وصلنا الشهر التامن. يمكن الشهر ده بتكون الأم وصلت لمرحلة كبيرة من التعب بتحسسها إن أي نشاط بيخلي كل حتة جسمها بتتعبها. الحقيقة إنك فعلًا بتكوني تعبانة. وزن الجنين زاد بشكل كبير بيوصل في آخر الشهر ده لإتنين كيلو جرام، والرحم بكل ما فيه ضاغط على معدتك وأضلاع قفصك الصدري. فيه ضغط كبير على المثانة مخليكي عايزة تدخلي الحمام باستمرار. جسمك في أكبر حالاته، علامات التمدد واضحة والدوالي ظاهرة في بطنك ومأثرة على البواسير. عارفة إنه شهر مجهد ليكي جدًا، بس انتي فاكرة في شهور الحمل الأولى لما كانت الهرمونات بتدفع الجنين للنمو السريع، هتلاقي إن برضه في الأسابيع دي إن معدل نمو واكتمال الجنين جنوني. كل يوم بمعنى كل يوم فيه نمو وتطور وتجهيز للولادة. الأيام دي غالية جدًا ومهمة جدًا لجنينك. بس خلينا نستعرض مع بعض تطور حملك وإيه اللي بيحصل معاكي خلال الشهر ده اللي بتمتد أسابيعه من الأسبوع الواحد الثلاثين وصولًا للأسبوع الرابع والثلاثين.
مراحل تطور الحمل للحامل في الشهر الثامن
ثامن الرحلة (بالنسبة لك)
الأسبوع الواحد والثلاثون
- في الأسبوع ده، هتحسي إن وزنك زايد عن أي وقت عدى. تحسي أوقات بنغز في الثدي وخروج بعض الإفرازات المايلة للأصفر. ده بيكون استعداد من جسمك لعملية تجهيز اللبن وبالتالي الرضاعة. رحمك كبير وبيضغط على أعضائك الداخلية. استمري على برنامجك الصحي، انتي بطلة.
الأسبوع الثاني والثلاثون
- هتحسي في الأسبوع ده إنك مرهقة دايمًا وعايزة تنامي خلال النهار. نامي وما تحاوليش تقاومي أو تحرمي نفسك من الراحة. هي مفيدة لجسمك وللجنين. زيارات الطبيب هتبقى كل أسبوعين وفي بعض الحالات كل أسبوع. تشنجات الظهر واسمها تشنجات أو انقباضات براكستون هكس: هي تدريب واستعداد من جسمك للولادة. البسي شراب داعم لرجلك لتقليل آثار الدوالي. ممكن تحسي بتسرّب بعض قطرات البول لو ضحكتي أو عطستي وده هيكون بسبب الضغط على المثانة. وقد تختبري بعض الحكة في البواسير.
الأسبوع الثالث والثلاثون
- في الأسبوع ده هتحسي إن الجنين بيتحرك كتير ومتجه لأسفل. هو في الفترة دي بيحاول يلاقي أكتر وضع مستقر له استعدادًا للولادة. وعادي على فكرة إن راسه ترجع لفوق تاني. هو دلوقتي بيتعاون مع جسمك استعدادًا للخروج. هتحسي إن إيدك ورجلك متورمين. وده بسبب احتباس المياه في جسمك. اشربي مياه وتناولي خضروات ورقية بهدف التخلص من المياه الزايدة في جسمك. في الأسبوع ده، من الآمن ممارسة العلاقة الحميمة أثناء الحمل. ممكن تحسي إنك مش مرتاحة، فهتحتاجي تتكلمى مع زوجك عن الوضع الأنسب ليكي، وفي نفس الوقت تحافظي على الحميمية معاه. تدليك رجلك من الحاجات اللي هتخفف الورم وتقربكم لبعض.
الأسبوع الرابع والثلاثون
- في الأسبوع ده هتلاقي إن عندك وجع في مفصل وعضلات الحوض، اللي بيحصل إن جسمك بيجهز للولادة، فالألم ده طبيعي جدًا. حجم بطنك كبير وبيضغط على أضلاع قفصك الصدري. تناولي وجبات صغيرة بشكل متفرق علشان ما تتعبيش في التنفس. في الأسبوع ده، ابتدي اتعرفي أكتر على الرضاعة الطبيعية وازاي تقومي بيها وإيه التحديات اللي ممكن تقابليها.
بوصولك للأسبوع ده، انتي كده الشهر التامن خلص بالنسبة لك. نصيحة ليكي: أيًا كانت طبيعة حملك، خليكي من دلوقتي مجهزة شنطة الولادة فيها كل احتياجاتك انتي والبيبي. اتكلمي مع جوزك وفهميه مفروض يتصرف إزاي لو جالك الطلق في أي وقت. تعالي دلوقتي نعرف إيه التغيرات الكبيرة اللي بتحصل للجنين في الشهر ده.
مراحل تطور الحمل للجنين في الشهر الثامن
ثامن الرحلة (بالنسبة للجنين)
الأسبوع الواحد والثلاثون
- أهلًا بالأسبوع الواحد والثلاثين. جنينك دلوقتي وزنه وصل تقريبًا لكيلو ونص وطوله وصل لـ40 سم. جسمه دلوقتي بقى متناسق: حجم راسه مع طول دراعه ورجله. هتحسي إنه بيقوم بحركات تمدد لإيده ورجله. ودي حركات تهدف لزيادة مرونة العضلات وتقويتها. المثانة دلوقتي بدأت تخرج مياه. جهازه المناعي بيكوّن أجسام مضادة لحمايته من أي أمراض قد تصيبه. جنينك دلوقتي عارف الأصوات المألوفة زي صوتك وصوت باباه وأي حد هو كان متعود يسمعه بيتكلم معاكي.
الأسبوع الثاني والثلاثون
- الرحلة خلاص قربت تخلص. وصلنا للأسبوع الثاني وثلاثين. الجنين دلوقتي بدأ يدرب رئته على التنفس من خلال تنفس السائل الأمينوسي اللي حواليه. في الأسبوع ده، كمية المياه اللي حوالين الجنين بتوصل لأقصاها وبعد كده تبتدي تقل تدريجيًا. نمو الجنين دلوقتي شبه مكتمل ومستعد للولادة.
الأسبوع الثالث والثلاثون
- في الأسبوع ده، وزنه وصل لإتنين كيلو وطوله حوالي 45 سم. رأس الجنين بتبتدي تستقر لأسفل. قولونه بيكوّن فضلات لكن بيحتفظ بيها في القولون لحد ما يتخلص منها بعد الولادة. الجسم بيزداد صلابة رغم ليونة عظام الجمجمة. هو بيمتص دلوقتي كامل احتياجاته الغذائية عن طريق المشيمة. المكان بيضيق عليه أكتر وبيستقر على وضع إن رجله ودراعته متنيين ودقنه على صدره.
الأسبوع الرابع والثلاثون
- جهاز الجنين العصبي والرئة ما زالوا بيكتملوا. لو حصلت ولادة في الأسبوع ده مش هيكون فيه خطر على الجنين. رأسه مستقرة. حاسة السمع بتعمل بأعلى كفاءة ليها. لون جلده دلوقتي وردي، أظافر إيده مكتملة، وأظافر قدمه في الطريق للاكتمال، حركته قليلة لكن لما بتحصل بتكون قوية وعنيفة.
بوصولنا لآخر الشهر التامن، فاحنا حاليًا في حالة طوارئ واستعداد للولادة في أي وقت، جهزي نفسك، جهزي جوزك، اعرفوا مع بعض إيه الخطوات اللي تتاخد لو بدأ الطلق. هدوء الأعصاب والتدريب المسبق بيخلّي الأمور تكون سهلة. التوتر مش مفيد. مستعدة للمحطة الأخيرة؟ هقابلك في الشهر التاسع.
التعليق باستخدام حساب فيس بوك