محتويات المقال
البشرة الدهنية مظهرها بيخلي السيدة مش واثقة في نفسها أوقات كتير، بسبب الإفرازات الدهنية والرؤوس السوداء، علشان كده لازم طول الوقت نهتم بالعناية بالبشرة إنها من أكتر الحاجات اللي بتفرق في المظهر العام للسيدات، ومن طرق العناية دي استخدام الماسكات الطبيعية، وعلشان كل ماسك له استخدام معين على حسب خواص مكوناته، هنقولك النهارة على 3 ماسكات للبشرة الدهنية لتفتيح البشرة والتخلص من الإفرازات:
-
إيه هي البشرة الدهنية؟
هي البشرة اللي لها لمعة أغلب الوقت، وملمسها دهني وطري والمسام فيها واسعة، وبتنتج عن الإفرازات الدهنية اللي فيها، بثور أو بقع أو رؤوس سوداء.
-
مشاكل البشرة الدهنية:
- لمعان الوجه الزائد.
- شحوب البشرة.
- زيتية البشرة.
- ظهور رؤوس سوداء ورؤوس بيضاء.
- ظهور حب الشباب من فترة للتانية.
- المسام الواسعة.
- اختلاف مظهر المكياج بعد ما تحطيه بوقت طويل.
وعلشان تلاقي حل لمشكلة الرؤوس السوداء شوفي المقال ده: اعملي بنفسك: لصقات لإزالة الرؤوس السوداء
-
أنواع البشرة الدهنية:
- بشرة بتعاني من ظهور التهابات على الجلد واحمراره بمجرد التعرض للأشعة فوق البنفسجية.
- بشرة بتعاني من ظهور حب شباب.
- بشرة بتعاني من ظهور البثور السوداء.
-
3 ماسكات للبشرة الدهنية
-
ماسك الموز والحليب والشوفان
الموز غني بالعناصر الغذائية زي فيتامين أ وب وهـ والبوتاسيوم اللي بيساعد على ترطيب الوجه من غير ما يخلي مظهره دهني، أما الحليب فهو مرطب طبيعي ممتاز للبشرة. كل العناصر دي بتخلي الماسك مقشر طبيعي للبشرة الدهنية وبيساعدها تتخلص من الخلايا الميتة والرؤوس السوداء، لكن لو عندك حبوب ما تحطيش الماسك ده عليها علشان مايزودش تهيجها واحمرارها.
- طريقة عمل الماسك:
- اهرسي موزة مع معلقة كبيرة من الحليب ومعلقتين كبار من الشوفان، واخلطي المكونات كويس جدًا، وحطيها على وشك وهو نضيف.
- سيبي الماسك على وشك 20 دقيقة وبعدين اغسليه بالماء الفاتر.
- كرري العملية دي من 2-3 مرات في الإسبوع علشان تلاقي أحسن نتيجة.
-
ماسك النعناع لتفتيح البشرة الدهنية
خواص النعناع القابضة بتخليه “تونر” أو قابض للمسام رائع وعلاجاً مثالي للحبوب والبثور وحروق الشمس.
- طريقة عمل الماسك:
- حطي شوية من ورق النعناع في كوباية وصبي عليهم المياه المغلية وغطيهم لمدة ساعة.
- نضفي وشك كويس جدًا واستخدمي قطنة تحطي بيها التونر الطبيعي على وشك.
-
ماسك جوز الهند والعسل لتفتيح البشرة الدهنية
الماسك ده مميز جدًا، لإن مكوناته موجودة غالبًا في البيت على طول، والعسل وجوز الهند فيهم مواد مضادة للبكتيريا والفطريات، وده بيساعد على محاربة الدهون والزيوت اللي بتكون موجودة على البشرة.
- طريقة عمل الماسك:
- حطي 3 معالق صغيرة من زيت جوز الهند مع ملعقة صغيرة من العسل ومعلقة من البيكنج باودر، واخلطيهم في إناء صغير لحد ما العسل يلين ويسيح.
- حطي الماسك على وشك ورقبتك بشكل دائري للتقشير.
- سيبيه على بشرتك لحد ما تحسي إن البشرة امتصته، بعد كده اغسليه بالمياه الدافية، ونشفي وشك بفوطة نضيفة.
-
نصائح عامة للعناية بالبشرة الدهنية
- نظفي وجهك من 2-3 مرات يوميًا، بس ما تكتريش عن كده علشان ميحصلش جفاف لبشرتك.
- استخدمي تونر أو قابض للمسام خالي من الكحول زي ماء الورد.
- بعكس ما هو شائع، تحتاج بشرتك الدهنية للترطيب علشان الغدد الدهنية متفرزش دهون أكتر إذا كانت جافة، بس المهم يكون المرطب اللي هتستخدميه خالي من الزيوت ومش بيسبب الرؤوس السوداء، وبيحتوي على المياه كمكون أساسي فيه.
- احرصي على تقشير بشرتك مرة أو مرتين في الإسبوع لإزالة الأوساخ والدهون من مسام وشك.
- استخدمي الماسكات المخصصة للبشرة الدهنية بعد التقشير.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك