في بيتك من دور الراجل، يبقي اعمليها بمزاجك مش عشان هو مابيعرفش يعملها يا اما العلاقة ده فيها مشكلة وندور علي حل!
اديله فرصة يقوم بدوره وبلاش تديله كتف وتقومي بيه مكانه! لو انتي ست بميت راجل، خدي خطوة لورا وعيشي دور الست واستمتعي بيه
دماغك تمشي بيها بلد ماشي .. لكن مع شريكك متنسيش تبقي ست الستات.
التعليق باستخدام حساب فيس بوك