أوقات كتير في بداية الزواج ولأسباب مختلفة بتتعرض العديد النساء للإجهاض ممكن توصل لكذا مرة قبل ما يحصل ثبات للحمل وتكمل شهوره التسعة، يعني نقدر نقول إن الإجهاض المتكرر حالة شائعة، اللي بيحصل إن جدار الرحم بيوصل لدرجة من السمك بتخليه قادر على حماية الجنين وتأمين احتياجاته خلال فترة الحمل، علشان كدة أوقات بيلجأ الأطباء أن الحامل تأخد مثبتات الحمل كمساعدة للرحم على حماية الجنين ومنع الإجهاض.
في الطبيعي جسم الحامل بيقوم بإفراز هرمون البروجسترون لتهيئة الرحم لاستقبال الجنين، ولكن في حالات خاصة زي تكرارحدوث إجهاض أو وجود خلل في مستويات البروجستيرون هنا بيتم إستخدام هرمون البروجسترون البديل كعلاج لتثبيت الحمل والحفاظ عليه من الإجهاض، لأنو وظيفة مثبتات الحمل الأساسيةهي زيادة سماكة بطانة الرحم الداخلية لإحتواء الجنين بقوة وتأمين الاحتياجات المطلوبة لمراحل نمو الجنين في الرحم.
طيب يجي هنا السؤال:
امتى الحامل تاخد مثبتات الحمل؟
حبوب تثبيت الحمل بتتاخد في شهور الحمل الأولى، وفيه أوقات بتتاخد قبل حدوث الحمل خصوصا لو حالة المريضة بتعاني من نقص في إفراز هرمون البروجسترون، اللي بيحصل إنه العلاج بهرمون البروجسترون قبل الحمل بيساعد على منع حدوث الإجهاض واستكمال مرحلة الحمل دون خطر عليه، لأنه بيقوي بطانة الرحم وبيزود من سماكتها، فلما يحصل تلقيح للبويضة تقدر تنغرس بسهولة في البطانة، الطبيعي إن في الأسابيع الأولى من الحمل المبيض بيفرز هرمون البروجسترون، وبعد كدة في الأسبوع العاشر بيتم إفرازه من المشيمة، ولكن في حالة معاناة الأم من نقص في معدل إفراز هرمون البروجسترون ساعتها لازم تاخد وحدة من مثبتات الحمل بس طبعا تحت إشراف الطبيب.
إيه هي أنواع مثبتات الحمل؟
- حبوب تثبيت الحمل الدوفاستون: اللي بتستخدم في تقوية بطانة الرحم وتثبيت الحمل وتقليل مخاطر وقوع إجهاض.
- حقن تثبيت الحمل: اللي بتتكون من هرمون الإستروجين والبروجيسترون، واللي بيعملوه الإتنين هو زيادة سماكة بطانة الرحم لدعم إنغراس وتثبيت البويضة في جدار الرحم.
- اللبوس/التحاميل المهبلية: اللي هي كمان بتحتوي على هرمون البروجسترون،ودي بيتم استخدامها عن طريق المهبل برضه لزيادة سماكة بطانة الرحم، وممكن يستمر استخدامها لمدة 10 أسابيع أو حسب إرشادات طبيبك. ولازم تعرفي أنه مينفعش تسخدميها لو فيه ارتفاع ضغط الدم خلال الحمل والإصابة بمرض سكري الحمل والربو.
- حبوب هرمون البروجسترون: ودي بيتم استخدامها بعد حدوث الحمل لمعادلة نسبة هرمون البروجسترون في جسم الأم الحامل، وخصوصًا لو هي بتعاني من تكيس المبيض أو حصل نزيف في الثلث الأول من الحمل.
هل فيه أثار جانبية لمثبتات الحمل؟
زي ما قولنا قبل كدة مثبتات الحمل بشكل عام بتحتوي على هرمون البروجسترون، لكن زي أي عقار دوائي بيكون له أثار جانبية، بس طبعا الأثار الجانبية دي مش مشتركة، إنما بتختلف حسب إستجابة جسم كل سيدة، بس في العموم الأثار الجانبية دي لو ظهرت عندك لازم تقولي لطبيبك مباشرة :
- الدوخة والصداع: مثبت الحمل دواء هرموني علشان كدة من الطبيعي أن في سيدات يحسوا بالدوخة والصداع نتيجة خلل الهرمونات الحاصل بسبب الجرعة وخاصة مع الدوفاستون.
- اضطرابات هضمية: زي الغثيان والإقياء،لو حسيتي بكدة في الأول وبعد كدةالشعور إختفى فده طبيعي، لو الموضوع استمر ساعتها لازم تقولي لطبيبك.
- آلام في الثدي:زي ما قولنا تأثير الدواء الهرموني على التوازن الهرموني ممكن يخلي المريضة تحس بشوية آلام في الثدي.
- اضطرابات في المزاج والشهية: وده بيحصل لنفس السبب أنه دواء هرموني فبيأثر على مزاج وشهية الحامل.
- الحساسية: أي دواء في الدنيا ديما بيحمل إحتمالية إن الشخص اللي بتناوله قد يكون عنده رد فعل تحسسي إتجاه مكونات الدواء، لو حصل معاكي بعد تناول المثبت لازم توقفيه فورا وتتصلي بطبيبك .
طرق تثبيت الحمل طبيعيا
الطرق الطبيعية لتثبيت الحمل في حالة وجود تاريخ من الإجهاض المتكرر مش كفاية لاستمرار الحمل، إنما لطرق الطبيعية تعتبر وسيلة مساعدة فقط بجانب العلاج الدوائي الموصوف للأم الحامل، ومن أهم طرق التثبيت الطبيعية هي:
- الفاكهة: خصوصا التفاخ والموز لكن طبعا بشكل معدل، لأنهم بيزودوا الأم والجنين بكمية كبية من الألياف والفيتامينات وفي نفس الوقت مصدر طبيعي للسكر واللي بدوره هيجنب الأم تناول سكر صناعي.
- السلطات: الفيتامينات الموجودة في الخضروات بتساعد في تحسين نمو الجنين وحمايته، علشان كدة لازم على الأم الحرص على تناول أنواع من السلطاتوتحرص إنها تحوي على الخيار والجرجير لأن هذه الخضروات تحمي من الإجهاض.
- الابتعاد عن الألبان الدسمة: من المهم الابتعاد عنها لأنها غنية بهرمون البرولاكتين اللي يضعف الحمل ميمكن يكون سبب في الإجهاض.
- تناول الأسماك: الأسماك من المصادر الطبيعية للأوميجا 3 والزنك اللي بدورها بتعمل على تثبيت الحمل.
- حمض الفوليك: اللي هو فيتامين B9 ده من أهم المكملات اللي بتتوصف في الثلث الأول من الحمل لأن الفيتامين ده بيحسن من نمو الجهاز العصبي للجنين وبيقوي النخاع الشوكي عنده وبالتالي بيحمي من الإجهاض نتيجة التشوهات الخلقية الي ممكن تحصل للجنين بسبب نقص B9 ، وهو موجود بشكل رئيسي في الخضار الورقية الغامقة زي السبانخ والبيض والكبدة والبقوليات.
كلمة أخيرة:
زي ما قولنا إن علشان الحمل يثبت محتاج أدوية وبرضه طرق طبيعية فيه مجموعة نصائح إضافية مفترض تكون أسلوب حياة،لكنها في نفس الوقت فعالة في تثبيت الحمل، زي مثلا :
- التوقف عن التدخين: لأنه في بداية الحمل بيؤثر بشكل سلبي على نمو الجنين ممكن توصل لتشوهات خلقية في بداية تشكيل أجهزته الرئيسية زبتالي نوصل للإجهاض.
- شرب سوائل كافية: من المهم للحفاظ على الحمل تناول كميات كافية من المياه والسوائل التانية زي العصائر الطبيعية الفريش لأنهابتساعد على التخلص من السموم من الجسم وبتقوي مناعة الجسم ضد الأمراض.
- ممارسة الرياضة اليومية: مش مطلوب رياضة عنيفة، مجرد نص ساعة في اليوم بيساعد على تنشيط الدورة الدموية للأم والجنين.
- التقليل من الكافيين: الكميات الكبيرة من الكافئين ممكن تؤثر بشكل سلبي على نمو الجنين علشان كدة كوباية واحدة كفاية في اليوم.
- الحفاظ على الوزن: من أهم الحاجات اللي بتوفر بيئة صحية ومناسبة لنمو الطفل هي محافظة الأم على وزن صحي خلال الحمل لأن زيادة الوزن من الممكن أنها تضغط على الرحم وتؤثر بالسلب على الجنين.
- البعد عن القلق والتوتر: القلق والتوتر بيسبب في إفراز هرمونات ممكن تؤثر بالسلب على الجنين علشان كدة من المهم جدا إنك تخفظى على هدوء حواليكي.
وفي الأخر نتمنى لك رحلة حمل ناجحة وأمنة.
التعليق باستخدام حساب فيس بوك