لو كنتي بتمري بتجربة الحمل لأول مرة، فأكيد الشهرين اللي عدوا كانوا مليانين مفاجآت ليكي. ما توقعتيش إن الرحلة فيها كل الكم ده من التغيرات اللي كان ليها تأثير على حياتك! وكل ده واحنا لسه في التلت الأول من الحمل. بس خلاص وصلتي الشهر التالت بالسلامة والجزء الأول من الرحلة قرّب يخلص. أنا معاكي النهارده هحكي معاكي إيه التغيرات اللي هتقابلك سواء على مستوى صحتك أو على مستوى صحة البيبي. فتعالي نشوف.
مراحل تطور الحمل للحامل في الشهر الثالث
تالت شهور الرحلة (بالنسبة لك انتي):
- الأسبوع التاسع: “باين حبيت.. أيوه أنا حبيت” الحمام.. هيكون ده حقيقي شعورك. مافيش جديد عن روتينك: انتي إما رايحة الحمام للتبول أو للقيء .. أي حد يسأل عليكي، انتي في الحمام، وأي مكان مافيش فيه حمام بالنسبة لك كأنه مش موجود .. بس إحنا مكملين.
- الأسبوع العاشر: “عايزة رنجة يا إبراهيم”. الأسبوع ده بيطغى عليه ظهور الوحم جدًا. وأغلب الوقت، شهيتك بتكون مايلة للحاجات المالحة والمسكرة في نفس الوقت. هتحبّي الحلويات والشوكولاتة والآيس كريم، وفي نفس الوقت الأسماك المملحة والمخلل. بس نصيحة: ما تكتريش من الأملاح ولا السكريات لأن الإكثار منهم له تأثير سلبي على صحتك وصحة جنينك.
- الأسبوع الحادي عشر: في الأسبوع ده، هتلاحظي إن كل مشاكلك الصحية اللي ظهرت لك في الحمل بدأت تقل بشكل ملحوظ. الجنين بيتحرك في بطنك فعلًا لكن انتي لسه مش هتحسي بده خالص. هو دلوقتي حجمه 3 سم بس، صغير جدًا، لكن هو دلوقتي شكله إنسان تمامًا. في الأسبوع ده هتلاحظي إن اللثة عندك بقت حساسة جدًا. علشان كده، يُنصح إنك تستخدمي فرشة أسنان ناعمة مع معجون مخصص للأسنان الحساسة علشان تخفف لك التعب. موضوع القيء الصباحي بدأ يقل بسبب إن هرمون البروجيستيرون قل في جسمك خلاص ورجع لمعدلاته الطبيعية. وهتلاحظي إن فيه اختلاف في مستوى رغبتك ما بين زيادة معدلات الجماع مع جوزك أو إحساسك إنك مرهقة وعندك عزوف عن العلاقة الزوجية. لو حسيتي بمغص في أسفل البطن بشكل متفاوت، هيكون طبيعي لأن الرحم بيتمدد علشان يحقق المساحة اللي طفلك محتاج لها.
- الأسبوع الثاني عشر: أخيرًا وصلتي لآخر أسبوع في التلت الأول من الحمل. صحتك اتحسنت جدًا وحاسّة بالنشاط أفضل من الأسابيع اللي فاتت. وزنك زاد بمعدل خمسة كيلو. هتلاحظي ظهور علامات التمدد على جلدك في منطقة الثدي والأجناب والبطن، ما تقلقيش ده طبيعي، جسمك بيتكيف مع الوضع الجديد. بعد الولادة شكلها بيتحسن كتير مع إمكانية استخدام مستحضرات متوّفرة في الأسواق بتحسّن من شكلها وبتدعم مرونة الجلد أكتر.
خلصتي التلات شهور الأولى خلاص. كانت بتتمحور كلها حوالين تجهيز جسمك وتعديله بالشكل اللي يناسب احتياج جنينك. جسمك دلوقتي متكيف جدًا، معدلات الهرمونات رجعت معقولة، عندك زيادة في كمية الدم في جسمك علشان يوصّل الغذاء والأوكسجين لطفلك، بشرتك وشعرك ظهر عليهم التوهج. استعدي للتلت التاني مع الحمل مع تغيرات ومواقف مختلفة. بس تعالي قبلها نعرف في الأسابيع الأربعة دي إيه شكل التغيرات اللي بتحصل لجنينك.
مراحل تطور الحمل للجنين في الشهر الثالث
تالت شهور الرحلة (بالنسبة لجنينك):
- الأسبوع التاسع (حبة عنب): هنا الجنين وزنه وصل لـ2 جرام، هو فعليًا حجمه قد حبة العنب، صغير جدًا وجميل جدًا. هتلاقي إن الراس انخفاضها ناحية الجسم قل وبدأت تترفع. العيون اتكونت بس لسه مقفولة بالجفون، الأذن الوسطى مستمرة في النمو في التطور. الأسبوع ده دراعه ورجله بتتكون بشكل كبير جدًا لدرجة إن صوابعه ابتدت تظهر في شكل نتوءات صغيرة. الفم والأنف مستمرين في نموهم لكن لسه ما وصلوش لشكلهم النهائي.
- الأسبوع العاشر (برقوق مجففة): في الأسبوع ده الجنين واصل وزنه لحوالي 5 جرام، وطوله حوالي 4.5 سم، حجمه قد البرقوقة المجففة. في الأسبوع ده، هتلاقي إن العيون شكلها بقى أوضح بس في نفس الوقت لسه مقفولة بغشاء لسه ما اتحولش لجفون. رسغ دراعه كبر. صوابع إيده ورجله اتكونت بشكل أوضح لكن لسه مرتبطة ببعض بغشاء رقيق. الأذن الداخلية اتكونت خلاص وبدأت أذنه الخارجية في التكوين. الحبل السري اتكون والمشيمة بدأت تاخد شكلها وفي حالة نمو وتطور. الدم بدأ في الدوران في دورته الدموية. أعضائه الداخلية مستمرة في النمو والنضوج.
- الأسبوع الحادي عشر (ليمونة خضرا): الأسبوع ده من الأسابيع السريعة. ممكن تسميه أسبوع العظام. الجنين في الأسبوع ده بيوصل وزنه لـ7 جرام. عموده الفقري اتكون وبدأت تظهر عظام القفص الصدري والحوض واتصالها بغضاريف موجودة في الفخد اللي سرعان ما هيتم تدعيمها بالخلايا العظمية وتتحول لعظام الفخد والحوض. رأس الجنين بتتحرك بشكل أوضح وحركات عفوية بتظهر في الدراع والأرجل وبتكون كلها أوامر عصبية جاية من النخاع الشوكى مش المخ. لأن المخ عضو معقد التكوين وبياخد سنين طويلة بعد الولادة لحد ما ياخد شكله النهائي. الهيكل العظمي مستمر في النمو، هيبدأ الجلد في ظهور تشعبات فيه بيمشي فيها مادة اسمها الميلانين (mélanine) وهي المادة المسؤولة عن تلون وتصبغ الجلد بعد الولادة.
- الأسبوع الثاني عشر (البرقوقة): الجنين دلوقتي وزن حوالي 45 جرام وطوله حوالي 10 سم. عينيه دلوقتي أخدت مكانها النهائي. نمو المشيمة اكتمل خلاص. لب العظام بدأ ينتج خلايا دموية والغدد التناسلية بدأت تفرز هرموناتها. لو الجنين ذكر هيكون القضيب بيتكون لكن هي مش متشافة. بدأ يظهر مع الخصيتين وبيفرزوا هرمون التستستيرون. الخصيتين مكانهم بيكون في أسفل جدار البطن، مش بتاخد مكانها الطبيعي خارج الجسم إلا كشكل من أشكال استكمال نمو البطن. ولو أنثى، فهي بتمتلك قناة فالوب ومهبل ومبيضين.
خلصنا الشهر الثالث واستعرضنا مراحل تطور الحمل ليكي كحامل ولجنينك. التلت الأول من الرحلة خلص. تعالي نستعد للتلت التاني لرحلة الحب ونعرف هتوصلوا مع بعض لحد فين. استنيني في المقال اللي جاي.
التعليق باستخدام حساب فيس بوك