هنتكلم النهاردة عن النشويات وليه هي أول حاجة لازم نتعلم نظبطها في أي نظام غذائي هنمشي عليه.
يعني بالبلدي كدة ليه لو عايزيين نخس ونتخلص من إدمان الطعام لازم أول حاجة نعملها نقطع مكرونة وحلويات وسكر وخلافه أو ناخدهم بحرص شديد؟
الكربوهيدرات المصنعة Refined Carbohydrates والسكر (سواء الأبيض أو البني أو سكر الفاكهة) بيدخلوا ينبهوا أو ينشّطوا منطقة في المخ مسئولة عن إفراز الدومابين والحتة دي من المخ تحديدَا هي نفس الحتة إللي بتنشط في كل السلوكيات الإدمانية وعند المدمنين.
الكاربوهيرات المصنعة زي أي أكل بالدقيق الأبيض والعصاير المعلبة والصوصات والسكر الأبيض والبني والفاكهة وكمان مشتقات القمح..
الفكرة إننا لما بناكل، السكر والنشويات المصنعة هي أسرع حاجة في الأكل بتاعنا بتتحول لسكر في الدم وبترفع السكر وده ولما ده بيحصل بنلاحظ حاجاتين..
1-بننشط المنطقة المسئولة عن الإدمان.
2- بنجوع بعد أقل من ساعة ونص أو ساعتين فنعوز ناكل تاني وطبعًا بنختار نشويات تاني ومفهوم ليه.. بسبب السلوك الإدماني على النشويات وبسبب مستوى السكر إللي نزل في الدم..
باحثين من Boston Children’s Hospital’s Obesity Prevention Center عملوا دراسة علشان يشوفوا الموضوع ده. جابوا مجموعتين من الناس.. مجموعة شربت ميلك شيك فيه نشويات معقدة وبروتين عالي ومجموعة تانية أخدت ميلك شيك مليان نشويات مصنعة وسكر وبروتين قليل.. ولاحظوا كذا حاجة منهم…
-إللي اخدوا الميلك شيك إللي مليان سكر نشطت عندهم مناطق الإدمان في مخهم.
-جاعوا بسرعة أكتر وطاقتهم قلت وبقوا مهبطين.
– طلبوا في الوجبة التالية نشويات.
طيب نتعلم من ده إيه؟
لو عايزيين نتخلص من النهم الغذائي ونعمل نظام غذائي صحي ونخس أول حاجة نفهم أكتر إزاي وإمتى ناكل نشويات وإزاي نعمل طبق ما ينشطش الاجزاء الإدمانية في مخنا ولا يجوعنا بسرعة..
المرة الجاية هتكلم عن الموضوع ده بتفاصيل أكتر..
أنا شيماء الجمال بكتب تجربتي مع خسارة أربعين كيلو من وزني على هاشتاج #من_الكرش_للكيرفي من 2016 ودلوقتي زدت 12-15 كيلو بحاول أنزلهم تاني معاكم.. علشان كدة هعمل لكم سلسلة مقالات #من_الكرش_للكيرفي من تاني ومن أول وجديد.
والصور دي الـBefore والـ After بتاعتي
مستنية تعليقاتكم على المقال ده في خانة التعليقات آخر المقال خالص..
3 تعليقات
انا مقلله نشويات بقالي ١٤ يوم بنسبه كبيره اوي بس عندي صداع جامد اوي هل ممكن يكون بسبب الموضوع دا ؟
ممكن.. اتأكدي انك بتاخدي دهون وبروتين كفاية.. شيماء الجمال
[…] في المقال السابق اتكلمت عن النشويات المصنعة أو النشويات البسيطة وإزاي هي أول حاجة محتاجين نفهم عنها أكتر ونخلّي بالنا منها لو عايزين نخس.. ممكن تقرأي المقال السابق من هنا […]