محتويات المقال
إزيك دلوقتي بعد الأسبوع الرابع من الحمل؟ شعورك عامل إزاي؟ لو فرحانة وبتعيطي من الزعل في نفس الوقت، ما تخافيش. انتي ما تجننتيش؛ انتي بس بتتجاوبي مع التغيرات اللي بتحصل في جسمك. دفعات الهرمونات القوية في المرحلة دي عاملة بالضبط زي ما يكون في جسمك مهرجان للألعاب النارية، بس كل ده بيحصل علشان البيبي يتكون بشكل كامل وصحي. تعالي بقى اعرفي شكل ملامح الفصل التاني من المرحلة الأولى للحمل وتكوين وشكل الجنين في بطن أمه بيكون عامل ازاي، وهي مرحلة نمو وتطور الجنين والحمل الشهر الثاني بالتفصيل لأن الحمل بيتقسّم على تلات مراحل (كل 3 شهور مرحلة) وكل مرحلة لها سمات وملامح معينة بتختفي مع بداية المرحلة اللي بعدها وكلها عمومًا بتستهدف إن طفلك يوصل في أصح حالة. تعالي نعرف شكل الشهر التاني في الحمل.
مراحل نمو وتطور الجنين والحمل الشهر الثاني
أولاً: مراحل تطور الحمل في الشهر الثاني
- جسمك في الشهر الثاني من الحمل بيبدأ رحلة كبيرة في التأقلم مع الوضع الجديد، جسمك حاليًا جانب منه بيتعرّف على الجسم الدخيل اللي هو جنينك، بيتعامل معاه على إنه جسم غريب أو مرض وبيحاول يتخلص منه في شكل القيء الصباحي. التخلص ده ما بينجحش بسبب الهرمونات التناسلية الخاصة بالحمل اللي بتثبّت الحمل وبتعمل تواصل بين جسمك وبين الجنين ده.
- في بداية الحمل في الشهر الثاني هتبتدي تحسي بالدوخة خصوصًا لو قمتي فجأة. حاولي دايمًا تتحركي بهدوء. شهيتك هتكون ما بين الرغبة القوية في الأكل وبين النفور الشديد منه، ومن أنواع معينة من الأكل بتختلف من سيدة للتانية.
- التغيرات الهرمونية المصاحبة للحمل ممكن جدًا تسبب لك إمساك. علشان كده، من المهم ليكي إنك تدخلي الألياف الصحية الغنية بالمياه زي الموجودة في الخضروات الورقية في نظامك الغذائي مع طبعًا الحرص على شرب المياه باستمرار.
- هتلاحظي إن ثديك بدأ ينتفخ في الفترة دي، ورغبتك في دخول الحمام بتزيد. وكل دي علامات صحية مش مسببة لأي قلق، رحمك ابتدى يكبر شوية، حجمه تقريبًا قد برتقالة، والجنين ابتدى يتحرك في الرحم لكن حركات انتي مش هتحسيها خالص. وأي حركة هتحسيها في بطنك في الفترة دي مش هتكون جنينك إنما الغازات في أمعائك.
- في الشهر الثاني من الحمل كمان، هتبتدي تنتظمي في زيارتك لطبيبك على الأقل مرة في الشهر، طبيبك هيطلب مجموعة تحاليل مختلفة لتحديد حالتك الصحية بالضبط، زي صورة دم كاملة، تحليل بول، فحص للحوض، وتقييم عظم الحوض والمهبل وعنق الرحم، واحتمال كمان ياخد مسحة من عنق الرحم للتأكد إن مافيش تشوهات فيه ممكن تأثر على الحمل.
- لازم يكون عندك وعي بخطورتها وإمكانية تعرضك انتي والجنين للخطر زي نزيف الحمل اللي بيتراوح بين خفيف وقوي. وله أسباب عديدة واللي بمجرد ظهوره عندك، لازم تستشيري طبيبك لأن أسبابه عديدة، والخطر التاني هو ظهور أعراض الإجهاض في الشهر الثاني من الحمل، وهو كمان له أسباب كتيرة جدًا وتستلزم تدخل طبي علشان يحدد السبب المسبب له.
عمومًا لازم تعرفي إن رغم كل شيء، فالمرحلة الأولى من الحمل من أكتر المراحل بهجة وسعادة، ورغم المتاعب الصحية وخصوصًا المرتبطة بالقيء الصباحي وقد إيه هي مزعجة بس حقيقي دي أجمل فترة ليكي وتقدري تدلعي فيها من كل اللي بيحبوكي.
مهم جداً انك تعرفي كيفية ممارسة العلاقة الحميمة أثناء الحمل
ثانياً: مراحل تطور ونمو الجنين في الشهر الثاني من الحمل
- نمو الجنين في الأسبوع الخامس من الحمل: (بذرة السمسم)
تخيلي؟ جنينك دلوقتي حجمه قد حبة السمسم، طوله 2 ملم بس، متخيلة صغير قد إيه؟ هنا بدأ عموده الفقري في التشكل وجهازه العصبي بشكله الأولى بتكوين صغير خالص وبيسبح في كيسه الأمينوسي.
- تطور تكوين الجنين في الأسبوع السادس من الحمل: (بطني وقلبي يا مامي)
في الأسبوع ده، تطور جنينك سريع. هيبتدي يتكوّن له تجويف الصدر والبطن. هيبدأ القلب في شكله المبسط بالتكون مع الدورة الدموية ويبتدوا يشتغلوا وتقدري تشوفيه في السونار. عموده الفقري تكون فيه الحبل الشوكي، والأطراف ابتدت تظهر زي ما تكون براعم صغيرة. الوجه لسه ما ظهرش لكن تجويف الفم والأنف ابتدوا يتكونوا.
- شكل الجنين في الأسبوع السابع من الحمل: (بصي على إيدي ورجلي)
- أكتر حاجة مميزة في الأسبوع السابع هو النمو السريع لأطراف الجنين، إيده ورجله شكلهم بقى واضح جدًا. وهتلاقي في آخر رجله فيه زي فراغات؛ هي دي اللي هتنفصل وتكون صوابعه.
- صدر الجنين اتكون والقلب بدأ يشتغل في الأسبوع السادس من الحمل زي ما قولنا، الرئتين تكوّنوا بس مش بشكل كامل ولسه ما اشتغلوش.
- الكبد والكلى للجنين اتكونوا لكن لسه ما اشتغلوش. الأمعاء اتكونت بس ما أخدتش مكانها الحقيقي في تجويف البطن.
- رأس الجنين بيستمر نموها والنخاع الشوكي اكتمل نموه والجهاز العصبي ما عدا الجزء الخاص بالأطراف، الرأس كبرت وهتكون مايلة للأمام. على جانبي الرأس هيبتدي يتكون تجويف الأذن. أجزاء الأذن الداخلية اتكونت لكن مش بشكلها النهائي.
- عينين الجنين مستمرين في التطور لكن متغطين بغطاء جلدي اللي هينقسم بعد كده ويكوّن الجفون.
- أنف الجنين لسه ما اتكونش لكن ظهر تجويفهم على الوجه: الفم والفك مستمرين في نموهم الطبيعي.
- شكل الجنين في الأسبوع الثامن من الحمل: (قلبي كبر وبيحبك)
- في الأسبوع الثامن من الحمل، قلب الجنين بيدق أقوى من أي وقت فات وقادر يوصل الدم في كل دورة الجنين الدموية. الرئة أكبر لكن لسه صلبة ولم تعمل.
- راس الجنين لسه لحد دلوقتي أكبر جزء في جسمه ولسه مايلة للأمام: الأذرع والأرجل اكتملت.
- ظهرت ملامح الفم والأنف بوضوح مع استمرار نمو العيون. الأذن الوسطى المسؤولة عن السمع والاتزان ظهرت.
الشهر الثاني من الحمل .. مميز، مش كده؟ بس في عز ما البيبي شغال بكل طاقته في تكوين نفسه، اللي تعبان بره هو انتي. علشان كده هاقول لك شوية نصائح سريعة كده تساعدك شوية.
أهم نصائح للحامل في الشهر الثاني
- اشربي مياه.
- ما تخلّيش بطنك فاضية. خلي جنبك نواشف مالحة باستمرار علشان تقاومي الإحساس بالغثيان.
- اتمشي في الهوا على قد ما تقدري.
- حاولي تاخدي قسط كافي من النوم، النوم مفيد ليكي وللجنين جدًا.
- اتبعي نظام غذائي صحي غني بالألياف والدهون الصحية والبروتين.
- اهتمي بعمل التحاليل المطلوبة وتناول الفوليك أسيد بانتظام.
وبكده نكون خلصنا مرحلة تطور الجنين والحمل الشهر الثاني .. تابعي معنا باقي سلسلة مراحل الحمل.
المصادر:
WebMD
ويب طب
أنا حامل
التعليق باستخدام حساب فيس بوك