كلنا بنتمنى نشوف ولادنا في أحسن صورة وأكترها صحة، وده أوقات بيضغط علينا لو حد من ولادنا وزنه زايد وعادات أكله كانت غير صحية، وممكن يأثر على سلوكنا معاهم أو تعليقنا على جسمهم أو عاداتهم الغذائية بطريقة سلبية بدافع الخوف علي مصلحتهم من غير ما نعرف إن كلامنا ممكن يسيب أثر في نفسهم للأبد.
فيه دراسات بتقول إن الطفل اللي بيتعرض لتعليقات سلبية على وزنه من أهله أو تريقة أو توبيخ على كتر الكل وزيادة الوزن وضغط دايم بجمل “لازم تخس” أو “كفاية أكل” بيكون عرضة أكتر من غيره للسمنة لما يكبر وكمان اضطرابات الطعام. وإن الأطفال اللي تعرضوا لتنمر من الأهل في البيت بسبب وزنهم فضلوا فاكرين كل كلمة اتقالت لهم عن جسمهم ومسببة لهم ألم نفسي سنين قدام.
ده غير إن جملة “لازم تخس” لما بتتقال لنا احنا الكبار، بنحس منها إننا مضغوطين وغالبًا بتجيب تأثير عكسي، فطبيعي الطفل لما بنقوله كده واحنا متخيلين إننا بنشجعه بنكون في الحقيقة بنوصل له رسالة غير مباشرة زي إن “شكلك وحش” أو “جسمك محتاج يتغير عشان نحبك” أو “انت مش مقبول زي ما انت”، وكل ده بيحفر في العقل الباطن للطفل كره لشكله وجسمه. ده غير طبعًا عدم الثقة بنفسه ولا الرضا عن نفسه مهما جسمه اتغير هيفضل حاسس إنه مش مقبول وإن الشكل والجسم أهم حاجة نقدر نقيّم بيها الإنسان.
يبقى لو عايزة تساعدي طفلك يخس عشان يقدر يعيش بصحة أحسن من غير ما تضغطي عليه أو الموضوع ده يأثر بطريقة سلبية على نفسيته، ما تتكلميش نهائي عن شكل جسمه وإنه محتاج ياكل أكل صحي عشان يخس. وممكن تستبدلي ده بإنكم محتاجين الأكل الصحي عشان صحته تكون أحسن ويقدر يجري ويلعب أسهل. ما تعلقيش بالسلب حتى عن وزنك أو جسم حد تاني لإنه في النهاية، الشكل الخارجي للإنسان بيتغير والقيمة الحقيقية له مش بالمظهر الخارجي بس، وده اللي الطفل لازم يعرفه عشان ثقته في نفسه ما تتهزش.
الخبراء بينصحوا كمان بتغيير عادات البيت كله الغذائية لإن السر في إن الطفل يقدر يتعود على نظام حياة صحي ويتقبل الأكل الصحي هو إنه ما يلاقيش اختيارات حواليه غيره ويعرف إن ده المتاح والسائد في بيتكم لكل أفراد عيلته. فما يحسش إنه مضغوط أو مغصوب أو بيتعاقب لوحده وباقي البيت بياكلوا Junk Food وأكلات معلبة مش صحية، ومع الوقت هيكون ده أسلوب الحياة اللي كبر واتعود عليه.
وكمان بما إن ولادنا مراية لينا، فلازم تبدأي بنفسك وتحاولي تعيشي حياة صحية، بدايتها بالأكل الصحي وممارسة الرياضة. لو عندك مثلًا مشوار قريب من البيت، ممكن تعرضي على طفلك إنكم تمشوا بدل ما تركبوا العربية. منها تقضوا وقت لطيف تتكلموا مع بعض فيه بعيد عن الشاشات، ومنها ممارسة رياضة.
التعليق باستخدام حساب فيس بوك