محتويات المقال
العيد على الأبواب، والعيد السنة دي له طبيعة خاصة. أظن إن عيد الفطر 2020 غير أي سنة، في ظل ظروف محيطة بينا كلنا وخصوصًا مع الكورونا، والتزامنا بالقعدة في البيت وقفل كل صالونات التجميل. مهما كان الوضع، فالعيد يستاهل الفرحة والاستعداد. العيد يعني تغيير تسريحات الشعر وملابس جديدة و ماسكات العيدأظن كلنا عندنا مستحضرات تجميل كيميائية بنستخدمها بشكل يومي أو حتى أسبوعي كجزء من روتين العناية بالبشرة. فكلنا عايزين ماسكات للوجه طبيعية، وحسب نوع الماسك هيكون مناسب لنوع بشرتك ولا لاء، يعني فيه ماسك للوجه يعطي نضارة، وماسك لتفتيح البشرة، وأخر لإزالة حبوب الوجه ..
علشان كده، في المقال ده جبنا لك مجموعة ماسكات للوجه وخلطات طبيعية للبشرة من عناصر موجودة في كل البيوت تقريبًا، سعرها منخفض وماسكات سهلة، وكمان مناسبة لأغلب أنواع البشرة .. تعالي نعرف مع بعض إيه هي ماسكات العيد للوجه اللي بتعطي نضارة.
1. ماسك طبيعي لإزالة الرؤوس السودا
- ربع كوباية من الفراولة المهروسة
- ربع كوباية لبن رايب أو لبن حليب
- الطريقة: اخلطي المكونين دول مع بعض وسيبيهم على بشرتك من 10 لـ15 دقيقة، وبعد كده اغسليه بالمياه الفاترة. الماسك ده من أروع الماسكات لمحاربة الرؤوس السودا، ده غير إنه لطيف جدًا على البشرة ومرطب وهتحسي بعده بنضارة واضحة على بشرتك. اعمليه مرتين في الأسبوع وهتلاحظي الفرق.
2. ماسك الطماطم للوجه للتخلص من المسام الواسعة
فيه منتجات كتير في السوق للمشكلة المسام الواسعة، لكن دايمًا نتيجها مؤقتة. لكن لو عايزه ماسكات للوجه ونتيجتها فعالة بتجارب ناس كتير فلازم تجربي ماسك الطاطم، هتلاحظي الفرق لأن الأحماض الموجودة في الطماطم لها تأثير في انقباض وغلق المسام بشكل واضح. بانصح بالماسك الطماطم لأنه أفضل ماسك للوجه لكل واحدة عندها مسام واسعة وبشرتها دهنية، لأن معاه، هتحسي إن فيه حتى تحكم في إفراز دهون البشرة.
- طماطم مهروسة
- قشر ليمون مجفف
- الطريقة: قشري قشر الليمون الأصفر بمقشرة البطاطس العادية وجففيها في الميكروويف أو الفرن الكهربائي. سهل جدًا وممكن تعملي كمية وتقعد معاكي. اخلطي الطماطم مع قشر الليمون وسيبيهم على بشرتك عشر دقايق. ولما تيجي تغسليه، افركيه من على بشرتك بالراحة كأنه مقشر طبيعي واستخدمي دايمًا المياه الفاترة، وهتلاقي السحر بعد ما تغسليه.
3. ماسك للوجه للتنظيف العميق
تنظيف البشرة العميق شيء بنحتاجه على الأقل مرة في الأسبوع. أهم عنصرين في التنظيف العميق هم الترطيب والتعقيم، لمقاومة أي بكتيريا ممكن تسمح بتكوّن حب الشباب. عشان كده، هتلاقي الماسك ده على قد بساطته إلا إنه قادر على توفير العناصر دي.
- 3 معالق عسل نحل طبيعي
- نص معلقة قرفة
- الطريقة: اخلطيهم وحطيهم على بشرتك من 10 لـ30 دقيقة، وده على حسب نوع بشرتك، كل ما كانت حساسة، قللي الوقت وكل ما كانت دهنية، خليه لحد نص ساعة، وما تزوديش عن كده لإن القرفة بطبيعة الحال مكون قوي وحار. وبعد كده اغسليه بمياه فاترة واعمليه مرة واحدة بس في الأسبوع.
كده أكون اديتك أسهل ماسكات طبيعية للوجه، مكوناتها سهلة جدًا وموجودة في البيت. وعشان ما تتهربيش من الاهتمام بنفسك بحجة إنك مش رايقة، اعملي خلطات الوجه دي دايمًا وانتي بتطبخي أو بتغسلي الأطباق. وكلنا بنقف في المطبخ أكتر من نص ساعة أكيد. فلو انتي عملتيه ووقفتي عشر دقايق لنص ساعة بتعملي الأكل أو حتى بتحضري الفطار، هتلاقي إنك اهتميتي بنفسك في عز اهتمامك بأسرتك وما قصرتيش مع نفسك أبدًا.. خليكي قوية وجميلة في العيد ودايمًا.
المصادر:
www.wassafaty.com
www.elle.com
www.marieclaire.com
التعليق باستخدام حساب فيس بوك