بداية الشهر الرابع هي بداية التلت التاني من رحلتك مع جنينك. الجزء الأول عدى على خير، ودلوقتي بدأنا فترة اكتمال شكل جنينك وحتى اكتمال أعضائه. بس مش كلها هتبدأ تشتغل خلال الفترة دي. في الفترة دي بطنك هتبتدي تكبر وهتبدأي تلبسي ملابس أوسع وبتوفر لك الراحة ويُفضّل تكون قطنية علشان ما تسببش ليكي أي شكل من أشكال الضيق. زياراتك للحمام هتقل لأن رحمك بدأ يرتفع لفوق، فالضغط على المثانة هيقل. بتحبي السكريات جدًا وملامح تانية مختلفة.. تعالي نستعرضها مع بعض أسبوع بأسبوع.
مراحل تطور الحمل للحامل في الشهر الرابع:
رابع شهور الرحلة (بالنسبة لك):
- الأسبوع الثالث عشر:
في الأسبوع ده، هيبتدي شعور الغثيان الصباحي يختفي بس ممكن تظهر عندك حموضة أو إمساك. عمومًا لو واحد فيهم أو الإتنين ظهر عندك، حاولي تاكلي خضروات ورقية باستمرار واشربي لبن وزبادي ومياه اللي هيكون لهم دور مهم جدًا في تخفيف المشكلة دي عندك. رحمك كبر وبدأ يتجه للأعلى وهتحسي بطنك كأنها زي الكورة الصغيرة الناعمة، شكلها جميل وسعيد، خدي زوجك معاكي في المرات اللي بتتابعي فيها مع طبيبك وخليه يسمع دقات قلب الجنين، هتفرق جدًا وهتكون ذكريات سعيدة فيما بعد.
- الأسبوع الرابع عشر:
الأسبوع ده هتحتاجي فعلًا تنزلي تعملي شوبينج، بطنك كبرت، هدومك قبل الحمل أصبحت ذكريات، احتياجك لملابس مريحة أصبح هدف أساسي عندك. انزلي واستمتعي بالشراء، هاتيها ملابس قطنية ووأسعة من عند محيط الخصر علشان تمنعي أي حساسية أو ضغط على بطنك.
الإمساك مازال مستمر معاكي، وده بسبب إن هرمونات الحمل بتسبب بطء لحركة الأمعاء، فبيحصل الإمساك. حاولي تنتظمي في ممارسة رياضة خفيفة غير مرهقة ليكي تساعدك على تنشيط الدورة الدموية وتخفيف الضغط عليكي وتسهيل حركة الأمعاء.
- الأسبوع الخامس عشر:
في الأسبوع ده، ممكن تواجهي حالة من الاحتقان في الأنف وزيادة في المخاط، وتيجي لك أعراض إنفلونزا زي انسداد الأنف وصعوبة التنفس. كل ده بيحصل بسبب التغيرات الهرمونية، فهي على الرغم من أنها أعراض مزعجة لكنها طبيعية في الفترة دي. هتلاقي إن طبيبك بيطلب منك فحوصات الـ4D لتحديد إن كان فيه أي تشوهات حاصلة للجنين، احرصي على عملها. وزنك هيزيد من 2.5 إلى 4.5 كيلو جرام. لو لاقيتي إنه أكتر من كده، حاولي تتبعي نظام غذائي صحي لتجنب الزيادة في الوزن اللي ممكن تسبب لك تعب صحي.
- الأسبوع السادس عشر:
بطنك بتكبر أكتر وأكتر. هتلاقي نفسك عندك ميل شديد لتناول الحلويات، تقدري تاكليها لكن باعتدال لتجنب أضرارها سواء ارتفاع معدل السكر في الدم أو ضغط الدم خلال الحمل. لو شعور الجوع عندك بالليل زاد، تقدري تاكلي حصة من الكربوهيدرات المعقدة اللي هتشبعك وفي نفس الوقت تديكي الطاقة اللي محتاجة لها. زيادة الدم في جسمك على قد ما هو مفيد على قد ما ممكن يكون له آثار سلبية زي نزيف اللثة وأحيانا النزيف من الأنف. دي أعراض طبيعية لكن لازم تشاركي طبيبك بيها علشان يوجهك بشكل أفضل خصوصًا لو الأمر كان زيادة عن الطبيعي ويتطلب تدخل طبي. أوردة ساقك أو الدوالي هتبدأ تظهر. حاولي تلبسي شرابات داعمة لرجلك وتقعدي رافعة رجلك وتمارسي بعض التمارين الخفيفة لتخفيف الضغط عن الساق وتنشيط الدورة الدموية.
خلصتي كده الشهر الرابع. الكل هيلاحظ بداية ظهور بطنك بشكل واضح. ما تتكسفيش منها وخليكي فخورة بيها. انتي بتنمو جواكي واحدة من معجزات الحياة وكل يوم بيعدي في الرحلة دي انتي بتدي جزء من روحك وجسمك في سبيل صحة جنينك في لهفة لحد ما تولدي وتشليه على إيديك. احرصي على تناول الحديد مع الفوليك أسيد من خلال إدخال الأطعمة الغنية بيهم في نظامك الغذائي. افتحي الشبابيك وجددي هواء غرفتك باستمرار. تجنبي التعرض للضغط العصبي لأن له تأثير سلبي عليكي وعلى الجنين. ودلوقتي تعالي نعرف إيه اللي بيحصل مع جنينك جوه رحمك أسبوع بأسبوع.
مراحل تطور الحمل للجنين في الشهر الرابع
رابع شهور الرحلة (بالنسبة للجنين):
- الأسبوع الثالث عشر:
في الأسبوع ده، طول طفلك حوالي من 8 إلى 12 سم ووزنه حوالي 65 جرام. الأسبوع ده بيتميز إن المفاصل اتكونت وبدأت تتحرك. هتلاقي الجنين بدأ يحرك قبضة إيده، وبدأ يحرك فمه بطريقة كأنه بيمتص وبيكون الهدف منها هو تحفيز الأمعاء على الهضم. وطبعًا هتقدري تسمعي نضبات جنين بكل وضوح دلوقتي. الشعر بدأ يغطي جسمه وحتى رأسه. الشعر اللي مغطي جسمه ده هيستمر معاه طول الحمل ويقع بعد الولادة. في حالة إن الجنين ذكر، فهتبدأ غدة البروستاتا في النمو، أما لو الجنين أنثى، فدلوقتي المبايض هتتجه للأسفل لتستقر في الحوض. وسقف الفم بدأ يتكون.
- الأسبوع الرابع عشر:
الأسبوع الرابع عشر ده هيكون شكل الجنين الخارجي زي ما يكون إنسان صغير. لكن مش ممكن يتولد في الوقت ده ويعيش لأن كل أعضائه وإن ظهرت فهي ما زالت في طور النمو والتطور. الفترة اللي باقية في الحمل كلها أصلًا بتستهدف إنضاج أعضائه بالشكل اللي يجهزه للحياة خارج رحم الأم. اللي هيتغير بشكل ملحوظ في الأسبوع ده إن الأذن الخارجية هتبدأ تتحرك وتنتقل من رقبته عشان توصل لمكانها الصحيح في جانب الرأس. والحلو إن بداية من الأسبوع ده إنك هتلاقي منه استجابة، يعني لو ضغطتي على بطنك، هتلاقيه بيتحرك وبيتجاوب مع الحركة دي.
- الأسبوع الخامس عشر:
في الأسبوع ده، هيبتدي نشاط جديد عند جنينك.. عينيه هتكون قادرة تميز الضوء، عظامه هتنمو ويزداد طولها، المشيمة هتقدر من بداية الأسبوع ده تمتص أنواع غذائية من دمك بشكل أكبر وكمان تقدر تتخلص من الغازات والفضلات. لو الجنين أنثى، فالمبيض عندها بدأ يكوّن ألاف البويضات. شعر رأسه وحواجب والرموش بدأت تنمو وتظهر بوضوح، وممكن يبدأ يمص صوابعه.
- الأسبوع السادس عشر:
نمو طفلك مازال مستمر وعلى وتيرة سريعة. الشغل مستمر على قدم وساق. في الأسبوع ده، هيبدأ الجنين في العبوس والابتسام بشكل لا إرادي إنما هي استجابات للنشاط العصبي اللي بدأ في المخ. القدرات الحركية بتتطور وبتزيد، الجنين بيبدأ يبلع من السائل الأمينوسي اللي حواليه من باب تحفيز الأمعاء اللي لسه غير مستعدة للهضم. وبدأ يتكون طبقة دهون بتظهر بوضوح تحت الجلد.
خلص الشهر الرابع، الماراثون مازال مستمر.. والتطور فيه مستمر طوال الـ24 ساعة طول الأسبوع من غير توقف. قربتي على منتصف الرحلة.. خليكي متبعانا علشان تعرفي إيه اللي مستنيكي في الشهر الخامس.. استنيني.
التعليق باستخدام حساب فيس بوك