تعليم الطفل التحكم في نفسه وتدريبه على دخول الحمام هي مهارة زي أي مهارة بنعلمها له، زي المشي والكلام وغيرهم. بس ده ما يمنعش إن البوتي تريننج هو البعبع اللي بيخوف أمهات كتير. وكتير بيشوفوا إنه من أصعب المراحل في حياة البيبي. وتفضل الأم محتارة ما بين تعليقات قرايبها واصحابها ما بين “اتأخرتي في تدريب ابنك على الحمام ليه؟” وبين “مستعجلة على إيه؟”
الدراسات بتقول إن الطفل يقدر يتحكم في عملية الإخراج من سن 18 شهر لسن 3 سنين. بس ده ما يمنعش إن كل طفل مختلف عن التاني، وقدرة التحكم بتختلف بين الأطفال. فيه علامات تعرّفك إن طفلك مستعد إنه يتخلص من الحفاض/الدايبر. من العلامات اللي لما ألاحظها على طفلي، أقدر ابدأ معاه بوتي تريننج:
- يبدأ في الاهتمام إنه يدخل معاكي انتي والأب الحمام ويكون عنده فضول بتعملي إيه ويسأل عن الموضوع. ممكن وقتها تستغلي الفرصة وتبدأي تحكي له قصص عن البوتي تريننج وتمهدي له الموضوع بطريقة بسيطة وتحببيه في إنه كبر وهيتخلص من الحفاض/الدايبر.
- لو بدأ يغير عدد أقل عن الأول وبدأتي تحسي إن الحفاض/الدايبر نضيف وناشف لمدة أكتر من ساعتين أو ممكن يصحي الصبح ناشف تمامًا، فدي علامة قوية تعرّفك إنه مستعد.
- لما تلاحظي إن بقى ليه مواعيد منتظمة زي مثلًا بعد الغدا على طول أو الصبح أول ما يصحى، فممكن تبدأي تدخليه التويلت بسرعة في المواعيد دي.
- لما يبدأ يقرف من الدايبر لما تكون مش نضيفة ويبدأ يشاور عليها ويحاول يقلعها أو يبدأ يستخبى في مكان أثناء الإخراج. ولو بقى يقدر يعبر بالإشارة أو الكلام إنه متضايق ومحتاج يغير.
- لو طفلك بدأ يظهر استقلاله ورغبته إنه يعمل أي حاجة بنفسه بس بشرط ما يكونش فيه تغييرات كبيرة في حياة الطفل زي مثلًا الانتقال لبيت جديد، أو دخول حضانة جديدة، أو سفر الأب.
- المهارات الحركية مهمة في مرحلة التدريب على الحمام. مهم إن طفلك يكون بيقدر يقعد ويتحرك من غير مساعدتك ويقدر يقعد على كرسي وينزل لوحده.
- وأخيرًا إن طفلك يكون بيفهم الأوامر اللي بتقوليها وبيحاول ينفذها وبيقدر يقلع ويلبس ملابسه الداخلية اللي تحت لوحده. وقتها هيقدر يتجاوب معاكي في إنه يقعد على التويلت ويقوم يغسل إيده ويكون فاهم الخطوات اللي بتعلميها له.
وفي الآخر، بنحب نفكرك بضبط النفس وبخطورة الزعيق والصريخ في مرحلة التدريب على الحمام. عارفين إن التدريب مجهد وأوقات بياخد وقت أطول. بس ضروري إنك تراعي الفروق الفردية بين الأطفال من غير ما تقارنيه بحد من أخواته وسرعة تدريبه. اعتمدي على التشجيع والهدايا والتصقيف واديله وقته من غير توتر وما تنسيش تأمّني البيت كويس عشان الكام مرة اللي مش هيلحق يسيطر على نفسه فيهم ما يسبب لكيش ضيق وعصبية.
التعليق باستخدام حساب فيس بوك