بعد ما بدأنا نطمن لاحتواء فيروس كورونا، واتخاذ الاجراءات المناسبة للوقاية منه، وانتشار لقاح كورونا وزيادة عدد الناس اللي أخدوا اللقاح، سمعنا عن متحور جديد اسمه “دلتا”، والحقيقة إن كلنا قلقنا، واللي زود القلق إن انتشرت إشاعات كتير عنه، فعلشان كده هنقولك في المقال ده كل المعلومات اللي مجتاجة تعرفيها عن متحور دلتا، علشان تعرفي تتعاملي مع الموضوع ازاي:
-
إيه هو متحور دلتا؟
هو متحور عن فيروس كورونا، مشكلته الأساسية انتشاره السريع جدًا، واللي نسبة الانتشار بتاعته أعلى من فيروس كورونا، وموجود حاليًا في 142 بلد حسب تصريحات منظمة الصحة العالمية.
-
إيه مدى عدوى متحور دلتا؟
بيصنف متحور دلتا بإنه “شديد العدوى” بالإضافة لمشكلة سرعة انتشاره.
-
إيه أعراض متحور دلتا؟
الأعراض هي خليط من أعراض كورونا المعروفة زي:
- سعال جديد مستمر.
- ارتفاع شديد في درجة الحرارة.
- فقدان أو تغير حاسة الشم أو التذوق
مع بعض الأعراض الجديدة زي
- سيلان الأنف
- الصداع الشديد
- فقدان الشهية
- القشعريرة
-
إيه الاجراءات الاحترازية اللي ناخدها مع متحور دلتا؟
لحد دلوقتي هي نفس الاجراءات الاحترازية لفيروس كورونا، اللقاح والكمامات والتعقيم وتجنب الأماكن الزحمة.
-
هل لقاح فيروس كورونا هينفع مع متحور دلتا؟
لحد دلوقتي آه، علشان كده أخد لقاح كورونا مهم جدًا، ولازم الجرعتين يتاخدوا من اللقاحات اللي اعتمدتها منظمة الصحة العالمية، ومعروف إن اللقاح مش بيمنع الإصابة بنسبة 100%، بس في حالة الإصابة لا قدر الله، بتكون الأعراض ونسبة الخطر أقل بكتير من لو الشخص المصاب مش متطعم، لكن لو تمت الإصابة مهم جدًا تتابعي مع الطبيب حتى لو انتي حصلتي على جرعتين اللقاح.
-
هل متحور دلتا بيستهدف الأطفال فعلًا؟
طلعت إشاعة الفترة اللي فاتت إن متحور دلتا بيصيب الأطفال أكتر من الكبار، وجروبات الأمهات على السوشال ميديا قعدوا يقولوا قعدوا الأطفال من الحضانات، وبعضهم طالب إن الدراسة تتأجل أو ترجع أونلاين في الموسم الجاي للمدارس، لكن الحقيقة إن متحور دلتا مش بيستهدف الأطفال أكتر من الكبار ولا حاجة، لكن هو علشان سريع الانتشار فنسب الإصابة بيه زادت في كل الفئات ومنها فئة الأطفال، وبرضه أكتر الفئات اللي بتصاب بيه هي الفئات اللي ما أخدتش لقاح كورونا، واللي منها فئة الأطفال.
-
إيه طرق الوقاية من متحور دلتا؟
أكتر أماكن فيها معدلات خطر الإصابة بمتحور دلتا، هي الأماكن العامة، علشان كده لازم نلتزم بالحاجات دي:
- تجنب الأماكن المزدحمة، ويجب الحفاظ على مسافة التباعد عن الآخرين.
- يجب الحفاظ على التهوية الجيدة في جميع المساحات الداخلية (مثلاً بمجرد فتح النوافذ).
- ارتداء كمامة في الأماكن العامة عندما يكون هناك انتشار للعدوى في المجتمع اللي انتي متواجده فيه، وإذا كان التباعد الجسدي غير ممكن.
- اغسل يديك بانتظام بالصابون والماء، أو بفرك اليد بمادة كحولية.
- الحصول على لقاح فيروس كورونا المعتمد من منظمة الصحة العالمية.
-
فترة العلاج
زي فيروس كورونا، متحور دلتا بياخد أسبوعين من الراحة وبروتوكول العلاج عشان يخف.
-
العلاج
لمعرفة العلاج، برجاء زيارة صفحة وزارة الصحة المصرية.
-
إيه هو دلتا بلس؟
هو طفرة في متحور دلتا، لكن لسا مفيش معلومات عنه لإن انتشاره كان في أعداد منخفضة نسبيًا.
مع تمنياتنا ليكي ولأسرتك بالصحة والسلامة.
هل الحامل والمرضع تاخد لقاح الكورونا ولا لا؟
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر:
التعليق باستخدام حساب فيس بوك