محتويات المقال
في أول سنة من عمر البيبي، مش بس تطوره الجسدي بيكون سريع وملحوظ، لا ده كمان نموه النفسي والعاطفي بيبدأ يتكوّن ويتشكل معاه ويتطور من شهر للتاني. عشان كده، مهم قوي نبقى مركزين كمان في الجزئية ده وما نستهونش بيها، مش بس تركيزنا يكون في يقعد وللا يسند وللا ياكل امتى.
أهمية التلامس
من يوم الولادة، وبيبدأ تطور البيبي العاطفي والنفسي من بعد أول دقيقة خارج رحم الأم. عشان كده، الدراسات الحديثة بتنصح بأهمية إن جسم الطفل يلمس جسم الأم بعد الولادة على طول لإن التلامس ده بيزود إفراز هرمون الأوكسيتوسين واللي بيسموه كمان هرمون الحب وده بيساعد كتير علي تهدية البيبي وزيادة إحساسه بالأمان. ده غير طبعًا إنه بيقلل نسبة دخول الأم في اكتئاب بعد الحمل.
مشاعر الطفل في الشهور التلاتة الأولى
أول 3 شهور في حياة البيبي بيكون عنده المشاعر الأساسية المولود بيها هي الفرحة والزعل بس لما بيحس بعدم راحة واللي بتبقي موجودة تلقائي بدون إدراك منه، لكن مش بيكون لسه عنده أي مشاعر خوف وإحباط أو غضب أو غيرها من المشاعر اللي بيكتسبها مع الوقت.
بس المفاجأة إن البيبي مش بيكون عنده ارتباط عاطفي بالأم أول 3 شهور، بيكون بيستمتع لما بيشم ريحتها، بيتطمن لما يسمع صوتها لكن من غير مشاعر حب لإنه حتى بيكون مش مدرك إنه بني آدم منفصل عنها، عشان كده أول 3 شهور بيكون الطفل عنده احتياج دائم لمس جسمه لجسم الأم لإنه بيساعد إنه بيهدي جهازه العصبي، وبيساعد كمان في تنظيم ساعته البيولوجية.
الشهر الرابع
بداية من الشهر الرابع بيبدأ النمو النفسي عند الطفل يتغير ويبدأ يحاول يعبر عن مشاعره وهو مدرك لده عن طريق العياط أو الضحك بصوت.
الشهر السادس
لما بيبدأ يقرب الطفل من الشهر السادس من عمره بنلاحظ عليه إنه بدأ يبقي مزاجه وحش moody وبيتحول فجأة من ضحك وروقان لعياط وقريفة. وده عشان بتبدأ مشاعره تطور وهو بيكون لسه مش قادر يتعامل معاها، وفي نفس الوقت يعبر عن احتياجه.
الشهر السابع
بداية من الشهر السابع بيبدأ الطفل يدرك إنه كيان منفصل عن الأم وهنا يتطور عنده نوع مشاعر جديد وهو “الخوف” بيبدأ يبين خوفه لما بيبعد عن الناس اللي متعود عليهم ويشوف ناس جديدة وده اللي بيبدأ عندها قلق الانفصال separation anxiety.
وكمان بيبدأ ينمو عنده مشاعر جديدة وهي “الغضب” اللي كان قبل كده بيكون عياط بسبب عدم راحة، لكن لما بيبدأ يتطور مشاعره ويفهم فايدة الغضب وإنه له تأثير علي اللي حواليه، بيبدأ يعبر عنها بصورة أكبر زي إنه يحدف اللعبة من إيده لما يزعل.
الشهر التامن للـ12
بداية من الشهر التامن للشهر الـ12 النمو العاطفي للطفل بينمو بصورة كبيرة وبيبدأ يعرف باقي أنواع المشاعر زي “الشعور بالذنب” لما يعمل حاجة غلط. عشان كده، احنا بنحس إنه فاهم إن ده غلط لكن الحقيقة بيكون لسه ما تطورش في مخه الجزء الخاص بترجمة الشعور لأفعال.
عشان كده، السنة الأولي مهمة جدًا في النمو العاطفي للبيبي وتأثيرنا واستجابتنا له والبيئة الهادية اللي حاطينه فيها ده من أكتر الحاجات اللي بتأثر على النمو النفسي للطفل وبتساعده على تطوير مشاعره بصورة صحية.
التعليق باستخدام حساب فيس بوك