ليه ولادي محظوظين بخالتهم؟ :)

يا ترى ليه ولادي وولادكم محظوظين بوجود خالة في حياتهم؟ هو صحيح زي ما بيقولوا الخالة والدة؟ الحقيقة أنا عمري ما جربت إحساس إن يبقى عندي خالة: مامتي ما عندهاش أخوات بنات، لكن طول عمري باتمني يبقى عندي خالة. لما اتجوزت وشوفت علاقة جوزي بخالاته، حبيتهم قوي واتمنيت ولادي يكون عندهم ناس في حياتهم موجودين على طول وبيحبوهم حب غير مشروط وبيدعموهم رغم مشاغل الحياة والمسافات.

لما أختي بقت أم، حسيت بإحساس غريب ناحية ابنها، روح جديدة كإنها اتخلقت مني وجوايا، ولما بابص على بنت أختي، باحس إن حتة مني ماشية قدامي، خليفتي في الملاعب وصاحبتي اللي فاهماها وفاهماني، ولما أنا بقيت أم، لقيت نفسي مش باطمن على ابني مع حد زي أختي وإنه روحه فيها وبينسى الدنيا وهو في بيتها ومع ولادها، وبيفضّل وجوده وسطهم على أي حاجة في الدنيا واكتشفت إنه حقيقي أي بني آدم عنده خالة فهو بني آدم محظوظ ومرزق عشان أسباب كتير قوي، هاقول لكم شوية منها في مقال النهارده.

• خالتك عارفة كل تفاصيلك من وانتي في اللفة

بطبيعة الحال، البنت لما بتولد، بتروح من المستشفى على بيت مامتها، مين بقى اللي بيشيل ويساعد ويحمي ويلبّس ويدّي الأدوية؟ هي الخالة اللي بتعيش مع ولاد أختها كل لحظة وكل تفصيلة من أول ثانية جم للدنيا فيها وكإنها أمهم التانية.

• بتلحقك وتدافع عنك في كل مصيبة تعملها

الخالة هي صمام الأمان في العيلة، واللي بيجري عليها ولاد أختها ياخدوا رأيها أو يستنجدوا بيها في أي مشكلة، عشان عارفين إنها هتسمعهم زي مامتهم ومش هتحكم عليهم، بس في نفس الوقت، رد فعلها هيكون أهدا من مامتهم وهتساعدهم في حل المشكلة أو حتى هتبسطها لمامتهم.

• صاحب جدع، نعمه بالمال ما تتقدرش

الخبير التربوي ستيف بيدولف بيقول إن دور الخالة في حياة البنت في فترة المراهقة أهم من دور الأم، الفترة اللي بتبدأ البنت تدور على نفسها وتثبت شخصيتها، بتكون خالتها هي الصاحبة الجدعة اللي تلجأ لها في أي وقت، هي القدوة اللي تقدر تسمع منه وتقلدها من غير ما تحس إنها بتنظر عليها.

• ولاد خالتك هم أصحاب العمر

ولاد الخالة دول علاقة غريبة ومش موجود منها اتنين في الدنيا، عزوة موجودة طول العمر، أخوات عندهم بيتين واتنين أمهات بس لحم ودم واحد، سهر للصبح مع بعض هزار وضحك وخناق منهم فيهم. عارفين أسرار بعض وروحهم فعلًا في بعض، معاك على الحلوة والمرة، وجودهم في حياة بعض هو أكبر comfort zone بالنسبة لهم.

• أحلى هدايا ودلع بتيجي من الخالة

عشان الخالة هي النسخة التانية من أمك موجودة في مكان تاني في الدنيا بس هي النسخة “اللي بتدلع وتكسر القوانين” وما تقدرش على زعل ولاد أختها وهم عارفين كده كويسة، فبيستغلوه صح ويتدلعوا براحتهم.

• عارفة وفاهمة كل تفاصيل مامتك

فاهمة أختها، عارفة طباعها وشارباها، وبتعرف تقنعها بأي حاجة، فتقدر تتوسط لك في أي مصلحة، والوحيدة اللي لو انت زعلت من مامتك، تقدر تروح تحكي لها وانت متطمن إنها هتحتويك وهتدخل وتصلّح كل حاجة.

الخالة يعني حب وأمان وحنية وطبطبة ودراعات مفتوحة لولادي في أي زمان ومكان، الخالة هي شريكة مش بس في الدم واللحم لكن هي شريكة كمان في الروح وتفاصيل الحياة.