ماما من غير دراما: الحاجة اللي خلتني مميزة عند ابني

كتب في الورقة:

“My mom is so special for me, she plays with me and she is funny. Last week we went to wiggly jungle, we jumped on Trampoline together and played soccer game.”

الترجمة اللي مش حرفية: “مامتي مميزة جدًا بالنسبة لي، عشان بتلعب معايا وبتضحكني، الأسبوع اللي فات خرجنا ونطينا مع بعض على الترامبولين ولعبت معايا ماتش كورة”.

هو ما كتبش إني مميزة بالنسبة له عشان بأكّله وباشربه وباوديه التمارين مثلًا: “مع إنها حاجات أساسية”، هو ما كتبش غير اللي قلبه فاكره وحاسس بيه وبيفرحه بجد.

ساعات بنتخيل إن خدمتنا لولادنا ده تعبير عن حبنا وإنه بديهي وأصل لهم ويكونوا هم محتاجين حاجة تانية خالص، نبقى ماشيين احنا في سكة وهم محتاجين في سكة تانية خالص، محتاجين يحسوا بالمشاركة ويحسوا بروحنا بجد واحنا ناسيين العالم واحنا معاهم، مركزين معاهم وداخلين بكل روحنا جوا العالم بتاعهم. آه، مشاركتي معاه الحاجات دي مش دايمًا بتحصل ومش دايمًا بابقى قادرة أعملها وأيام كتير باكون مشغولة وأيام تانية مش رايقة ومش دايمًا بابقى الأم اللذيذة اللي بتهزر.

بس أنا مؤمنة إنه بجودة الوقت اللي بنقضيه معاهم مش بكميته، بجودة الذكريات وحلاوتها والضحك اللي من القلب فيها هو ده اللي بيتحفر ويفتكروه. ومؤمنة كمان إن المشاركة دي هي اللي ممكن تحافظ على صداقتنا لما يبقى في سن المراهقة وله عالم بتاعه.

بس على الأقل، ممكن أفضل وقتها “الشخص المميز” اللي بيقبله وبيشاركه مهما حصل، فيلجأ لي لما يحتاج صاحب!

ممكن تبقى حاجة صغيرة بالنسبة لنا بس كبيرة قوي وبتفرق كتير معاهم وفي قربهم مننا. عشان كده، دايمًا بانصح الأمهات بالكواليتي تايم أو الوقت الخاص مع أولادهم لإنه حقيقي حل سحري لحاجات كتير.

جربوا كل كام يوم تدخلوا تعيشوا معاهم جوا العالم بتاعهم، هتلاقوه جميل وبريء وملون ومليان ضحك، هتفصلوا وتتبسطوا وتبنوا credit كبير في القلوب الصغيرة.