ليه ممارسة الامتنان في حياتنا مهم

ربنا قالنا “لَئِن شَكَرْتُمْ لَأَزِيدَنَّكُمْ ۖ” و الرسول ﷺ قالنا “من لا يشكر الناس لا يشكر الله” و هو ده بالظبط المطلوب وده أصل الامتنان (gratitude).

دراسات علم النفس الإيجابي بتقول إن ممارسة الامتنان كل يوم لمدة ٨ أسابيع بتغير في مخ الإنسان و بتزود إفراز الهرمونات المسؤولة عن السعادة و بتعلي الرضا والإنتاجية عنده كمان.

يعني من الآخر كده لو قعدتوا شهرين تعملوا اللي هقولكم عليه دلوقتي حياتكم هتتغير بعون الله، بس مهم إنكم تلتزموا بيه و متزهقوش بسرعة عشان ندي فرصة لعقلنا إنه يتبرمج.

هنجيب note book ونقعدكل يوم بالليل أو الصبح نكتب ٥ حاجات إحنا ممتنين لوجودها في حياتنا و نعمة بالنسبة لنا أو حاجات حصلت في يومنا بسطتنا، أي حاجة مهما كانت صغيرة و بسيطة بس فرقت معاكوا فهي مهمة و نكتبها، مش لازم أكون خلصت الماجيستير عشان ألاقي حاجة اكتبها يعني ممكن تكون حاجات أبسط من البساطة.

نعبر للي حوالينا عن شكرنا و امتناننا ليهم، نشكر ولادنا على تصرفاتهم البسيطة، نشكر الناس اللي عايشة معانا في البيت، نكتب كلمتين حلوين لحد ساعدنا في يوم من الأيام، نكلم نشكر حد قدم لنا دعم في يوم من الأيام أو حتى نبعتله مسج.

مهم أوي إننا يكون في حياتنا ناس تفكيرها قريب مننا و بيشجعونا، فنشوف حد بنحبه و نشرحله الفكرة و نبتدي نتمرن مع بعض علي ممارسة الامتنان، أنا مثلا علمته لابني و بنعمله كل يوم قبل النوم و ده حقيقي بيفرق معايا أنا و هو جدًا و بيخليه ينام و هو مرتاح وهادي.

ساعات بسأل الأم في الاستشارات ” إيه أكتر إنجاز مبسوطة إنك قدرتي تعمليه” بكتشف إنها مش لاقية أي حاجة و مش شايفة إنها أنجزت أي حاجة بقى لها فترة، و لما بنقعد نفكر سوا و ندعبس كده بتلاقي نفسها أنجزت و أنجزت كتيير جدًا جدًا، فمهم ندي نفسنا فرصة نركز فأي خطوة صغيرة بنمشيها لقدام و نفرح بإنجازتنا الصغيرة لحد ما تبقى كبيرة.

أربع تمارين سهلة و بسيطة بس هتفرق كتير أوي فينا و في استقبالنا للمشاكل و التوتر اللي في حياتنا، مادام كده كده عايشينها يبقي نعيشها بقى مبسوطين و بنحمد ربنا أحسن ما نعيش على أمل إن بكره أحلى و ناسيين نتبسط باللي موجود النهارده.