محتويات المقال
أنا مش عارف أتغير
كل ما أقول هتغير
تحصل حاجة ترجعني
عن كل اللي أنا ناويهكل ما اقول أنا هبدا أعيش
حياتي بمبدأ
برجع بضعف تاني.. ومش بس أنا بضعف أوي
أيوه بفوق لما بروق وأحاسب نفسي بكام سؤال
وأرجع اقول مفيش مخلوق مبيغلطش
ده شئ محال
وأرجع تاني.. أغلط تاني كأني بكلم واحد تاني
أنا زعلان من نفسي حقيقي
أنا غلطان وضعيف وأنانيأغنية لتامر حسني
يعني إيه سلوك قهري؟
وفقًا لموقع سايكولوجي توداي، ملايين من الناس بيعانوا من واحد من السلوكيات القهرية على الأقل.. السلوكيات القهرية هي تصرفات أو أفعال بنكررها وبنعملها وإحنا عايزيين نبطل نعملها.. بنعملها على الرغم من إنها بتأذينا، على الرغم من إنها ممكن توثر سلبا على صحتنا النفسية والجسدية وساعات كمان بنعملها على الرغم من إننا بنتضايق بعدها..
حاجات كتير سهل تتحول لسلوكيات قهرية زي الشوبنج والاكتناز والأكل والقمار والجنس والتدخين وشرب الخمر والعادة السرية.. الكلام ده هيحسسكم إنه بس العادات السيئة هي إللي ممكن تتحول لسوكيات قهرية لكن الحقيقة إنه أي سلوك ممكن يبقى فيه فرصة يبقى قهري حتى الحاجات العادية زي مرواح الجيم والتمرين، بل وحتى الكلام ممكن يبقى سلوك قهري تخيلوا؟!
فيه كمان سلوكيات بنسميها السلوكيات القهرية الاستحواذية obsessive compulsions وساعتها الشخص بيكرر تصرف معين كذا مرة وبشكل معين في دماغه علشان يقلل التوتر وأشهر مثال على كدة الناس إللي بتقفل النور وتفتحه عدد مرات معين.. أو كل شوية لازم يتأكدوا من إنه الباب مقفول مثلا.
ليه السلوك القهري مؤلم؟
السلوك القهري مؤلم ليا أنا شخصيًا لإنه بيحسسني بالعجز.. وبيحسسني إنه فيه حاجة مسيطرة عليا مش عارفة أتخلص منها.. ده غير إنه فيه سلوكيات لما بنعملها مش بس بتبقى متكررة وخلاص، ساعات بتأذينا.. أنا شخصيا بتأذي جدًا لما باكل أكل غلط مليان نشويات ودهون وكل مرة بقول هبطل الأكل ده لكن برجع آكله تاني وبترجع بطني توجعني..
بشكل فلسفي أكتر.. السلوك القهري بيحسس الإنسان بالعبودية للشيء إللي مسيطر عليه.. وده إحساس بيقتل الحرية جوانا.. العبودية إللي بتسبب الحرية هي عبودية الله مش عبودية الحاجات!
إيه الحل مع السلوك القهري؟
السلوك القهري ساعات بيكون سببه جيني وده بنشوفه مثلا في حالات التوائم المتطابقة.. لاحظوا إنه بيكون عندهم نفس السلوكيات القهرية.. كمان التوتر والقلق وصدمات الطفولة والتعرض للإساءات المتكررة سواء في الصغر او الكبر بيكون ليه دور في تكوين السلوكيات القهرية.
العلاج النفسي بيكون مفيد جدًا في حالات السلوكيات القهرية المتوسطة ومن أشهر المدارس العلاجية المفيدة مدرسة الـCBT وفيه مدارس تانية علاجية مفيدة..
في الحالات الشديدة إللي بتوصل لمرحلة السلوكيات القهرية الاستحواذية ممكن الدكتور يدخل دوا.. زي أدوية الاكتئاب والقلق علشان تساعد الشخص مع العلاج النفسي.
قوليلي في التعليقات لو بتعاني من أي سلوك قهري؟
لو بتحبي الموضوعات النفسية ممكن المقالات دي تعجبك:
تفسير الأحلام: 9 أحلام شائعة ومعانيها
وماذا عن البوليميا نيرفوزا؟ اعرفي أكتر عنها!
2 تعليقان
شرب المنبهات و قضم الاظافر
حبيبتي إن شاء الله تتجاوزي كل إللي بيضايقك.. أنا كنت بقرض ضوافري سنين والحمد لله عرفت أبطل بالوقت