محتويات المقال
بعبع الثانوية العامة اللي تقريبًا مفيش حد في مصر مننا كأهالي ما عداش بيه، سواءً بقى مع ولادنا أو معانا احنا شخصيًا أيام زمان، فكلنا تقريبًا فاهمين يعني إيه “ثانوية عامة” وكمية التوتر وتحديد المصير اللي بيتوقف على النتيجة أو بمعنى آخر اللي بنكون متخيلينه وقتها. لو ابنك أو بنتك ما جابش المجموع اللي بيتمناه في الثانوية العامة 2022 (مجموع الثانوية العامة) ومتخيل إن ده نهاية الدنيا وإن أحلامه وقفت عند الدرجة اللي في الورق، اعرفي إن دور البيت هو الأساس في دعم الابن وتشجيعه للي جاي من حياته هو الأهم.
أدعم بنتي\ابني ازاي بعد مجموع الثانوية العامة 2022
-
خليكي في ضهره مش واقفة في وشه
طبيعي نكون كأهل زعلانين على المجهود والوقت اللي عدينا بيه كلنا فترة الثانوية العامة، بس في الآخر ولادنا مش جايين يحققوا حلم فاتنا، فدوري هنا إني لبعض الوقت أركن مشاعري على جنب وأكون داعمة بجد، أنا والأب، نقدّر مشاعرهم من غير لوم مالوش لزوم “ما أنا ياما قلت لك ذاكر” \ “لو كنت سمعت كلامي ودخلت أدبي كان زمانك في حتة تانية”. مش وقت خالص إننا نثبت وجهة نظرنا الصح، دلوقتي مش وقت أي حاجة غير إقرار وتقدير لمشاعرهم وبس.
-
إيه البديل؟
أخدنا وقت في الزعل خلاص، يبقى ندور على حل أو بديل، هل فيه فرصة أعملها تزود درجاتي زي التظلم مثلًا لو حاسّين إني مظلوم.
-
اللي حصل حصل بس اللي جاي لسه ما حصلش
اللي قال إن الثانوية العامة ده عنق الزجاجة يبقى غلطان، لأن الدنيا اللي هيشوفوها بعد كده بتحدياتها بمسؤولياتها أكبر بكتير. دورنا إننا نفتح الدنيا دي قصاد ولادنا، نساعدهم يستكشفوا نفسهم، نساعدهم يشوفوا فرص تدريب أو شغل في الصيف ويفهموا اهتماماتهم ونقاط قوتهم اللي تخدم على اختيارهم للكلية المناسبة.
-
وهم كليات القمة
أنا دكتورة (طبيبة أسنان) وجاية لكم من المستقبل وباقول لكم إن ده وهم فعلًا. في الآخر اللي بينجح ويتميز بجد هو اللي قادر يطور نفسه باستمرار، اللي عنده شغف يتعلم كل يوم حاجة جديدة، اللي جرب ودرس هنا وهناك ولقى نفسه في حاجة ونوّر فيها.
-
النجاح شبه مين؟
الصورة النمطية المعتادة للنجاح اتغيرت وده اللي لازم نوصّله لولادنا ويوصل لنا قبلهم. النجاح مالوش شكل ولا لون لكن له طعم واحد، كلنا بنحسه لما بنقع ونعافر ونفشل ونكمل فننجح. دي المعادلة الطبيعية للنجاح. فلو مجموع ابنك في الثانوية العامة مخليه يتخيل إنه مش هينجح ولا يوصل لحلمه، دوركم كأهل تدوروا معاه على طريق تاني وتالت ورابع يوصل بيه لحلمه أو يمكن الحلم ده يتغير وهو ماشي في الطريق، مش مهم. المهم إنه يبقى واثق في قدراته ويكمل معافرة.
التعليق باستخدام حساب فيس بوك