بدأنا الشهر السابع اللي بيمتد من الأسبوع 26 لحد الأسبوع 30. خلاص هانت، أنا عارفة إن إحساسك بالتعب بقى شبه مستمر وشعورك بالراحة بالشكل الكامل مش زي الأول. البيبي بيكبر وجسمه بيتقل وضغطه على أعضائك الداخلية مسبب لك حموضة شبه مستمرة وألم في البواسير. كل ده رغم إنه متعب، إلا إنه طبيعي وكله ضريبة محتاجة تدفعيها للحصول على أمومتك وتستمعي بابنك وهو في تمام صحته في حضنك بعد الولادة. المميز في الفترة دي إن كل يوم بيكون أمان أكتر لطفلك. بس لو حصل ولادة مبكرة فنسبة نجاح الجنين في النجاة بتوصل لـ90%. كل شهر لما تزوري الدكتور اللي بتتابعي معاه حملك هيطلب منك تعملي تحاليل لتحديد نسبة السكر في الدم وقياس ضغط الدم وتحاليل لتحديد لو فيه أي التهابات. تعالي دلوقتي نرصد مع بعض التغيرات اللي هتحصل معاكي ومع جنينك.
مراحل تطور الحمل للحامل في الشهر السابع:
- سابع الرحلة (بالنسبة لك):
- الأسبوع السادس والعشرين:
أكتر شعور هتحسي بيه هو الضيق في التنفس. الرحم بيكبر وبيضغط على الحجاب الحاجز. الشعور بالحموضة سببه إن الرحم ضاغط على المعدة. علشان كده هتحتاجي تاكلي ببطء وتقسّمي وجباتك خلال اليوم. وتبعدي عن الأكلات اللي فيها توابل والوجبات السريعة.
- الأسبوع السابع والعشرين:
مفيش تغير كبير الأسبوع ده عن الأسبوع اللي فات، التشنجات في عضلات رجلك موجودة، ممكن تلاحظى إن فيه ورم خفيف في رجلك بيظهر لو طولتى في الوقوف، حاولى ترتاحي على قد ما تقدري، هتحسي بحركة البيبي وركلاته ليكي لدرجة إنها ممكن تصحيكي من النوم. وهتلاقي نفسك بتصابي بالزغطة أكتر من المعتاد بسبب الضغط على المعدة والحجاب الحاجز.
- الأسبوع الثامن والعشرين:
هتبتدي تحسي إنك تفضّلي تقعدي في البيت. متاعب الحمل بتزيد، قلقك من قرب ميعاد الولادة بيزيد. في الوقت ده، اتكلمي براحتك مع الدكتور ووضحي المخاوف دي. معلوماتك منه هتخفف القلق ده. هتحسي إنك رجعتي تاني زي أول الحمل بتحتاجي تدخلي عدد مرات أكبر للحمام. وزن الجنين ضاغط على المثانة. ما تخلّيش الموضوع ده يقلل من شربك للمياه. استمري في شرب الكمية الكافية.
- الأسبوع التاسع والعشرين:
في الأسبوع ده، ركزي على تناول فيتامين C، والأغذية الغنية بالألياف والبروتينات. لأن ده هيكون له دور في دعم نمو الطفل واستمراره. استمري في برنامجك واعرفي إن ممكن تحسي بشوية أوجاع شبيهة بأوجاع الدورة الشهرية. دي بتكون عملية استعداد وتدريب من جسمك للرحم إنه يجهز للولادة. لو لاحظتي إن الألم غير محتمل لازم تكشفي عند طبيبك.
- الأسبوع الثلاثون:
يعتبر الأسبوع ده بلا تغيرات جوهرية عن الأسبوع 29، فاضل لك 10 أسابيع كمان، قربتي خلاص، حجم الجنين زاد، هو بيتحرك بس بشكل أقل لأن المساحة حواليه قلت بطبيعة الحال. استمري على نفس نظامك الصحي وتابعي قياسات السكر والضغط.
لازم تبقي عارفة إن كل أوجاعك محسوسة، مافيش فيها أي دلع. انتي بتبذلي مجهود حقيقي 24 ساعة. كل نفس صعب بتاخديه له تمن إن جنينك يكبر ويتطور. استشيري طبيبك باستمرار وشاركيه كل أفكارك. استمتعي بالشوبينج وشراء حاجات البيبي. تعالي نستعرض مع بعض التغيرات اللي بتواجه جنينك خلال الأسابيع دي.
مراحل تطور الحمل للجنين في الشهر السابع:
- سابع الرحلة (بالنسبة له):
- الأسبوع السادس والعشرين:
في الأسبوع ده البيبي بيكون وزنه حوالي من 750 جرام لـ 760 جرام، في قيمة كيلو إلا ربع، طوله وصل لـ35 سم. رحمك بدأ يضيق عليه. بس اللي هيلاحظ في الأسبوع ده هو بداية قدرته على إنه يفتح ويقفل عينه ويتفاعل مع الضوء اللي بيتوجه ناحية بطنك بشكل أكبر. السمع دلوقتي بقى كامل النضوج وبيتفاعل مع الأصوات والموسيقى المحيطة بيكي. الرئتين مستمرين في نموهم. واللي لاحظه العلماء إن في الأسبوع ده بتبدأ إشارات مخية تصدر من مخ الجنين مشابهة جدًا للإشارات الخاصة بواحد بيحلم. علشان كده بيقولوا إن الجنين بيقدر ينام ويمارس نشاط عقلي زي الحلم وهو لسه في رحم أمه.
- الأسبوع السابع والعشرين:
الأسبوع ده يعتبر من الأسابيع الهادية، التغيرات فيه مش كتير. أحداث الأسبوع اللي فات مكملة معاه، بس هتلاقي إن وزنه وصل لحوالي 870 جرام وطوله زاد لحد 36.5 سم. إيده بتتحرك أكتر، بيعرف يفتحها ويقفلها بكفاءة أكبر، بيحرك رجله لتقوية عضلات الفخد، ولو الجنين ذكر، فالخصيتين دلوقتي في مكانهم في كيس الصفن، ويقدر في الأسبوع ده إنه يبتدي يعيط لو انزعج من حاجة.
- الأسبوع الثامن والعشرين:
حبيبك دلوقتي وزنه في الأسبوع ده وصل لكيلو جرام كامل وطوله تقريبا لـ 38 سم. تطور تفاعله مستمر، بيحب يقرب من مكان النور لو وجهتي مصدر ضوء ساطع ناحية بطنك. الرئة في حالة نمو وتطور سريع. المخ بينمو وبيعمل 24 ساعة والنظام العصبي بيكتمل. كثافة شعره زادت، رموشه طولت، ضوافره اكتملت وبتظهر بوضوح على صوابعه، وحركة العين أوضح وبتبين إن الجنين بيحلم.
- الأسبوع التاسع والعشرين:
الجنين وزنه وطوله تقريبًا ثابت. لكن فيه شوية تغيرات بتحصل معاه، حركاته البهلوانية بتقل كتير. رحمك بيضيق عليه وحجمه بيزيد، الرئتين دلوقتي اكتمل نموهم ومستعدين لوظيفتهم في التنفس بعد الولادة. في الأسبوع ده برضه لو الجنين ذكر هيبان بوضوح إن الخصيتين فوق فخده، ولو أنثى هيكون البظر ظاهر وحجمه صغير لسه لم يتم تغطيته بالشفرتين.
- الأسبوع الثلاثون:
في الأسبوع ده هتبتدي تحسي إنه هادي لأنه بيقضي أغلب الوقت في رحمك نايم. خلاياه العصبية اتكونت لكن لسه مش قادرة تفرق ما بين الحرارة والبرودة بس في نفس الوقت متحكم في حرارة جسمه. باقي أجزاء وشه زي المنطقة اللي فوق الأنف اكتملت. حجم راسه دلوقتي متناسق مع حجم جسمه.
بوصولكم للأسبوع التلاتين ده معناه إن الجزء الأخير من الرحلة بدأ. فاضل بس 10 أسابيع وتتم الولادة. كل يوم من هنا ورايح غالي جدًا ومهم جدًا لاكتمال نمو الجنين. احتمالية الولادة المبكرة قائمة لكن في نفس الوقت فرص النجاة فيها تعدي ال95%. إستمري في الكلام مع جنينك، خدي قسط الراحة المناسب، ابعدي عن الضغوط لأنها بتأثر فيكي وفي الجنين. المشي لمدة 30 دقيقة يوميًا، المتابعة المستمرة لمستوى السكر في الدم وقياس ضغط الدم. الغذاء المتوازن لتجنب زيادة الوزن. هنتقابل في الشهر التامن، المحطة قبل الأخيرة.
التعليق باستخدام حساب فيس بوك