سؤال لاحظت إنه شاغل بال أطفال كتير ومتكرر واتسأل لأمهات كتير من ولادهم “ماما، انتي هتموتي إمتى؟” أو “هاعيش مع مين لما تموتي؟” وأسئلة تانية في نفس السياق، أوقات ممكن ناخد الأسئلة دي بهزار وأوقات تانية بنقول لهم “لا احنا مش هنموت دلوقتي” بس يا ترى إيه الإجابة اللي مفروض نرد بيها عليهم؟
أسئلة الأطفال المحرجة
الطفل لما بيسأل بيبقي مخه فيه أفكار كتير ومحتاج ترتيب ليها، محتاج يسمع مننا عشان يقدر يكون قناعته الشخصية عن أي موضوع، ومش معني إن بنتك أو ابنك يسألك “هتموتي إمتى” يبقى بالضرورة هو طفل مش حاسس بالأمان، لإن الطفل بيتعرض لفكرة الموت من كل حاجة حواليه من الكارتون، الحشرات لما بتموت، حتى الورد أو الزرع فالفكرة نفسها بتثير فضوله وبيبدأ يشكلها في عقله الصغير زي ما تساؤلاته بتوديه. عشان كده، لازم نجاوب بكلام مش محتاج يسمع غيره بإن كلامنا يكون حقيقي ومن غير تفاصيل زيادة لإن إنكار فكرة الموت أصلًا أو “إننا مش هنموت دلوقتي” ده مش كافي ولا مرضي للطفل.
اعرفي هنا ازاي تردي لو ابنك بيسألك أسئلة غريبة عن ربنا!
طيب نرد نقول إيه؟
الطفل مش محتاج يسمع غير إجابة بسيطة وصادقة، بإنك تقولي له أنا ما اعرفش هاموت إمتى ومحدش يعرف ده بيحصل إمتى لأن كل واحد له وقت في الدنيا بس اللي باعمله إني باخد بالي من صحتي وأكلي وباحافظ على نفسي على قد ما أقدر، وأنا معاك وجنبك على طول واحضنيه وطمنيه وشوفي لو عنده أي أسئلة تانية شجعيه يسألها ويقول كل اللي بيدور في عقله، عشان تعرفي هل فكرة الموت في العموم هي بس اللي عليها علامة استفهام عند الطفل ولّا هو شاف حاجة أو سمع عن وفاة حد مثلًا فقلقان ومحتاج شرح أكتر عن فكرة الموت.
ده غير إنك ما تربطيش الموت أبدًا بالسن زي “لما أبقي عجوزة قوي هاموت” لإنه مش حقيقي، أو بالمرض لأنه ممكن يوتر الطفل من أبسط الحاجات زي إنك يبقي عندك برد مثلًا أو حرارته هو تعلى. ودايمًا حافظي إن ردود أفعالك ما تكونش مبالغ فيها بالخضة أو التوتر من فكرة الموت عشان الطفل ما يخافش ويحس إنك في خطر ولا حتى إنك تضحكي قوي وتحكي للي حواليكي على السؤال ده، فالطفل يحس إنها حاجة لذيذة ومناسبة للفت النظر لما يحتاج.
مصادر:
child family development
jw magazine
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك