محتويات المقال
هنبتدي مع بعض واحدة من أجمل وأصعب الرحلات اللي بتخوضها الست؛ رحلتها مع جنينها. خاصة وأن مرحلة تطور الجنين والحمل الشهر الأول من أهم المراحل لتفادي حدوث أجهاض. هنتكلم عن مراحل تطور ونمو الجنين في بطن أمه بالتفصيل، همّا الاتنين لوحدهم. منتهى التوحد ما بينهم، نفس ضربات القلب، نفس الدم، نفس الأكل، نفس الإحساس، اتنين عايشين جوا بعض.. بينهم قصة حب مع إن عمرهم ما اتقابلوا قبل كده. بس بينهم حب وشوق بيملى كل لحظة عايشينها مع بعض في الرحلة دي.. علشان كده هنجيب لك كل ملامح الرحلة دي من الشهر الأول من الحمل لحد الشهر التاسع في الحمل. فخلينا نبدأ مع بعض مراحل تطور الجنين والحمل الشهر الأول من بداية ما يظهر عليكي أعراض الحمل.
مراحل تطور الحمل في الشهر الأول بالتفصيل:
-
أول 3 أسابيع في الحمل:
لازم تعرفي إنك مش هتكوني عارفة إن فيه ضيف شرف عندك وخصوصًا في أول تلات أسابيع، انتي مش هتعرفي إلا لما تلاحظي تأخر في ميعاد دورتك الشهرية وتكون دي أول علامة من علامات وأعراض الحمل. وعمومًا دايمًا الأطباء بيعتبروا أول 3 أسابيع من الحمل مش محسوبة لأن التخصيب وثبات وتكوين الجنين في جدار الرحم بيظهر في الأسبوع الرابع بعد ما البويضة اتخصبت وخدت رحلتها للرحم وإنها تزرع نفسها وتثبت نفسها في جدار الرحم حتى إنك ممكن تلاحظي نزول بعض نقط الدم الخفيفة في غير ميعادها وده بيكون بسبب إن البويضة زرعت نفسها في جدار رحمك. زي ما قلت لك أول 3 أسابيع من الحمل، الأمور بتكون هادية جدًا والأكشن كله بيبدأ من الأسبوع الرابع، واللي انتي لازم تجهّزي نفسك له ولمدة مش أقل من تلات شهور.
-
الأسبوع الرابع في الحمل:
الأسبوع ده من أهم مراحل تطور الجنين والحمل الشهر الأول، هيشهد معاكي تغيرات كتير سواء على المستوى الجسدي أو العاطفي. اللي بيحصل هنا إن فيه دفعات كبيرة جدًا من هرمون HCG أو هرمون الغدد التناسلية المشيمية البشرية، اللي هيستمر لمدة 12 أسبوع بهدف دعم نمو الجنين في مرحلته الأولى اللي بتكون أشد مراحل الحمل خطورة وحساسية. اللي بيستقبل قنابل الهرمونات دي هو انتي وبيحصل فيكي مجموعة من التغيرات هارصدها لك، بس لازم تعرفي نقطة مهمة: التغيرات دي عامة، بمعنى إنها مشتركة بين كل الستات الحوامل ومافيش شرط إنها تتواجد كلها عند كل الستات. لأن فيه مجموعة محظوظة في هذا الكوكب مش بتعاني من أي حاجة تقريبًا في الفترة دي. بس خلينا نرجع للتغيرات اللي ممكن تحصل لك.
تغيرات الأسبوع الرابع من الحمل
- تقلب المزاج والإحساس المستمر بالغثيان.
- إرهاق عام ورغبة مستمرة في النوم.
- توّرم في الثدي ورغبة متكررة في التبول.
- الإحساس بطعم معدني غريب في الفم وده بيخليكي تزهدي الأكل، أو الميل الشديد لأكلة معينة اللي احنا بنسميه وحم.
- التغيرات العاطفية: ودي بتتقسم ما بين إحساس عام بالبهجة إنك حامل وبين إحساس شديد بالخوف والتوتر وهجمات من الأفكار السلبية زي الخوف إنك تفقدي جنينك، يكون فيه تشوه، هل هتقدري توفري له كل متطلباته؟ وغيرها كتير. وده غير متاعب الحمل الجسدية اللي بيكون لها تأثير سلبي على نفسيتك.
- آخر نقطة هتحتاجي تراعيها جدًا وأكتر من أي وقت فات في حياتك هو التغذية السليمة. لازم يكون جسمك متوفر فيه عناصر غذائية بنسب معينة علشان يقدر الجنين يسحب منها وتدعم عملية نموه، ومن أهم العناصر دي هي حمض الفوليك اللي طبيعي الطبيب بيوصفه لك كمكمل غذائي، بس في نفس الوقت لازم تتناولي الأغذية الغنية به زي البقوليات والأوراق الخضرا.
- اشربي مياه كتير مش أقل من 8 كوبايات.
- ابعدي عن الكافيين والسكريات الكتير لأن لها تأثير سلبي على صحتك وصحة جنينك.
- احرصي على تناول البروتين والدهون الصحية، وابعدي عن الأكلات السريعة على قد ما تقدري لأن فيها كميات كبيرة من الملح والدهون غير المشبعة اللي هتأثر بالسلب على صحتك وصحة جنينك.
- اشربي لبن على الأقل كوبايتين في اليوم.
- لو كنتي من المدخنات أو بتتناولي كحوليات، لازم توقفيهم تمامًا خلال فترة الحمل كلها.
دلوقتي بعد ما خلصت الجزء الخاص بيكي في رحلة الشهر الأول من الحمل، تعالي نعرف البيبي بيحصل فيه إيه في أول أريع أسابيع من الحمل.
مراحل تطور ونمو الجنين في الشهر الأول
- نمو وتكوين الجنين في الأسبوع الأول من الحمل:
إيه اللي بيحصل في الأسبوع ده؟! ولا حاجة! انتي في أول أسبوع من بعد انتهاء دورتك الشهرية. مفيش أي حاجة حصلت ولا حتى الجنين المنتظر تكوّن.. بس إصبري، الحركات كلها جاية من الأسبوع التاني.
- نمو وتكوين الجنين في الأسبوع التاني من الحمل:
هنا ابتدى جسمك يكوّن البويضة. المفروض تكوني عارفة مواعيد التبويض عندك بتكون في أيام إيه في الشهر وهي دي الأيام اللي تحرصي على إقامة العلاقة الحميمة فيها طالما بتستهدفي حدوث الحمل. مواعيد التبويض بتختلف من ست لست وعلشان تحدديها هتحسي فيها ببعض الآلام أسفل البطن مع ارتفاع خفيف في درجة حرارة جسمك. وتقدري تستعيني بأي أبلكيشن خاص بتحديد أيام التبويض من البلاي ستور لو كانت دورتك من النوع المنتظم، أو بطبيبك علشان تحددي أيام التبويض لو كانت دورتك من النوع غير المنتظم.
- تطور ونمو الجنين في الأسبوع الثالث من الحمل:
هنا حدثت العلاقة الزوجية، وتم التقاء الحيوان المنوي مع البويضة المستعدة للتلقيح واللقاء ده بيتم في قناة فالوب. التلقيح لا يتم إلا فيها. لو البويضة وصلت للرحم، مش بيحصل تلقيح. المهم تم التلقيح وبدأت البويضة المخصبة رحلتها إنها تزرع نفسها في جدار الرحم بعد ما خرجت من قناة فالوب. ممكن تلاحظي بعض نقط الدم في غير موعدها. دي هتكون علامة إن حصل حمل وإن الجنين المنتظر بدأ رحلته معاكي.
- تطور ونمو الجنين في الأسبوع الرابع من الحمل:
وصل وصل وصل! هنا جه وقت إعلان الخبر السعيد، وظهور الخطين البينك واضحين تمامًا في اختبار الحمل المنزلي، ومبروك المدام حامل، وكل ما أنتجته الدراما المصرية من مشاعر في اللحظة دي. في الأسبوع ده، بيبتدي يتكوّن كيس الجنين بطبقاته التلاتة واللي اسمه الكيس الأمينوسي واللي هيكبر ويتمدد مع الجنين خلال التسع أشهر ويتكوّن فيه السائل الأمينوسي اللي احنا هنسمّيه في الأخر مياه الولادة، مع طبعا مستودع الحياة الخاص بالجنين اللي اسمه المشيمة اللي هيكون دورها توصيل الغذاء والأوكسجين للجنين طول فترة الحمل.
بعد ما تعرفي أنك حامل مهم جداً تشوفي كيفية ممارسة العلاقة الحميمة أثناء الحمل.
خلصنا أول جزء من رحلة تطور الجنين والحمل الشهر الأول .. لسة قدامنا 8 أجزاء تانية هنتكلم على تفاصيلها في المقالات اللي جاية .. فاستنينا.
التعليق باستخدام حساب فيس بوك