وصلنا لأخر محطة. كل الشهور اللي فاتت كانت وسيلتنا علشان نوصل للشهر ده، شهر اللقاء. الشهر اللي أخيرًا هتنفصلوا عن بعض جسديًا بعد 9 شهور بتتنفسوا نفس الهوا، وقلبكم بيدق مع بعض، وحتى الدم اللي في عروقكم واحد. وهترجعي تاني زي الأول بس هترتبطي بيه بالرضاعة والحب والسهر. قصة حب هتعيشوها كل يوم وكل ساعة وكل دقيقة. تغيرات هتحصل في جسمك، كل عضلة في جسمك بتجهز نفسها للولادة، أوقات هتواجهك آلام في الظهر والبطن والأفخاد وحتى عنق الرحم. كلهم بيجهزوا وضعهم بحيث رأس الجنين تستقر في قناة الولادة، والجسم يخرّج الجنين في يوم الولادة. فتعالي نشوف حجم التغيرات اللي هتقابلك في الأسابيع دي.
مراحل تطور الحمل للحامل في الشهر التاسع:
تاسع الرحلة (بالنسبة لك)
- الأسبوع الخامس والثلاثون:
في الأسبوع ده وزنك زاد حوالي 13 كيلو، زيادة كبيرة على جسمك مسببة لك إحساس كبير بالتعب المستمر. السرة عندك بتبرز لأن حجم الجنين بيدفعها للخارج. هتحسي إنك بتدخلي الحمام كتير خلال النهار وبيزيد خلال الليل. ورغم كده، هتلاقي طبيبك بيطلب منك شرب المياه والعصائر الطارجة لأنها هتكون مفيدة جدًا للجنين. الضيق في التنفس مستمر. لو بتقودي سيارة، يُفضَّل دلوقتي توقفيها خصوصًا لو بدأتي تحسي بحالات عدم تركيز وتشوش في الرؤية.
- الأسبوع السادس والثلاثون
هتحتاجي في الأسبوع ده إنك تزوري طبيبك وتحددوا ميعاد الولادة بشكل تقريبي. الجنين بدأ يستقر في الحوض، جسمك كله متورم بسبب احتباس المياه، فاحرصي على لبس ملابس فضفاضة بخامات قطنية وابعدى عن الخواتم أو الأحذية الضيقة أو العالية. احرصي على الراحة والقعاد ورجلك مرفوعة.
- الأسبوع السابع والثلاثون
ممكن تحسي في الأسبوع ده بنزول الجنين للحوض بإحساس بالراحة شوية في التنفس. ضغط وزنه نزل كله في الحوض. فالضغط على الحجاب الحاجز أصبح أقل بكتير. قد يقوم طبيبك بعمل فحص لعنق الرحم لمعرفة مدى استعدادك للولادة.
- الأسبوع الثامن والثلاثون
خليكي مستعدة في أي وقت، جهزي شنطتك انتي والبيبي، رتبي أمورك مع الدكتور، اطلبي الدعم من زوجك ومن المقربين منك، اطلبي المساعدة في تجهيز بيتك لاستقبال المولود.
- الأسبوع التاسع والثلاثون
في الأسبوع ده هتحسي إن حجمك كبير جدًا، فعليًا رحمك كله نزل في الحوض استعدادا للولادة. مافيش تقريبًا وضع جلوس أو نوم مريح. غالبًا هتحسي ببعض الانقباضات اللي ممكن تحسي إنها ولادة بس ما تطلعش كده. هاقول لك إزاي تفرقي بينهم. آلام المخاض الزائفة (الطلق الكاذب) بتتركز في أسفل البطن وبتمد للأرجل. لكن المخاض الحقيقي هتبدأ الآلام من الظهر وتمتد للبطن. ومافيش أي وضع هتاخديه هيريحك: ساعتها هتعرفي إنك دخلتي في ولادة حقيقية.
- الأسبوع الأربعون
نزول السائل الأمينوسي منك معناها إن كيس الرحم اتفتح والولادة بدأت، خليكي هادية، بمجرد ما تدخلي الحالة دي، قللي الأكل اللي ممكن يسبب لك غثيان خصوصًا لو هتولدي طبيعي. إنما لو قيصري، فتحديد اليوم بيتم مع الطبيب وبتحضري نفسك قبل العملية بالامتناع عن الأكل لمدة 8 ساعات قبلها. وصولك للأسبوع ده يعني إنك دلوقتي مستلقية على سريرك والبيبي في حضنك. مبروك، كانت رحلة طويلة وفيها متاعب ومشاعر كتير. أظن وهو في حضنك إنك حاسة إن الموضوع كان مستحق للعناء ده كله.
تعالي قبل ما أسيبك أقولك إيه التطور اللي هيعيشه هو كمان في الأسابيع دي.
مراحل تطور الحمل للجنين في الشهر التاسع
تاسع الرحلة (بالنسبة له)
- الأسبوع الخامس والثلاثون
الجنين في الأسبوع ده وزنه وصل لـ2.4 كيلو جرام وطوله وصل لـ48 سم. بيتفاعل الجنين بقوة مع الأضواء والأصوات. السائل الأمينوسي بيقل من حواليه. وبدأ يحرك فمه بشكل تدريبي استعدادا للرضاعة بعد الولادة. الكلي والكبد بدأوا عملهم بكفاءة، الرئة بتكتمل، وجسمه بيكوّن دهون تحت الجلد للحصول على الدفيء بعد الولادة.
- الأسبوع السادس والثلاثون
وزن الجنين دلوقتي 2.7 كيلو جرام، طوله لسه زي ما هو 48 سم. من أول الفترة دي مافيش طفرات كبيرة بتحصل في النمو. الرئة اكتملت.
- الأسبوع السابع والثلاثون
استقر الجنين في أسفل الحوض، هو في وضع آمن دلوقتي، قولون الجنين بيجمّع الفضلات اللي ابتلعها الجنين خلال الشهور السابقة استعدادًا للتخلص منها على شكل براز أسود بعد الولادة.
- الأسبوع الثامن والثلاثون
زاد وزن الجنين في الأسبوع ده، وصل من 3 لـ 3.2 كيلو جرام، والطول لحوالي لـ50 سم، عظام جنينك بتزيد قوة والعملية دي اسمها التعظيم. في الوقت ده، لو حصلت ولادة مش هتقدري تحددي لون عين البيبي إلا بعد شهور لأنه بيتولد بيكون قريبة من اللون الأزرق.
- الأسبوع التاسع والثلاثون
في الأسبوع ده الوزن وصل لـ3.4 والطول وصل لـ51 سم. جلد الطفل القديم بيسقط في السائل الأمينوسي وده ممكن يسبب تعكر للون المياه دي. وبتتكوّن طبقة جلد جديدة على جسم الجنين.
- الأسبوع الأربعـون
أعتقد مفروض نسمي الأسبوع ده باسم أسبوع اللقاء، هنا الطفل في أتم حالة ليه، كل أعضائه مكتملة ومستعدة للعمل بكامل كفائتها. وبكده تكون خلصت رحلته معاكي.
على مدار 9 مقالات، رصدت معاكي كل التغيرات الجسدية اللي هتقابليها والتطورات اللي بتحصل للجنين في رحمك. أتمنى أكون ساعدتك تعرفي كل المعلومات اللي محتاجة لها. وتكوني سعيدة وانتي شايلة البيبي في حضنك علشان تبتدوا مع بعض رحلة جديدة هيكون دافعها وهدفها الحب بس.
التعليق باستخدام حساب فيس بوك