كل حاجة لازم تكون ممتازة، كل العلاقات لازم تكون على ما يرام، الولاد لازم يكونوا مبسوطين وأنا لازم أكون بخير، دي الصورة اللي عايشة طول الوقت باحاول أحقق المثالية، وأرسمها بدقة شديدة، لكن مفيش أي تفصيلة فيها بتتم زي ما بحب، لا كل حاجة ممتازة ولا علاقاتي على ما يرام ولا الولاد مبسوطين ولا أنا بخير!
مرض اسمه المثالية
اكتشفت أخيرًا إني مريضة بمرض اسمه المثالية، المرض ده بيخليني ما اقدرش أخلص أي شيء في ميعاده لأن مفيش شيء بيخلص بالطريقة اللي تخليني راضية عنها، ما باقدرش أسيب حاجة وأنقل على اللي بعدها. ولو نقلت، باكون حاسّة إني باكروِت وإني حد مش تمام ومش باكون سعيدة رغم كل المجهود اللي بذلته والتعب اللي تعبته عشان أنجز الشيء، سواءً كان شغل أو تنظيف أو تربية. مفيش مهمة في حياتي كاملة! ومفيش مهمة بتخلص تقريبًا! أنا في ستاند باي الـ 24 ساعة في الـ 24 ساعة والنتيجة:
- مش سعيدة
- مش مرتاحة
- مش باخلّص
- مش راضية عن نفسي
المصيبة الأكبر اكتشفتها مع الوقت، وهي إن رغبتي في المثالية خلتني أكون باقية على علاقات منتهية الصلاحية وبائسة جدًا، بل ومؤذية. لأن مفيش شيء في حياتي بينتهي ودايمًا في فرصة تانية ولأني كشخص مثالي شايفة نفسي طول الوقت أقدر أقدم أكتر وأعمل حاجات أجمل والعيب والتقصير أكيد من عندي مش من عند أي شخص تاني في الدنيا!
صدمة بسبب ابني!
من كام يوم فوقت لنفسي لما ابني قالي بصوت غضبان “ماما انتي بطيئة جدًا”!
يومها دخلت المطبخ عشان أحضر اللانش بوكس فما قدرتش أخرج من المطبخ غير وهو بيلمع، فتحت التلاجة وبدأت أرتبها وبدأت المع الحيطان والبوتجاز، وكل تفصيلة تاخدني لتفصيلة أدق لحد لما اتأخرت على المدرسة زي كل يوم والولد اللي لابس ومنتظرني زهق!
الشخص المثالي مش شخص دقيق وعظيم، الشخص المثالي شخص مريض بيتأخر لأنه ما بيقدرش يخلص شيء، بطيء لأنه ما بيرضاش عن أي خطوة، سخيف لأنه دائما غضبان ومش حاسس بالرضا وبيطلع ده على اللي حواليه.. الشخص المثالي شخص مؤذي جدًا!
محاولة التعافي من المثالية
اكتشفت مع الوقت إن المثالية اللي الناس بتشوفها حاجة عظيمة هي أسوأ شيء ممكن نقع فيه، حِمل متواصل ما بيخفش ولا بيهدي، ملفات مفتوحة في العقل ما بتتقفلش، شعور دائم وأبدي بالتقصير وتعاسة لا تنتهي .. المثالية مرض حقيقي معرفة الإصابة بيه هي نص العلاج. والنص التاني في محاولة الانتباه والتقليل قدر الإمكان.. ما زلت واقعة في المشكلة ما خرجتش.. باحاول لكن لسه ما اقدرش أقول إني ناجية.. حاليًا أنا خسرانة من كل الاتجاهات!
- المثالية خلتني تعبت صحيا لدرجة ما كنتش أتوقعها.
- المثالية خلتني أدخل عيادة طبيب نفسي أول مرة في حياتي.
- المثالية خلتني أهرب من مواجهة ناس آذتني لأني شايفة إن الموقف مش هينتهي زي مانا عاوزة حسب الكتالوج بتاعي.
- المثالية مخلياني أم عصبية ومتضايقة وغضبانة باستمرار.
ما زلت في محاولات التعافي من المثالية.. محاولات صعبة لكنها مش مستحيلة
التعليق باستخدام حساب فيس بوك