وصلتي أخيرًا الشهر الخامس في الحمل. وزي ما عودناكي، هنكلمك عن كل تفاصيل الجنين والحمل الشهر الخامس ،انتي تقريبًا كده في نص رحلتك. الحمل 40 أسبوع، وانتي في نهاية الشهر الخامس هتكون وصلتي للأسبوع الـ20 وبالتالي نص الطريق. سرعة النمو اللي كانت في المرحلة الأولى من الحمل بتقل دلوقتي. كل الأعضاء الحيوية اتكونت وفيه منها اللي بدأ يشتغل فعلًا وبتتدرب للعمل بعد الولادة. هتبتدى تتعايشي مع الحموضة وأوقات الإمساك (هنا علاج الإمساك في فترة الحمل). حاولي تتجنبي الإمساك لأنه متعب ليكي. لو واجهتي مشاكل خاصة بالمثانة زي التهابات مثلًا، ده هيكون طبيعي لأن الضغط اللي حاصل على عضلات بطنك بتسبب لها ضعف وبالتالي إمكانية إصابتها بعدوى. بس اللي فعلًا هيكون حلو في الفترة دي إن الحمل استقر وتقدري دلوقتي تسافري وتخرجي وتقابلي صحابك مع الاستمرار في ممارسة الرياضة الخفيفة. تعالي نستعرض مع بعض ملامح أسابيع الشهر ده ونرصد التغيرات اللي هتحصل معاكي.
مراحل تطور الحمل في الشهر الخامس بالتفصيل:
- الأسبوع السابع عشر في الحمل:
هتستمري في متابعة حالتك مع الطبيب وأخذ المكملات الغذائية اللي الطبيب وصفها ليكي. التغيرات الهرمونية هتسبب لك تغيرات صحية مختلفة. علشان كده، احرصي دايمًا تشربي مياه وعصائر فريش وتناول الألياف الصحية في نظامك الغذائي. في الفترة دي، لازم تلتزمي بشكل كامل بممارسة الرياضة الخفيفة لأنها أكتر حاجة هتقدر تخفف عنك آلام الظهر والبطن اللي سببها زيادة حجم الجنين، مع المشي يوميًا لمدة 30 دقيقة. بداية من الأسبوع ده، هتقدري تخرجي وتحسي بالحرية أكتر من الأسابيع اللي فاتت. انتهزي الفرصة واستمتعي بالهواء الطلق.
- الأسبوع الثامن عشر من الحمل:
في الأسبوع ده، هتحسي إن رحمك فعليًا واقف ورا السرة. هتبتدي أوقات تحسي بهبات حرارة في جسمك هيكون سببها الرئيسي تغير معدلات هرمون البروجيستيرون. علشان كده، خليكي حريصة على إنك تكوني في أماكن جيدة التهوية وملابسك تكون قطنية ومريحة. حركة البيبي دلوقتي واضحة وبتحسي بيها بالليل أكتر من النهار. لما تيجي تروحي لطبيبك هتقدري دلوقتي تعرفي جنس المولود بشكل واضح. ده لأن أعضاء الجنين التناسلية بتكون اكتملت سواء الجنين ذكر أو أنثى. قلبك الفترة دي بيعمل بنسبة 40 لـ50% أكتر من الطبيعي لدعم عملية نمو الجنين.
- الأسبوع التاسع عشر من الحمل:
وزن الجنين بيزيد يوم عن يوم. هتحسي إن مع الوقت الضغط على أعضائك بيزيد، وإن مجهودك مش زي الأول. مفيش داعي للقلق، لأن ده كله طبيعي. اللي هتحسي بيه شوية هو أوقات زغللة أو ضبابية في العين بتروح وتيجي. مؤقتة غير مستمرة. بس لو حسيتي إن الموضوع زاد لازم تستشيري طبيبك. الحموضة مستمرة معاكي والإمساك. استمري في الحرص على تناول الألياف الخضراء هتخفف عليكي كتير. زيادة ضغط وزن ممكن تسبب لك تورم في الكاحل وظهور الدوالي، علشان كده خلّي دايمًا رجلك مرفوعة وخففي ضغط العمل على نفسك.
- الأسبوع العشرين من الحمل:
انتي دلوقتي بالظبط في النص. الأسبوع العشرين أكتر حاجة حلوة فيه إن حركة البيبي بتحسي بها على طول ولو ضغطّي بإيدك عليه هتلاقيه بيتحرك وبيرد عليكي. العلاقة جميلة بينكم وشعور الأمومة جواكي بيزيد يوم ورا يوم. تقدري في الأسبوع ده لو حسيتي بآلام في ظهرك تحطي فوطة بمياه دافية على بطنك، هتخفف لك وجعك. ضغط رحمك هيظهر لك استرخاء في عضلات المثانة، وممكن يسبب لك عدوى في المجرى البولي. نشاط الهرمونات بيأثر على الغدة الدرقية وبيسبب لك حالات من التعرق والإحساس بالحرارة.
شهر مختلف، مش كده؟ خليكي حريصة على راحتك ورفع رجلك علشان تخففي من أثر تورمها. اشربي مياه وعصائر فريش. خليكي في مكان جيد التهوية ومارسي الرياضة بانتظام بالشكل اللي هيخفف أوجاع الضهر والانتظام بالمشي لمدة نص ساعة. تعالي نعرف مع بعض إيه شكل التغيرات اللي بتحصل في جنينك في الأسابيع الأربعة دي.
ممكن تشوفي هنا مراحل تطور الجنين والحمل: الشهر السادس
مراحل تطور ونمو الجنين في الشهر الخامس:
- نمو وتطور وشكل الجنين في الأسبوع السابع عشر من الحمل:
حبيبك دلوقتي كبر. في الأسبوع ده، زي ما قلت لك بدأت بعض أعضائه الحيوية في العمل. وزنه بيزيد. طبقة من الدهون بدأت تتشكل تحت الجلد. شعر رأسه ورموشه مستمرين في نموهم وجسمه كله متغطي بطبقة من الشعر الخفيف والناعم جدًا هيتخلص منها بعد الولادة بأسبوع. بدأ نظام جسمه يمارس التمثيل الغذائي ويقدر يبلع السائل الأمينوسي ويبصقه وبيستخدم السائل ده برضه في تدريب رئته على التنفس. الجهاز البولي بدأ يشتغل ويخرج بول. هيكله العظمي بدأ يكون أشد صلابة عن الأسابيع اللي فاتت. عدد ضربات قلبه بتقل عن الأول وبقت تتراوح ما بين 120 لـ160 نبضة. دورته الدموية اكتمل نموها. وبراعم التذوق بدأت تظهر لكن لسه ما أخدتش شكلها النهائي. وتتحفز أنشطة المخ ويبدأ يتعرف على أعضائه ويحركها ومن حركته دي ممكن تيجي له زغطة.
- نمو وتطور الجنين في الأسبوع الثامن عشر من الحمل:
في الأسبوع ده، هيتميز إن حساسية عيون الطفل بقت حساسة لدرجة إنك لو وجهتي ضوء قوي ناحية بطنك هتلاقيه اتحرك وغطى عينيه بإيديه. بدأ يتحكم في تعبيرات وشه أكتر يعني أوقات يبتسم وأحيانًا يكشر. براعم التذوق مستمرة في التطور. وبتعرف تميز ما بين الحلو والمر. حركة التنفس بتظهر واضحة ليه. هو مش بيتنفس هوا، هو بيحرك صدره وبيستنشق السائل الأمينوسي. وهتلاقي إنه بيقدر يمص صوابعه. وبيتحرك بنشاط كبير في بطنك.
- نمو وتطور وشكل الجنين في الأسبوع التاسع عشر من الحمل:
في الأسبوع ده، هيستمر نمو شعر رأسه ورموشه. مستمر في الحركة وأوقات بتيجي له زغطة. الجديد إن حاسة السمع عنده دلوقتي بتشتغل بكفائة أكتر من أي وقت فات. بيقدر يسمع صوت دقات قلبك، وبيعرف يسمع صوتك ويميزه. جهازه العصبي مستمر في التطور والمخ بيستمر في النمو وإعطاء الأوامر لبقية الأعضاء. الأوعية الدموية بتدي لجلد طفلك لونه الأحمر .. وبدأ جسمه يكون على الجلد طبقة شمعية لحماية الجلد من السائل الأمينوسي بيستمر معاه لحد قبل الولادة. والدهون في جسمه بدأت توفر له الدفء اللي هو محتاجه.
- تطور شكل الجنين في الأسبوع العشرين من الحمل:
وصل جنينك معاكي لنص الطريق؛ الأسبوع العشرين. ولسه فاضل لكم مع بعض 20 أسبوع كمان. الملاحظ في الأسبوع ده إن طول الجنين بيزيد. جسم الجنين دلوقتي 90% من وزنه مياه. الطبقة الشمعية اللي بتتكون على الجلد مستمرة في النمو لحماية جلده من السائل الأمينوسي. أسنانه بدأت تتكون في قلب اللثة. والجهاز الهضمي بدأ في العمل وتحفيز المعدة والكبد والكلى على العمل بشكل أفضل. في الأسبوع ده، الجنين سامعك بشكل كامل، تقدري بداية من الأسبوع ده تتكلمي معاه وتحكي وهو هيكون سامعك كويس جدًا. هو برضه قاعد جوة سامع قلبك وحركة الأمعاء وحتى حركة الدم في عروقك. لو اتعرضتي لأي صوت عالي، بينزعج وبيغطي ودانه بإيده. وبيتفاجأ لدرجة إنه يتحرك بعنف زي ما يكون اتخض، ده غير طبعًا الحركة العادية والركل.
هنا مراحل تطور الجنين والحمل: الشهر الرابع
خلص كل كلامنا عن الجنين والحمل الشهر الخامس .. كان شهر حماسي جدًا، وتقدري بكل ثقة تكوني علاقتك بيه وتقويها بداية من الشهر ده. يعتبر دلوقتي ده أول شهر في الرحلة تكوني اتأكدي من جنس الجنين، وكمان تبتدي تستمعي بشوبينج وتجيبي له احتياجاته. ابعدي عن الضغط العصبي، ارفعي رجلك طول ما انتي قاعدة. واستشيري طبيبك إذا كان تتناولي الحديد في مكملاتك الغذائية لأن جنينك هيحتاجه في تكوين الدم. خلصت معاكي رحلتنا في تطور ونمو الجنين والحمل الشهر الخامس .. استنينا في الشهر السادس نرصد فيه مع بعض هنقابل إيه من تغيرات وتطورات.
المصادر:
Planned Parenthood
WebMD
Webteb
Ana7amel
التعليق باستخدام حساب فيس بوك