محتويات المقال
“اللي ما عملش دور وحش” ده كان وصف معجبين الفنان محمد فراج في تعليقهم على آخر مسلسل له في رمضان 2021: مسلسل لعبة نيوتن. والجملة دي بصراحة مش هتدي له حقه لإنه مش بس ما عملش دور وحش، محمد فراج عبقري وكل دور له بيبقى أحلى من التاني، فنان جوكر قادر يعمل شخصية بمية صفة تخليك تتعاطف معاه وتحبه، حتى لو عامل دور الشرير. السنة دي ظهر في دور جديد مبدع في لعبة نيوتن وهو أستاذ مؤنس المحامي اللطيف اللي بيحب كل الناس وبيساعد كل الناس: دحلاب كده دحلاب ويخش لك من ثغراتك يا واد يا مؤمن D: وكمان عمل دور خاين الوطن في مسلسل الاختيار 2 اللي عامل نفسه مهندس محترم وهو عنصر إرهابي خطير وكريم زوج سلمى اللي بتقوم بدورها نيللي كريم في مسلسل ضد الكسر اللي بيخونها مع أخت صاحبه ودي أهم أعماله اللي خليتنا نحبه.
مؤنس في لعبة نيوتن رمضان 2021
محمد فراج لعبة نيوتن رمضان 2021
ما ينفعش نتكلم عن أهم أعمال محمد فراج من غير ما نتكلم عن شخصية مؤنس، المحامي الغني اللي ظهر لهنا (اللي بتقوم بدورها منى ذكي) في اسوأ حالاتها، وأنقذها لما كانت تعبانة وفضل جنبها وساعدها، جاب لها شغل معاه وعرّفها على مراته، وكمان عرض عليها تعيش معاهم في بيته: مصريين بقى في الغربة وكده! لحد ما هيظهر على حقيقته وهنلاقيه شخصية مترصدة مهووسة بهنا، بيعترف لها إنه بيحبها وبيخاف عليها وكمان بيهدد بيج زي.. بعد ما هنا ولدت وأخدوا منها ابنها ولجأت له، هنلاقيه رجع تاني لدور المنجد اللي هينتشلها من الضياع، وبيعيّن لها أحسن محامي في أمريكا ويجيب لها لبس عشان ابنها يشوفها حلوة.
آدم في قابيل
محمد فراج – آدم في قابيل
آدم الشاب الغني اللي كان عايش حياة مرفهة وأدمن المخدرات واتغلّب على الإدمان واتحوّل لمعالج نفسي وبيقابل سما (أمينة خليل) في جلسة علاج نفسي وبيتفقوا يقتلوا كل الناس اللي أذتهم في حياتهم، زي مراته اللي بتخونه وبيتحول لشخضية سيكوباتية مهووسة بالقتل والانتقام.
العسكري هلال فيلم الممر
محمد فراج – العسكري هلال فيلم الممر
هلال العسكري الشجاع اللي قلبه ميت، الصعيدي الأصل اللي عمل أشهر لقطة في الفيلم لما كان واقف قلبه ميت قدام أسطول طيارات العدو بالبندقية وبيحاول يضرب، وكان رده إنه مش مهم يوقع طيارة، المهم إن عدوه يشوفه شجاع.
علي بحر في أهو ده اللي صار
علي بحر في أهو ده اللي صار
الملحن الموهوب، البارع في العزف على العود، العاشق لنادرة، اللي رفض يتجوز حب حياته عشان بتحب غيره، بس عاش عمره كله يحبها. وزي ما قال “اللي انشغل قلبه، ما يملكش إلا الانتظار!”
علي الروبي تحت السيطرة
تحت السيطرة – محمد فراج
علي الروبي طرح مأساة ناس كتير موجودة في الواقع ومحدش يعرفها. الشاب اللي بيضيع حياته على إدمان المخدرات، وبيسرق فلوس أهله ويضرب هانيا (جميلة عوض) وممكن يعمل أي حاجة عشان خاطر المخدرات، وبالرغم من فشله وشخصيته لكنك بتتعاطف وبتشفق على حياته اللي ضيعها.
التعليق باستخدام حساب فيس بوك